ბორჯღალოსნები. მერაბ შარიქაძე: ბოდიში, რომ ვერ გაგახარეთ... [ანალიზი]

იტალია-საქართველო 28:17

იტალია (15-9): სპერანდიო, ბენვენუტი, კამპანარო, კასტელო (მორისი 59), ბელინი, ალენი (კანა 76), ტებალდი (პალაცანი 72); (1-8): ლოვოტი (ტრაორე 72), ჯირალდინი (ბიჯი 72), ფერარი (პასკუალი 56), ძანი (ფუზერი 62), ბადი, ნეგრი (მეიერი 64), პოლედრი, სტეინი.
4ლ: კამპანარო, ბელინი, ფერარი, ალანი. 2ს, გ: ალანი.
სინბინი: ბენვენუტი

საქართველო (15-9): მათიაშვილი, კოშაძე (კვესელაძე 45), შარიქაძე, მჭედლიძე, ძნელაძე, ხმალაძე (მალაღურაძე 79), ლობჟანიძე (აფრასიძე 59); (1-8): ნარიაშვილი (ჟვანია 59), ბრეგვაძე (მამუკაშვილი 59), ქუბრიაშვილი (ჩილაჩავა 48), ჭეიშვილი (სუთიაშვილი 66), ლომიძე, გიორგაძე (ბიწაძე 56), ცუცქირიძე, გორგაძე.
2ლ: მჭედლიძე, საჯარიმო. ს, გ: მათიაშვილი
სინბინი: ცუცქირიძე
მსაჯი: გლენ ჯექსონი (ახ. ზელანდია)

საქართველოს ნაკრებმა ნოემბრის ტესტების პირველ მატჩში სტუმრად, ფლორენციაში, იტალიის ეროვნულ გუნდთან 17:28 წააგო. ამ მატჩის მნიშვნელობაზე აღარ შევჩერდებით. მასზე ბევრი ითქვა და დაიწერა. ჩვენთვის, ისევე როგორც იტალიელებისთვის, მთავარი იყო, ამ მატჩის ნებისმიერი ანგარიშით მოგება. ჩვენ ეს ვერ მოვახერხეთ...

მიზეზი ბევრია. აღარაფერს ვიტყვი იმაზე, რომ ტრავმირებული ცხრა მოთამაშე გვყავდა. მე-7 წუთიდან მოყოლებული სოსო მათიაშვილიც დაშავდა, რომელმაც ბოლომდე კი ითამაშა, მაგრამ ტრავმა შეიძლება ისეთი გამოდგეს, რომ დარჩენილ ორ შეხვედრაში ვეღარ იასპარეზოს. ამას გარდა, პირწმინდად წავაგეთ მოლი და დერეფანი.

იტალიელები, განსაკუთრებით 60 წუთის განმავლობაში, ჩვენზე უფრო სწრაფად ბურთაობდნენ და ტექნიკური არსენალიც უკეთესი ჰქონდათ. მათი მრავალფაზიანი შეტევები ბევრ თავსატეხს უჩენდა ჩვენს დაცვას, რომელიც თავდადებით კი იბრძოდა, მაგრამ ყოველთვის ეს არ შველოდა.
ჩვენი მორაგბეები ელემენტარულ შეცდომებს უშვებდნენ შეტევისას. ბურთის ხელიდან ხშირად ვარდნამ რამდენჯერმე კარგი იერიშის წამოწყებისა და განხორციელების შესაძლებლობა წაგვართვა. ერთადერთი, რაშიც მეტოქე დავჯაბნეთ, შერკინებაში თამაში იყო.

ქომაგები
"არაერთხელ მითქვამს, ჩვენ რომ ქომაგები გვყავს, მსოფლიოს ნებისმიერ ქვეყანას შეშურდება. ძალიან რთული თამაში იყო. გუნდში ტრავმების გამო ბევრი გვაკლდა. გასვლით შეხვედრაში ჩვენმა გუნდმა რაც შეიძლებოდა, მაქსიმუმი გაიღო. გავაგრძელებთ მუშაობას, პროგრესს ქომაგებთან ერთად და წარმატება აუცილებლად მოვა" - ეს სიტყვები მამუკა გორგოძეს ეკუთვნის, რომელიც თამაშს ფლორენციაში ტრიბუნიდან ადევნებდა თვალყურს.

