[VIDEO] ბორჯღალოსნები. გერმანია დავალელოვეთ - 52:3!

საქართველოს მორაგბეთა ნაკრებმა რაგბი ევროპის ჩემპიონატზე გერმანიას უმასპინძლა. შეხვედრა ქუთაისში, "აიას მოედანზე" გაიმართა. 

მილტონ ჰეიგის გაწვრთნილმა საქართველომ აქცენტი მაღალ სისწრაფეზე გააკეთა. ეს ერთგვარი მოულოდნელობის ეფექტი იყო გერმანელებისთვის, რომლებიც ალბათ ფიქრობდნენ, რომ ჩვენი გუნდი პირველხაზელებით მოლდამოლ შეუტევდა. თუმცა "ბორჯღალოსნები" ბურთს მშვენივრად შლიდნენ, მოედნის მარცხენა ფრთიდან მარჯვნივ ელვის სისწრაფით გადაჰქონდათ. 

შედეგი: მატჩის დაწყებიდან წუთნახევარში მირიან მოდებაძემ მარჯვენა ფრთიდან გაიტანა ლელო, ხოლო მეხუთე წუთზე იგივე გაიმეორა ლაშა ხმალაძემ, ოღონდ მარცხნიდან...

მე-8 წუთზე იყო ყველაზე დასამახსოვრებელი მომენტი გერმანელებისთვის: ჰილსენბენკმა საჯარიმო დარტყმით ანგარიში დაასველა - 15:3.

22-ე წუთზე შალვა მამუკაშვილმა უკვე ქართული ტიპის ლელო გაიტანა - მოლიდან მიძალების შედეგად. სამივე შემთხვევაში გარდასახვა ზუსტად შეასრულა გელა აფრასიძემ - 21:3. პირველი ტაიმიც ასე დასრულდა.

რაგბში ასეა - კლასი მეორე ტაიმში ჩნდება, შეიძლება თავიდან შედარებით სუსტმა მეტოქემ ფავორიტს წინააღმდეგობა გაუწიოს, მაგრამ დასკვნით მომენტში ძალა აღარ ჰყოფნის, რომ ბოლომდე დაუდგეს.

მეორე ტაიმში საქართველოს უპირატესობა კიდევ უფრო გამოიკვეთა და ლელოს ლელო მოჰყვა: ჯერ მალაღურაძემ გაჭრა მეტოქის ხაზი, შემდეგ მოდებაძემ შეიფრინა ორჯერ მეტოქის ჩათვლის ხაზში.

მე-60 წუთზე უკვე ლობჟანიძემ გაიტანა ლელო, 75-ზე შარიქაძემ და მათიაშვილის ორი გარდასახვის შემდეგ ანგარიშში 49-ქულიანი საფინალო სხვაობა დაფიქსირდა - 52:3.

1336
მკითხველის კომენტარები / 0 /
მსგავსი ამბები
რუბრიკის სხვა სიახლეები
;