ბორჯღალოსნები. აქ, მართლა აღარაა ჩვენი ადგილი

საქართველო-ბელგია 47:0
საქართველო (15-9) წიკლაური, თოდუა, კაჭარავა (მალაღურაძე 61), კვესელაძე, ფრუიძე (სიჭინავა 66), ჯინჭველაშვილი, აფრასიძე (ლობჟანიძე 61). (1-8) ჟვანია (მატარაძე 52) მამუკაშვილი, (ჭყოიძე 61), ჩილაჩავა (მელიქიძე 52), ნემსაძე, ჭეიშვილი (შენგელია 71), ო.გიორგაძე, თხილაიშვილი (გაჩეჩილაძე 41) ლომიძე
7ლ: ჩილაჩავა, მამუკაშვილი, ჟვანია, წიკლაური, ფრუიძე, თოდუა, სიჭინავა. 6გ: წიკლაური
ბელგია (15-9) კორნესი (ბ.კოკიუ 41), ვალრაფი, პირონი, ბონტამი, მურიჩი, არი, ტ.კოკიუ (მონტუაზი 44) (1-8) სოტო (გალერი 52) დინსტი (დიუბუა 45), მულუმბა (პენტ 41), ჰერენხერ დე ჰუხე, ბილი, ჰამზავი (დებატი 71), კორადი (ტოზია 20),
მსაჯი: მარიუს მიტრეა (იტალია)

13-წლიანი შესვენების შემდეგ ქუთაისის ისევ დაუბრუნდა დიდი რაგბი. ჩვენმა ეროვნულმა გუნდმა ამ ქალაქში თავის ისტორიაში მესამედ ითამაშა და სამივე შეხვედრაში გამარჯვება იზეიიმა.

"რაგბი ევროპის ჩემპიონატის" წლევანდელი გათამაშების პირველ ტურში "ბორჯღალოსნების" მეტოქე ბელგიის ნაკრები იყო, რომელიც ჩვენს დივიზიონში აუტსაიდერია და ადგილის შენარჩუნებისთვის იბრძვის. ცხადია, ასეთ გუნდთან თამაში ჩვენი ნაკრების მწვრთნელისთვის შესანიშნავი შანსია ახალგაზრდა მოთამაშეები და ისინიც, ვინ ახალგაზრდები არ არიან და ნაკრებში თამაშის პრეტენზია აქვს, საქმეში ნახოს.

მატჩში დებიუტი ჰქონდა ორ მორაგბეს - მიხეილ გაჩეჩილაძეს და გურამ შენგელიას. ორივე მესამეხაზელები არიან. არადა ეს ის პოზიციაა, სადაც საკმაოდ მაღალი კონკურენციაა და სხვა პოზიციებთან შედარებით (მაგალითად, მეორე ხაზი) მდგომაროება ბევრად უკეთესია.

ბელგიასთან თამაშის საშუალება სხვა საინტერესო მორაგბეებსაც მიეცათ. გიორგი კვესელაძემ კიდევ ერთხელ დაგვანახვა, რომ ნაკრების ძირითად შემადგენლობასთან ძალიან ახლოსაა. ფულბეკმა ბექა წიკლაურმა უკანა ხაზში ლიდერობა იკისრა და გამოუვიდა. როგორც ყოველთვის ძალზედ შედეგიანი და სასარგებლო იყო დავით კაჭარავა. ცუდად არც გარემარბები გამოიყურებიდნენ. ალექსანდრე თოდუამ და გიორგი ფრუიძემ თავიანთი წილი ლელოს გატანა შეძლეს.
გუნდის მამოძრავებელი ძალა, ცხრა ნომერი გელა აფრასიძე და მასსავით ჯერ კიდევ გამოუცდელი რეზო ჯინჭველაშვილი სათანადოდ გაისარჯნენ. ცხადია, ბელგია არ არის ის გუნდი, რომელთან თამაშიც ხარვეზებს ნათლად გამოავლენს, ყველა მოთამაშის შესაძლებლობას მკვეთრად წარმოაჩენს. ერთი კია, ჩვენი ნაკრები დაცვაში ისე გაისარჯა, რომ მეტოქე მშრალზე დატოვა.

დიდი სხვაობით გამარჯვება, ცხადია, მოსალოდნელი იყო და კიდევ ერთხელ ისმის კითხვა - რა გვესაქმება იმ ტურნირში, როცა თამაშისას მოედანზე ძირითადი შემადგენლობიდან ოთხი მორაგბეა და მეტოქეს ასე უშანსოდ უგებ?

მომდევნო შეხვედრას "ბორჯღალოსნები" გერმანიის ნაკრებთან ფრანქფურტთან ახლოს, ოფენბახში გამართავენ.