ქართველი ქომაგები მართლაც ერთ-ერთი ყველაზე ნათელი მოვლენა იყო ამ მატჩში. ეს იტალიურ მედიას და იქაურ ფანებსაც არ გამორჩენიათ თვალთახედვიდან. ფლორენციაში საქართველოდან და ევროპის სხვადასხვა ქვეყნებიდან 10 ათასზე მეტი ქართველი ქომაგი ჩავიდა, რაც აქამდე უპრეცედენტო შემთხვევაა. ქართული დროშების ფერებში მოხატული და ჩვენი ეროვნული დროშებით აღჭურვილი ფანების გულშემატკივრობას დიდი გამოხმაურება მოჰყვა სარაგბო სამყაროში. მათ მთელ მსოფლიოს დაანახვეს, როგორ უყვართ რაგბი ჩვენს ქვეყანაში,

"ბორჯღალოსნების" ათასობით გულშემატკივარი შეიკრიბა პირველი რესპუბლიკის მოედანზე, რომლებმაც ერთად შეასრულეს საქართველოს ჰიმნი. ჩანაწერი კი, ფლორენციაში გაიგზავნა და "ბორჯღალოსნებმა" ის თამაშის დაწყების წინ ნახეს. თბილისის ცენტრში შეკრებილმა გულშემატკივრებმა საქართველოს ნაკრების თავდადებული ბრძოლა დიდ ეკრანზე იხილეს და ბოლო წუთამდე ქომაგობდნენ ჩვენს მორაგბეებს.

მატჩი
საწყის წუთებში რამდენიმე შეცდომა დავუშვით და შედეგად საჯარიმოთი დავისაჯეთ. მე-9 წუთზე იტალიელთა მგეზავმა ტომაზო ალენმა ხელსაყრელი პოზიციიდან გაიტანა - 3:0. ამას ხუთ წუთში ლელოთი ვუპასუხეთ. ჩვენმა მორაგბეებმა რამდენიმეფაზიანი შეტევა განახორციელეს და ასევე საჯარიმოს დარტყმის უფლება მოვიპოვეთ, რომელიც კარში არ დავარტყით. დერეფანი მოვიგეთ, მოლი შევკარით, მაგრამ ვერ დავძარით. მოლს შერკინების კვაჭი ჯაბა ბრეგვაძე მოსწყდა. თუმცა მალევე შეაჩერეს. წარმოქმნილი რაკიდან ცხრა ნომერმა ვასილ ლობჟანიძემ მარჯვნივ, გრძელ ფრთაზე შუამარბი თამაზ მჭედლიძე მოძებნა, რომელმაც სამ იტალიელთან ბრძოლაში ლელოში შეაღწია. სოსო მათიაშვილმა გარდასახა - 7:3.

ამან მასპინძელთა საგრძნობი გამოცოცხლება გამოიწვია. ინიციატივა ხელთ იგდეს და ტაიმის ბოლომდე არ გაუშვიათ. 22-ე წუთზე "სკუადრა აძურამ" 12-ფაზიანი იერიში განახორციელა, რომელიც მარჯვენა ფრთაზე შუამარბმა მიკელე კამპანარომ მჭედლიძის სტილში, სამ "ბორჯღალოსანთან" ბრძოლაში ლელოთი დაასრულა. ალენმა გარდასახა - 10:7.

ანგარიშის გათანაბრების შანსი მალევე მოგვეცა, მაგრამ მათიაშვილმა საჯარიმო ვერ გაიტანა. ცოტა ხანში კი, ჰაერში ამხტარ მოთამაშეზე თამაშისთვის მატჩის არბიტრმა მესამეხაზელი გიორგი ცუცქირიძე გაასინბინა. იტალიელებმა რიცხობრივი უპირატესობა კარგად გამოიყენეს და მონაგარს კიდევ რვა ქულა შესძინეს. ჯერ ალენმა გაიტანა საჯარიმო. მერე, ტაიმის ბოლო წუთზე, გარემარბმა მატია ბელინიმ დაგვალელოვა - 18:7. ასე დასრულდა პირველი ნახევარი.

შესვენების შემდეგ ისევ იტალიამ შემოგვიტია. ისევ რამდენიმეფაზიანი იერიში და ჩვენი ლელოს წინ წარმოქმნილ რაკში ყველაზე უკეთ მასპინძელთა პირველხაზელი სიმონე ფერარი გაისარჯა. მისი ლელო ალენმა ვერ გარდასახა - 23:7. ათ წუთში მათიაშვილმა საჯარიმო 40 მეტრიდან დაარტყა და ანგარიშში სხვაობა ოდნავ შეამცირა - 10:23.

57-ე წუთზე კი, თავი მგეზავმა ტომაზო ალენმა გამოიჩინა. მან კარგად ისარგებლა მოედნის ცენტრში წარმოქმნილი არეულობით და მარცხენა ფრთიდან შემოგვიტია. მისი გაჩერება ვერავინ შეძლო. გარდასხვა თვითონვე დაარტყა და ვერ გაიტანა - 28:10.

