ბორჯღალოსნები: ნოემბრის სერიას ნეკერჩხლის ფოთლებით ვიწყებთ

* 11 ნოემბრის ტესტის წინ საქართველოსა და კანადის ნაკრებების თავკაცებმა შემადგენლობები დაასახელეს.
* კანადასთან მატჩის განაცხადში ორი დებიუტანტია - მირიან მოდებაძე და გიორგი კვესელაძე.
* მილტონ ჰეიგი აგრძელებს ექსპერიმენტებს უკანა ხაზში.
* საქართველოს ნაკრების ყველაზე გამოცდილი მორაგბე მერაბ კვირიკაშვილი მატჩის განაცხადში არ არის.

ხვალ, 11 ნოემბერს, საქართველოს ნაკრები ეროვნულ სტადიონზე ნოემბრის ტესტების პირველ მატჩს კანადის ეროვნულ გუნდთან გამართავს. თამაში 18:00 საათზე დაიწყება.

"ბორჯღალოსნების" მთავარმა მწვრთნელმა გუშინ გამართული ღია ვარჯიშის შემდეგ საბრძოლო რაზმი დაასახელა. მილტონ ჰეიგმა 23-კაციან განაცხადში ორი დებიუტანტი ჩართო. მათ შორის ერთ-ერთი, ქუთაისის "აიას" ფულბეკი მირიან მოდებაძე გარემარბის პოზიციაზე ძირითად შემადგენლობაში იქნება. მან საქართველოში წლეულს გამართულ მსოფლიოს ახალგაზრდულ ჩემპიონატში ჩვენი ქვეყნის 20-წლამდელთა ნაკრებშიც ითამაშა. თუმცა, იქ ფულბეკი იყო.

მეორე დებიუტანტი ასევე ახალგაზრდული ნაკრების წევრი, მარნეულის "არმაზის" შუამარბი გიორგი კვესელაძეა, რომელიც თადარიგშია. მას გარემარბადაც შეუძლია თამაში. ფულბეკის პოზიციას თბილისის "კადემიას" ლიდერი სოსო მათიაშვილი დაიკავებს და, სავარაუდოდ, დამრტყმელიც ის იქნება. ამ პოზიციაზე მოთამაშე, ყველაზე გამოცდილი "ბორჯღალოსანი" მერაბ კვირიკაშვილი კი განაცხადში არ არის.

გუნდს დაუბრუნდა კიდევ ერთი გამოცდილი მორაგბე, ოთხი მსოფლიოს თასის გათამაშებამოვლილი გიორგი ჩხაიძე, რომელიც მეორე ხაზში ითამაშებს. მას აქამდე 97 კეპი მოუხვეჭია და დიდი შანსი აქვს, ცენტურიონი გახდეს. ჩხაიძე თადარიგში იქნება.

გარემარბად ითამაშებს რუსთავის "ხარების" ერთ-ერთი წამყვანი მორაგბე გიორგი კოშაძე, რომელსაც არანაკლები წარმატებით შუამარბადაც შეუძლია გაისარჯოს.

ერთი სიტყვით, მილტონ ჰეიგი უკანა ხაზში ექსპერიმენტებს განაგრძობს. აქ ჯერ კიდევ ბევრი რამაა გასარკვევი და ბევრს აქვს დასამტკიცებელი, რომ ეროვნული ნაკრების ძირითადის მოთამაშეა.

სრულიად განსხვავებული მდგომარებაა შერკინებაში. აქ ძირითადი ბირთვი გამოკვეთილია. ჩვენს მორკინალებს არც გამოცდილება აკლიათ და არც სახელი. "ბორჯღალოსანთა" წინა ხაზი მსოფლიოს ერთ-ერთ საუკეთესო შერკინებადაც ტყუილად არ უღიარებიათ.

* * *

საბრძოლო რაზმი დაასახელა კანადელთა უელსელმა მთავარმა მწვრთნელმა კინგსლი ჯონსმაც. გასულ უქმეებზე კანადელებმა ახალი ზელანდიის მაორებთან შინ 9:51 წააგეს. ამ მატჩის შემადგენლობიდან ჯონსმა შვიდი მორაგბე შეცვალა. მან პირველ ხაზში ორივე ბურჯი გამოცვალა. ძირითად შემადგენლობაში "ბორჯღალოსნების" წინააღმდეგ ჯუსტის სიარს-დურუ და ჯეკ აილნიკი ითამაშებენ.