წუთი წუთზე
1 წუთი: პირველი დერეფანი საქართველოს ნაკრების სასარგებლოდ, რომელიც სუფთად მოვიგეთ.
მე-3 წუთი: დაინიშნა პირველი საჯარიმო საქართველოს ნაკრების სასარგებლოდ. "ბორჯღალოსნების" ფულბეკმა ბექა წიკლაურმა ხელსაყრელი პოზიციიდან საჯარიმო ვერ გაიტანა.
მე-9 წუთი: საქართველოს ნაკრებმა დერეფანი მეტოქის ნახევარზე მოიგო, ხელდახელ მარჯვნივ, გრძელ ფრთაზე ჩაათამაშა. გარემარბი ალექსანდრე თოდუა ზედ ლელოს ხაზთან შეაჩერეს. რაკიდან მოკლე დერტყმებით მორკინალებმა განაგრძეს შეტევა და ბურთი ბელგილეთა ლელოში ლევან ჩილაჩავამ შეიტანა. წიკლაურმა გარდასახა - 7:0
მე-15 წუთი: დერეფანი ბელგიის ნაკრების ლელოდან ხუთ მეტრში მოვიგეთ. მოლი დავძარით, მაგრამ მერე თამაში რაკში გადავიდა. ბურთი უმალ შერკინების კვაჭმა შალვა მამუკაშვილმა აიტაცა და ლელო გაიტანა. წიკლაურმა გარდასახა - 14:0.
25-ე წუთი: მრავალფაზიანი შეტევა ისევ დერეფნის მოგებიდან დავიწყეთ. იერიშის მიმართულება ცხრა ნომერმა გელა აფრასიძემ რამდენჯერმე შეცვალა. ბოლოს, მარცხენა გრძელ ფრთაზე შუამარბ დავით კაჭარავას გადააწოდა, რომელმაც ორი მეტოქე მიიზიდა და უმეთვალყურეოდ დარჩენილ შერკინების ბურჯს, ზურაბ ჟვანიას ლელო გაატანინა. წიკლაურმა ესეც გარდასახა - 21:0.
40-ე წუთი: ლევან ჩილაჩავამ მეტოქეს ბურთი რაქში აართვა და ლელოსკენ გაიწია. ის ზედ ხაზზე შეაჩერეს. აფრასიძემ ბურთი სწარაფად გამოიტანა და მგეზავ რეზო ჯინჭველაშვილს გადააწოდა, რომელმაც ფეხით მარჯვნივ კიდესკენ გადაკიდა. იქ ყველას ფულბეკმა ბექა წიკლაურმა დაასწრო და ბურთი ლელოში დაამიწა. გარდასახვა თვითონვე გაიტანა - 28:0.
41-ე წუთი: მატჩის არბიტრმა შუბური ბოჭვისთვის შალვა მამუკაშვილი სინბინში გაუშვა.
55-ე წუთი: მოედნის საკუთარ ნახევარზე მოგებული დერეფნის შემდეგ მეტოქის ხაზი ცენტრში ალექსანდრე თოდუამ გაჭრა, შეტევა გიორგი კვესელაძემ განაგრძო, მას დავით კაჭარავა წამოეშველა, საქმეში უკნიდან ბექა წიკლაური ჩაერთო, რომელმაც ზედ ლელოს ხაზთან კიდესკენ გიორგი ფრუიძეს გადააწოდა ბურთი, რომელსაც ლელოს გატანა არ გასჭირვებია. წიკლაურმა ვერ გარდასახა - 33:0.
67-ე წუთი: მეტოქის 22-მეტრიანი ზონის ხაზთან მოლი დავძარით, რომელსაც შეცვალზე შესული შერკინების კვაჭი გიორგი ჭყოიძე მოსწყდა და ათიოდე მეტრით წინ წაიწაა. ასევე შეცვალზე შესულმა ცხრა ნომერმა ვასილ ლობჟანიძემ ბურთი მარჯვნივ, გრეძელ ფრთაზე ჩაათამაშა, სადაც რიცხობრივ უპირატესობაში ვიყავით და ლელო ალექსანდრე თოდუამ მიითვალა. წიკლაურმა გარდასახა - 40:0.
75-ე წუთი: ამჯერად სალელოვე შეტევა შერკინებიდან დაიწყო. ლობჟანიძემ ბურთი მარცხნივ, მოკლე ფრთაზე გაიტანა, იქ ხაზი ჯერ ლაშა მალაღურაძემ გაჭრა, მერე კიდევ უფრო წინ ოთარ გიორგაძემ წაიწია. ბოლოს შეტევა ისევ მოკლე ფრთაზე გაგრძელდა, სადაც მალაღურაძემ ეფექტური პასით ანზორ სიჭინავას ლელო გაატანინა. წილკაურმა გარდასახა - 47:0.