ამის შემდეგ უპირატესობას მთლიანად "ბორჯღალოსნები" დაეუფლნენ. 63-ე წუთზე ხაზი გიორგი ცუცქირიძემ გაჭრა, მათიაშვილმა და ბექა გორგაძემ ბურთი სწრაფად, მარცხენა ფრთაზე ბოლომდე ჩაათამაშეს. იქ შეცვლაზე შესულმა გიორგი კვესელაძემ ბოლო მცველი თავისკენ გადაიყვანა და ბურთი ბექა ბიწაძეს გადააწოდა. ის ლელოს აუცილებლად დადებდა, მაგრამ იტალიელთა გარემარბმა ტომაზო ბენვენუტიმ ჯერ კიდევ ბურთის მიღებამდე შებოჭა. ვიდეორეფერიმ ეს მომენტი დეტალურად განიხილა და საქართველოს ნაკრებს საჯარიმო ლელო ჩაუთვალა. ხოლო ბენვენუტი ყვითელი ბარათით დაისაჯა - 17:28.
მეტობაში დარჩენილი "ბორჯღალოსნები" ბევრს ეცადნენ, მაგრამ ანგარიშში სხვაობის კიდევ უფრო შემცირება ვეღარ შეძლეს.

მატჩის შემდეგ
მატჩის შემდეგ იტალიური მედია ჩვეულ სტილში "აჭიკჭიკდა". დაასკვნეს, საქართველო ექვს ერში სათამაშოდ მზად არ არისო. ცოტა უფრო განსხვავებულად ფიქრობს იტალიელი ქომაგების ნაწილი, რომლებმაც იტალიის რაგბის ფედერაციის ვებგვერდის ფორუმში გამოთქვეს თავიანთი მოსაზრებები. ყველა მათგანი თანხმდება - იმის დასამტკიცებლად, რომ იტალიას უფრო ეკუთვნის ექვს ერში თამაში, ვიდრე საქართველოს, ამ მატჩში მინიმუმ 30 ქულით უნდა მოგვეგოო. ერთ-ერთმა მათგამა აღნიშნა, შარშან უელსმა მხოლოდ შვიდი ქულით მოუგო ქართველებსო.

ერთი სიტყვით, ამ მატჩის წაგებით არაფერი დამთავრებულა. რომ მოგვეგო, არც მაშინ შეიცვლებოდა დიდად რამე. მთავარია, გუნდი განვითარების სწორ გზას დაადგეს და მიზანი მიღწეული იქნება. თავის დროზე რუმინეთსაც ვერ ვუგებდით. ის იყო ჩვენი რუბიკონი. ახლა იტალიაა.

მერაბ შარიქაძე, საქართველოს ნაკრების კაპიტანი:
"ძალიან რთული მატჩი იყო. იტალიელებმა კარგად ითამაშეს. წაგების მიზეზი ის იყო, რომ ჩვენი შესაძლებლობები ვერ გამოვიყენეთ. ვიცოდით, რომ ასეთ მატჩში შანსის გაფლანგვის ფუფუნება არ გვექნებოდა, მაგრამ მაინც გავფლანგეთ. გულშემატკივრებს ბოდიშს ვუხდი, რომ ვერ გავახარეთ და მადლობა მინდა გადავუხადო მათ, რომ ამხელა გზაზე ჩამოვიდნენ და ბოლომდე გვიქომაგეს".

მსოფლიოს თასზე ჩვენი ნაკრების მეტოქეებიდან უმთავრესმა კონკურენტმა, ფიჯის ნაკრებმა ედინბურგში შოტლანდიასთან დიდი ანგარიშით 17:54 წააგო. უელსი და ავსტრალია კი, ერთმანეთს კარდიფში, "პრიციპალიტი სთედიუმზე" დაუპირისპირდნენ. "წითელმა ურჩხულებმა" "ვოლაბებს" უმძიმეს ბრძოლაში 9:6 სძლიეს. ნოემბრის ტესტებზე ჩვენმა მომავალმა მეტოქემ. სამოას ნაკრებმა ნეიტრალურ მოედანზე აშშ-ის ეროვნულ გუნდთან 29:30 წააგო.
გაიმართა "რაგბი ევრპის ჩემპიონატის" დასარჩენი პლეი ოფის მატჩი. რუმინეთის ნაკრებმა პორტუგალიის ეროვნულ გუნდს უმასპინძლა და 36:6 სძლია. მომავალ წელს ამ შეჯიბრებაში ჩვენი მეტოქე ისევ რუმინელები იქნებიან.

ტესტები

რუმინეთი-პორტუგალია 36:6
შოტლანდია-ფიჯი 54:17
ინგლისი-ახ. ზელანდია 15:16
უელსი-ავსტრალია 9:6
აშშ-სამოა 30:29
ირლანდია-არგენტინა 28:17
საფრანგეთი-სამ. აფრიკა 26:29
რუსეთი-ნამიბია 47:20
ბრაზილია-მაორები 3:35

ყოველდღიური სპორტული გაზეთი "ლელო"
1190
მკითხველის კომენტარები / 0 /
მსგავსი ამბები
რუბრიკის სხვა სიახლეები
;