'ბორჯღალოსნებს' იტალიაში ათასობით ქართველი უქომაგებს

ნოემბრის ტესტების დაწყებამდე ერთი თვეღა დარჩა. საქართველოს რაგბის კავშირმა და თიბისი-მ ერთობლივად ჯერ კიდევ შარშან ჩაუყარეს ტრადიციას საფუძველი. წელსაც, მოწინავე სარაგბო ქვეყნების მსგავსად, საქართველოს ნაკრების ნოემბრის ტესტმატჩებს "თიბისი რაგბის სერია" ეწოდება.

საქართველოს ნაკრები სერიის პირველ მატჩში სტუმრად, 10 ნოემბერს, ფლორენციაში, "არტემიო ფრანკის" სტადიონზე იტალიის ეროვნულ გუნდს ეთამაშება.
17 ნოემბერს, თბილისში "თიბისი რაგბის სერიის" პირველი საშინაო მატჩი გაიმართება, რომელშიც "ბორჯღალოსნები" სამოას უმასპინძლებენ, ხოლო 2018 წლის "თიბისი რაგბის სერიის" ბოლო მატჩში, საქართველოს ნაკრები ტონგას 24 ნოემბერს შეხვდება.

ნინო ეგაძე, თიბისის მარკეტინგის დირექტორი:
"დღეს განსაკუთრებული დღეა. "თიბისი რაგბის სერიის" დაწყებამდე ერთი თვე დარჩა და გულშემატკივარმა დღეების ათვლა დაიწყეს. თიბისი-სა და რაგბის კავშირის მეგობრობა წლებს ითვლის და ნოემბრის ტესტების თიბისი-ს ეგიდით ჩატარება უკვე ტრადიციად იქცა.

იტალიისა და საქართველოს ნაკრებების შეხვედრას ყველა მოუთმენლად ელოდება და ჩვენც განსაკუთრებულად ვემზადებით. თიბისი იტალიისკენ დაახლოებით 1 000-კაციანი დელეგაციით მიემგზავრება. ვიცით, რომ ფლორენციაში კიდევ რამდენიმე ათასი ქართველი იქნება და, ვფიქრობ, ის დიდი მუხტი, რომელიც ტრიბუნებზე შეიქმნება, აუცილებლად დაეხმარება ჩვენს გუნდს".

გოჩა სვანიძე, საქართველოს რაგბის კავშირის პრეზიდენტი:
"თიბისი ბანკი ჩვენი საიმედო პარტნიორია და ეს მეგობრობა წლებია გრძელდება. "თიბისი რაგბის სერია", რომელიც შარშან დაიწყო, ტრადიციად იქცა. ჩვენ ამ მეგობრობას პასუხი გამარჯვებებით უნდა გავცეთ.

საქართველოსა და იტალიის ნაკრებების შეხვედრას არა მხოლოდ საქართველოში, მთელ მსოფლიოში ელიან. გველის ორი საშინაო თამაში საქართველოში. ადგილი ჯერ დაზუსტებული არაა და არაა გამორიცხული, რომ ეროვნული ნაკრების მატჩების გამართვის გეოგრაფია გავზარდოთ. ნოემბრის ტესტებს მობილიზებული ვხვდებით და დანარჩენი მოედანზე გამოჩნდება."

მილტონ ჰეიგი, საქართველოს ნაკრების მთავარი მწვრთნელი:
"თიბისი რაგბის სერია" მნიშვნელოვანია როგორც სპორტული, ასევე ჩვენი ურთიერთობის გაგრძელების კუთხით. მთელი ნაკრების სახელით მინდა მადლობა გადავუხადო თიბისი-ს, როგორც მეგობარსა და პარტნიორს. წინ გველის მატჩი იტალიასთან და ორი ძალიან მნიშვნელოვანი შეხვედრა საკუთარ მოედანზე. ზაფხულის ტესტებზე კარგად ვერ გამოვიყურებოდით და მნიშვნელოვანია, რომ მომავალი თამაშები შინ, სამოასთან და ტონგასთან მაღალ დონეზე ჩავატაროთ".

ყოველდღიური სპორტული გაზეთი "ლელო"
539
მკითხველის კომენტარები / 0 /
მსგავსი ამბები
რუბრიკის სხვა სიახლეები