მატჩის შემდეგ
მილტონ ჰეიგი, საქართველოს ნაკრების მთავარი მწვრთნელი:

"ანგარიშით და თამაშით კმაყოფილი ვარ. ქუთაისში კარგი გარემო იყო და შევძელით სანახაობრივი რაგბის თამაში. გარკვეული ხარვეზები იყო, რის გამოსწორებაზეც მომდევნო კვირაში ვიმუშავებთ და მოვემზადებით გერმანიასთან სათამაშოდ.

მინდა დიდი მადლობა გადავუხადო ყველას, ვინც იზრუნა რომ ეს თამაში ქუთაისში გამართულიყო. ასევე ქომაგებს, რომლებმაც ბოლომდე გაავსეს სტადიონი და გულიანად გვიგულშემატკივრეს.

კმაყოფილი ვარ მიხეილ გაჩეჩილაძის თამაშით. გურამ შენგელიას მხოლოდ 10 წუთი ჰქონდა თავის გამოსაჩენად. ნაკრებს პირველად უკაპიტნა გიორგი ნემსაძემ და ეს მოვალეობა ძალიან კარგად შეასრულა."

გიორგი ნემსაძე, საქართველოს ნაკრების კაპიტანი:

"თამაში ისეთი ანგარიშით დასრულდა, არ შეიძლება კმაყოფილები არ ვიყოთ. ვითამაშეთ გაშლილად და ლელოების უმეტესობაც ფრთებიდან გავიტანეთ. მინდა მადლობა გადავუხადო ბიჭებს და ასევე იმ გულშემატკივარს, რომელიც სულითა და გულით გვქომაგობდა მთელი თამაშის განმავლობაში.

არ ვაკნინებ ბელგიას, რომ თითქოს მათ ვერაფერი შეძლეს, უბრალოდ ჩვენ მათ ჩვენი თამაშით არ მივეცით არაფრის გაკეთების შესაძლებლობა. შევუზღუდეთ სათამაშო სივრცე და, ფაქტობრივად, ხაზი ერთხელაც ვერ გაგვიჭრეს".

გიომ აჟაკი, ბელგიის ნაკრების მთავარი მწვრთნელი:

"მატჩის წინ, პრესკონფერენციაზეც ვთქვი, რომ ზუსტად ვიცოდით ვის წინააღმდეგ მოგვიწევდა თამაში. საქართველო ძლიერი და გამოცდილი გუნდია, ხოლო ჩვენ გვყავს ახალგაზრდა, გამოუცდელი გუნდი. რაც შეგვეძლო გავაკეთეთ და მიუხედავად ანგარიშისა, ჩემი ბიჭებით ამაყი ვარ."

თომას დინსტი, ბელგიის ნაკრების კაპიტანი:
"ჩვენი გუნდი შენების პროცესშია და ვეთამაშეთ გამოცდილ საქართველოს ნაკრებს, რომელსაც ყავას ძალიან ძლიერი შერკინება. გაგვიჭირდა დერეფანშიც, თუმცა საბოლოოდ ჩემი თანაგუნდელების გარჯით მაინც კმაყოფილი ვარ".

I ტური
რუმინეთი-გერმანია 85:6
რსუეთი-ესპანეთი 13:20

თ მ ფ წ ბ ქ(პ)
1. რუმინეთი 1 1 0 0 +79 5
2. საქართველო 1 1 0 0 +47 5
3. ესპანეთი 1 1 0 0 +7 4
4. რუსეთი 1 0 0 1 -7 1
5. ბელგია 1 0 0 1 -47 0
6. გერმანია 1 0 0 1 -79 0

17 თებერვალი
გერმანია-საქართველო
რუსეთი-ბელგია
ესპანეთი-რუმინეთი

გოგიტა ბუხაიძის ფოტო

2482
მკითხველის კომენტარები / 1 /
სოსო
0
მომავალში როცა ქუთაისში ითამაშებს ნაკრები,ტორპედოს სტადიონზე ათამაშეთ,არა მგონია ტორპედოს ხელმძღვანელობამ ამაზე უარი თქვას.სტადიონი თითქმის დარწმუნებული ვარ, ბოლომდე შეივსება,ქუთაისში ხომ რაგბის გემო კარგად იციან.სტადიონიც იხეირებს და მაყურებელიც.
მსგავსი ამბები
რუბრიკის სხვა სიახლეები
;