ბორჯღალოსნებმა 2017 წელი აშშ-ის ნაკრების ძლევით დაასრულეს

25 ნოემბერს, საქართველოს მორაგბეთა ეროვნულმა ნაკრებმა წლის ბოლო, ნოემბრის ტესტ-სერიის მესამე შეხვედრა აშშ-ის ნაკრებთან გამართა და უაღრესად დაძაბულ ბრძოლაში, ანგარიშით 21:20 გაიმარჯვა.

თბილისში, მიხეილ მესხის სახელობის სტადიონზე პირველი ტაიმი "ბორჯღალოსნებმა" ანგარიშით  21:12 მოიგეს.

შესვენებამდე ამერიკელებმა ორი ლელოს დადება მოახერხეს, საიდანაც ერთი გარდასახეს. ამას მილტონ ჰეიგის გუნდმა სამი ლელოთი უპასუხა. "ბორჯღალოსნებმა" მე–17 წუთზე საჯარიმო ლელო მიითვალეს, 30–ე წუთზე ლევან ჩილაჩავამ გაიტანა, 39–ზე კი – ჯაბა ბრეგვაძემ. ორივე ჯერზე სოსო მათიაშვილმა გარდასახა. ტაიმი საქართველოს ნაკრებმა კაცნაკლულმა ჩაამთავრა – მსაჯმა ჩილაჩავა გაასინბინა.

შესვენების შემდეგ, 59–ე წუთზე ამერიკელმა "არწივებმა" საჯარიმო გაიტანეს, 62–ე წუთზე კი იმავეს გაკეთება მათიაშვილმა ვერ მოახერხა. მალევე სტუმრები კაცნაკლულნი დარჩნენ, თუმცა "ბორჯღალოსნებმა" ამით ვერ ისარგებლეს.

მატჩის კულმინაცია ბოლო წუთებზე დადგა. 78–ე წუთზე ამერიკელებმა ლელო დაგვიდეს, თუმცა საბედნიეროდ, გარდასახვა ვერ მოახერხეს. შედეგად, საქართველოს ნაკრებმა მინიმალური სხვაობით გაიმარჯვა – 21:20.

ამ მატჩში საქართველოს ეროვნული ნაკრების მაისური მეასედ მოირგო გიორგი ჩხაიძემ. ის "ბორჯღალოსნებში" მესამე ცენტურიონი გახდა, მერაბ კვირიკაშვილისა და დავით კაჭარავას შემდეგ.

შეგახსენებთ, რომ ნოემბრის ტესტ-სერიის პირველ შეხვედრაში "ბორჯღალოსნებმა" თბილისში კანადის ნაკრები დაამარცხეს (54:22), მეორე მატჩი კი სტუმრად უელსთან ანგარიშით 6:13 დათმეს.

"ბორჯღალოსნებმა" აშშ-ის ნაკრებთან ამ შემადგენლობით ითამაშეს: 15. მერაბ კვირიკაშვილი, 14. სოსო მათიაშვილი/გიორგი კოშაძე, 13. მერაბ შარიქაძე, 12. გიორგი კვესელაძე, 11. მირიან მოდებაძე, 10. რეზო ჯინჭველაშვილი, 9. ვასილ ლობჟანიძე, 1. მიხეილ ნარიაშვილი, 2. ჯაბა ბრეგვაძე, 3. ლევან ჩილაჩავა, 4. გიორგი ჩხაიძე, 5. კონსტანტინე მიქაუტაძე, 6. შალვა სუთიაშვილი, 7. ვიქტორ კოლელიშვილი, 8. ბექა ბიწაძე
სათადარიგოები: 16. შალვა მამუკაშვილი, 17. ზურაბ ჟვანია, 18. სოსო ბეკოშვილი, 19. გიორგი ნემსაძე, 20. ლაშა ლომიძე, 21. გიორგი თხილაიშვილი, 22. გელა აფრასიძე, 23. ლაშა მალაღურაძე.

919
მკითხველის კომენტარები / 0 /
მსგავსი ამბები
რუბრიკის სხვა სიახლეები