მეორე ხაზში ჯოშ ლარსენს "ნიუკასლის" მორაგბე ევან ოლმსტედი შეუწყვილდება. ერთი ცვლილებაა მესამე ხაზშიც. ფლანკერ დასტინ დობრავსკის ლუკას რამბელი შეცვლის.

უკანა ხაზში ორივე შუამარბი გამოიცვალა. გამოცდილ დი ტი ეიჩ ფანდერმერვს აქ კირან ჰიმი შეუწყვილდება. გარემარბის პოზიციას კი, ტეილორ პარისი დაიკავებს.

ცოტა რამ ისტორიიდან

კანადის რაგბის კავშირი ოფიციალურად 1929 წელს დაარსდა. ამ ქვეყნის ნაკრებმა პირველი შეხვედრა 1932 წლის 31 იანვარს იაპონიასთან გამართა და 8:9 დამარცხდა.

კანადური რაგბის აღმასვლა 1987 წლიდან დაიწყო. ის ერთ-ერთი იყო იმ 16 გუნდს შორის, რომლებიც IRB-მა ავსტრალიასა და ახალ ზელანდიაში გამართულ პირველ მსოფლიოს თასზე მიიწვია. ჩრდილოამერიკელები ჯგუფში უელსის, ირლანდიის და ტონგის ნაკრებებთან მოხვდნენ და მსოფლიოს თასზე თავის პირველ შეხვედრაში პირველი გამარჯვება მოიპოვეს. მათ ტონგა 37:4 დაამარცხეს, მაგრამ ირლანდიასთან და უელსთან დამარცხდნენ და ჯგუფში მხოლოდ მე-3 ადგილი დაიკავეს.

1991 წლის მსოფლიოს თასზე მოსახვედრად კანადას საკვალიფიკაციო ეტაპის გავლამ მოუწია, მაგრამ ის ადვილად გადალახა. ფინალურ სტადიაზე კი, ჯგუფში საფრანგეთთან, რუმინეთთან და ფიჯისთან მოხვდა. კანადამ რუმინეთი და ფიჯი დაამარცხა, საფრანგეთთან მცირედით 13:19 დამარცხდა და მეოთხედფინალში გავიდა. აქ კი, ახალ ზელანდიასთან ვერას გახდა - 13:29.

კანადელებმა ყველა მსოფლიოს თასზე ითამაშეს. ჯგუფიდან მხოლოდ ერთხელ გავიდნენ. ყველაზე ცუდი შედეგი კი, "ნეკერჩხლის ფოთლებმა" ინგლისში გამართულ 2015 წლის მსოფლიოს თასზე აჩვენეს. ჯგუფში კანადელები ოთხივე მატჩში დამარცხდნენ. მათ შორის რუმინეთის ნაკრებთან, რომელსაც მსოფლიოს თასზე იქამდე არასდროს მოეგო.

შეგახსენებთ, რომ საქართველოსა და კანადის ნაკრებებს აქამდე ერთმანეთთან ექვსჯერ უთამაშიათ. სამჯერ "ბორჯღალოსნებმა" მოიგეს. ამდენჯერვე "ნეკერჩხლის ფოთლებმა" გაიმარჯვეს.

საქართველო-კანადა
საქართველო: 15. სოსო მათიაშვილი, 14. გიორგი კოშაძე, 13. დავით კაჭარავა, 12. მერაბ შარიქაძე, 11. მირიან მოდებაძე, 10. ლაშა ხმალაძე, 9. ვასილ ლობჟანიძე; 1. მიხეილ ნარიაშვილი, 2. ჯაბა ბრეგვაძე, 3. ლევან ჩილაჩავა, 4. კონსტანტინე მიქაუტაძე, 5. გიორგი ნემსაძე, 6. ლაშა ლომიძე, 7. ვიქტორ კოლელიშვილი, 8. ბექა ბიწაძე;
სათ: 16. შალვა მამუკაშვილი, 17. კარლენ ასეიშვილი, 18. სოსო ბეკოშვილი, 19. გიორგი ჩხაიძე, 20. გიორგი თხილაიშვილი, 21. გიორგი ბეგაძე, 22. რეზო ჯინჭველაშვილი, 23. გიორგი კვესელაძე
კანადა: 15. ენდრიუა კოე, 14. ბრუკ სტელერი, 13. დი ტი ეიჩ ფან დერ მერვე, 12. კირან ჰიმი, 11. ტეილორ პარისი, 10. პატრიკ პერფერი, 9. ფილ მაკი; 1. ჯუსტის სიარს-დურუ, 2. რეი ბერკვილი, 3. ჯეკ აილნიკი, 4. ჯოშ ლარსენი, 5. ევან ოლმსტედი, 6. ლუკას რამბელი, 7. მეთ ჰიტონი, 8. ტაილერ არდრონი
სათ: 16. ერიკ ჰოვარდი, 17. ენტონი ლუკა, 18. კოლი ქისი, 19, კაილი ბეილი, 20. კონორ კეისი, 21. კაილი გილმური, 22. ენდრიუ ფერგიუსონი, 23. ჯუზეპე დუ ტუა
მსაჯი: ბენ უათჰაუზი (უელსი)

