ბორჯღალოსნები. მერაბ შარიქაძე: ესაა ჩვენი პროგრესის გასაღები!

"მსოფლიო რაგბის" ოფიციალურ ვებგვერდზე ვიდეორგოლი გამოქვეყნდა, რომელშიც საქართველოს ნაკრების მორაგბეები შალვა მამუკაშვილი, დავით კაჭარავა და მერაბ შარიქაძე ჩვენი ეროვნული გუნდის პერსპექტივაზე საუბრობენ.

გთავაზობთ ამონარიდებს ამ ვიდეოსიუჟეტიდან:

შალვა მამუკაშვილი, საქართველოს ნაკრების შერკინების კვაჭი:

"საქართველოს ნაკრებში თამაში ნებისმიერი ქართველი მორაგბისთვის ოცნებაა, მერე კი, ყველაზე დიდი მიღწევა, რაც შეიძლება გქონდეს კარიერაში. ეს ასევე უდიდესი პასუხისმგებლობა და პატივია - წარმოადგინო შენი ქვეყანა.

ჩვენ პირველი დონის გუნდებთან თამაშის შესაძლებლობა აქამდე მსოფლიოს თასზე თუ გვეძლეოდა. ახლა, უკვე რამდენიმე წელიწადია, ყოველ ნოემბერში გვაქვს მათთან თამაში. ეს არის ყველაზე დიდი შანსი, რაც შეიძლება გამოიყენოს მეორე დონის ქვეყანამ განსავითარებლად.

თუ ასეთი ტენდენციით გაგრძელდება რაგბის განვითარება საქართველოში, როგორც ეს ბოლო წლებშია, რამდენიმე წელიწადში საქართველოს ნაკრები ძალიან ანგარიშგასაწევი ძალა იქნება პირველი დონის ქვეყნებისთვისაც."

მერაბ შარიქაძე, საქართველოს ნაკრების კაპიტანი:

"თუ არ გვექნება შესაძლებლობა, პირველი დონის გუნდებთან ვითამაშოთ, პროგრესიც არ გვექნება. ეს არის მთავარი გასაღები ჩვენი პროგრესის. თუ ეთამაშები ყოველთვის შენზე სუსტს, თუნდაც შენნაირს, ვერ განვითარდები. უფრო ძლიერებს რომ ეთამაშები, ძალაუნებურად სწავლობ, სთხოვ, ავალდებულებ შენს თავს უკეთესად მოემზადო, ითამაშო. თუ უფრო მეტჯერ შეგვახვედრებენ პირველი დონის ქვეყნებს, ძალიან კარგი იქნება.

არგენტინასთან მატჩში დავამტკიცეთ, რომ ჩვენც შეგვიძლია მოედანზე სანახაობრივი რაგბის თამაში. შოტლანდიასთან თამაშმა კი ის გვასწავლა, რამდენად მნიშვნელოვანია საკუთარი თავის რწმენა. მეორე ტაიმში ბევრად უკეთესად ვითამაშეთ და ამ ტაიმის ანგარიშში სხვაობა, თუ არ ვცდები, მხოლოდ ერთი ქულა იყო მასპინძლების სასარგებლოდ."

დავით კაჭარავა, საქართველოს ნაკრების შუამარბი:

"დღესდღეობით საქართველოში რაგბი ძალიან პოპულარულია. ბევრი მაყურებელი გვყავს და შესაბამისად პასუხისმგებლობაც დიდია. ვფიქრობ, რომ პირველ ხანებში უფრო მარტივ, ძველებური სტილის რაგბის ვთამაშობდით. ახლა ჩვენი თამაში განვითარდა, ყოველ შემთხვევაში, ვცდილობთ, უფრო სანახაობრივი რაგბი ვითამაშოთ.

რაგბიც ზოგადად განვითარდა, უფრო მეტად ფიზიკური და სწრაფი გახდა. აქედან გამომდინარე, ჩვენთვის რთული გამოდგა დავწეოდით მოწინავე სარაგბო ქვეყნებს, მაგრამ თუ სტატისტიკას გადავხედავთ და ჩვენს წარმატებულ თამაშებს გავითვალისწინებთ, ვფიქრობ, ეროვნულმა ნაკრებმა წინსვლა განიცადა.

ჩვენი ნაკრები პირველი და მეორე დონის ქვეყნების ზღვარზეა, ამას სტატისტიკაც ამტკიცებს. აქედან გამომდინარე, იმედი გვაქვს, რომ მალე პირველი დონის გუნდებთან უფრო ხშირად, სისტემატიურად გვათამაშებენ."

ყოველდღიური სპორტული გაზეთი "ლელო"
1415
მკითხველის კომენტარები / 0 /
მსგავსი ამბები
რუბრიკის სხვა სიახლეები
;