კანადის მერე...

ისე მოხდა, რომ 2019 წლის მსოფლიოს თასის გათამაშებაში ჩვენი ნაკრების მეტოქეები, უელსი და ავსტრალია ტესტების პირველივე მატჩში ხვდებიან ერთმანეთს.

უელსელებს საკადრო პრობლემები აქვთ, თუმცა მაინც იმედიანად არიან. "წითელი ურჩხულების" ახალზელანდიელმა თავკაცმა უორენ გეთლენდმა შემადგენლობაში სამი ისეთი მორაგბე შეიყვანა, რომლებსაც "პრისიპალიტი სთედიუმზე" ეროვნულ ნაკრებში დებიუტი ექნებათ. ესენია: ოუენ უილიამსი, სტეფ ევანსი და ჯოშ ნავიდი.

გუნდს დაუბრუნდა კაპიტანი, მეორეხაზელი ალან ვინ ჯოუნსი. სათადარიგოთა შორის კი სამი დებიუტანტია, ლეონ ბრაუნი, სემ კროსი და ოუენ უოტკინი.

"ვოლაბები", "წითელი ურჩხულებისგან" განსხვავებით, ამ მატჩს ოპტიმალური შემადგენლობით ხვდებიან. გუნდს დაუბრუნდნენ მგეზავი ბერნარ ფოლი და ცხრა ნომერი ვილი გენია, რომლებსაც გასულ უქმეებზე იაპონიასთან მატჩში მონაწილეობა არ მიუღიათ.

უელსი-ავსტრალია
უელსი: 15. ლი ჰალპფენი, 14. ლიამ უილიამსი, 13. ჯონათან დევისი, 12. ოუენ უილიამსი, 11. სტეფ ევანსი, 10. დენ ბიგარი, 9. გარეტ დევისი; 1. რობ ევანსი, 2. კენ ოუენსი, 3. ტომას ფრენსისი, 4. ჯეკ ბეილი, 5. ალან ვინ ჯოუნსი, 6. აარონ შინგლერი, 7. ჯოშ ნავიდი, 8. ტაულუპე ფალეტაუ
სათ: 16. კრისტიან დესი, 17. ნიკი სმითი, 18. ლეონ ბრაუნი, 19. კორი ჰილი, 20. სემ კროსი, 21. ალედ დევისი, 22. ოუენ უოტკინი, 23. ალემ ამოსი.
ავსტრალია: 15. კარტლი ბეილი, 14. მარიკა კოროიბეტე, 13. ტევიტა კურიდრანი, 12. სამუ კერევი, 11. რის ჰოგი, 10. ბერნარ ფოლი, 9. ვილი გენია; 1. სკოტ სიო, 2. ტატაფუ პოკლოტა-ნაუ, 3. სეკოპე კეპუ, 4. რობ საიმონსი, 5. ადამ კოლემანი, 6. ნედ ჰანიგანი, 7. მაიკლ ჰუპერი, 8. შონ მაკმაჰონი.
სათ: 16. სტივენ მური, 17. ტომ რობერტსონი, 18. ალან ალაალატოა, 19. მეთ ფილიპი, 20. ბენ მაკკალმენი, 21. ნიკ ფიპსი, 22. კარმაიკლ ჰანტი, 23. ჰენრი სპისი.

ყოველდღიური სპორტული გაზეთი "ლელო"
579
მკითხველის კომენტარები / 0 /
მსგავსი ამბები
რუბრიკის სხვა სიახლეები