ბორჯღალოსნებს მამუკა გორგოძე შეუერთდა და იაპონიაში ჩაფრინდნენ [დახვედრის VIDEO]

საქართველოს ნაკრები შოტლანდიასთან გამართული მატჩის შემდეგ იაპონიაში გაემგზავრა. ჩვენი გუნდი ამომავალი მზის ქვეყანაში გუშინ ჩავიდა. "ბორჯღალოსნებს" გზად, ლონდონში ლეგენდარული ქართველი მორაგბე მამუკა გორგოძე შეუერთდა, რომელიც მსოფლიოს თასზე ნაკრების შემადგენლობაში ითამაშებს.

მილტონ ჰეიგის სამწყსოს იაპონიაში ჩასვლისთანავე მასპინძლებმა დახვედრა მოუწყვეს. ჩვენს გუნდს აეროპორტში იაპონიაში საქართველოს ელჩი თეიმურაზ ლეჟავა და საელჩოს სხვა თანამშრომლებიც დახვდნენ.

"ბორჯღალოსნები" მსოფლიოს თასისთვის მზადებას ადგილზე განაგრძობენ. 18 სექტემბერს "მსოფლიოს რაგბი" და შეჯიბრების ორგანიზატორები ჩვენს გუნდს ოფიციალურ მიღებას, "ველქამ ფართის" გაუმართავენ.

პირველ მატჩს საქართველოს ნაკრები 23 სექტემბერს უელსის ნაკრებთან გამართავს, რომელსაც არა მარტო ჯგუფიდან გასვლის, არამდე სულაც მსოფლიოს თასის მოგების ამბიცია აქვს. "წითელი ურჩხულები" სულ ახლახან მსოფლიოს კალსიფიკაციაში პირველ ადგილზე იყვნენ. ირლანდიასთან ზედიზედ ორი მარცხის შემდეგ კი, მეხუთე საფეხურამდე დაქვეითდნენ.

მომდევნო მეტოქე 29 სექტემბერს ურუგვაის ნაკრებია, რომელიც მსოფლიოს კლასიფიკაციაში მე-19 ადგილზეა. წესით ურუგვაელები კბილებს მხოლოდ ჩვენთან მოგებაზე უნდა ილესავდნენ. შესაბამისად, სამხრეთამერიკელებთან მძიმე ბრძოლა გველის. ამასთან ერთად, "ბორჯღალოსნებს" 2003 წლის მსოფლიოს თასზე მარცხის გამო რევანში აქვს ასაღები.

3 ოქტომბერს საქართველოს ნაკრებს ყველაზე მნიშვნელოვანი მატჩი აქვს გასამართი ფიჯის ნაკრებთან, რომელიც ამჟამად რეიტინგში მე-9 ადგილზეა. კუნძულელებს მიზნად ჯგუფიდან გასვლა აქვთ განზრახული. საამისოდ მათ ჩვენც უნდა დაგვამარცხონ და ავსტრალია-უელსიდან ერთ-ერთი.

ჯგუფური ეტაპის ბოლო მატჩს "ბორჯღალოსნები" 11 ოქტომბერს ავსტრალიის ნაკრებთან გამართავენ. "ვოლაბები" მსოფლიოს თასის ორგზის მფლობელები არიან. წინა, 2015 წლის მსოფლიოს თასზე კი, ფინალი დათმეს ახალ ზელანდიასთან. ეს ყოველივე ნათლად მეტყველებს რა დონისა და ამბიციის გუნდთან მოგვიწევს პაექრობა. ავსტრალიის ნაკრები ამჟამად მსოფლიოს რეიტინგში მე-6 ადგილზეა.

საქართველოს ნაკრები
პირველი ხაზი: მიხეილ ნარიაშვილი (მონპელიე), გურამ გოგიჩაშვილი (რასინგი), ჯაბა ბრეგვაძე (სანვულვზი), შალვა მამუკაშვილი (ენისეი), ვანო კარკაძე (ბრივი), ლევან ჩილაჩავა (მონპელიე), ბექა გიგაშვილი (ტულონი), გიორგი მელიქიძე (სტად ფრანსე)
მეორე ხაზი: კონსტანტინე მიქაუტაძე (მონპელიე), გიორგი ნემსაძე (აია), შალვა სუთიაშვილი (ანგულემი), მამუკა გორგოძე (ტულონი)
მესამე ხაზი: გიორგი თხილაიშვილი (ბათუმი), ბექა გორგაძე (ბორდო), ოთარ გიორგაძე (ბრივი), ბექა საღინაძე (ორიაკი), ლაშა ლომიძე (დონკასტერი)
#9: გელა აფრასიძე (მონპელიე), ვასილ ლობჟანიძე (ბრივი), გიორგი ბეგაძე (ლოკომოტივი)
#10: თედო აბჟანდაძე (ბრივი), ლაშა მალაღურაძე (ვვა)
#12-13: მერაბ შარიქაძე (ორიაკი), დავით კაჭარავა (ენისეი), თამაზ მჭედლიძე (რუანი), გიორგი კვესელაძე (არმაზი)
#11-14: მირიან მოდებაძე (აია), ალექსანდრე თოდუა (ბათუმი), ზურაბ ძნელაძე (ლოკომოტივიი)
#15: სოსო მათიაშვილი (ლელო), ლაშა ხმალაძე (ბათუმი)

მსოფლიოს თასი
A ჯგუფი: ირლანდია, შოტლანდია, იაპონია, რუსეთი, სამოა
B ჯგუფი: ახ. ზელანდია, სამ. აფრიკა, იტალია, ნამიბია, კანადა
ჩ ჯგუფი: ინგლისი, საფრანგეთი, არგენტინა, აშშ, ტონგა
D ჯგუფი: ავსტრალია, უელსი, საქართველო, ფიჯი, ურუგვაი

23 სექტემბერი
საქართველო-უელსი
29 სექტემბერი
საქართველო-ურუგვაი
3 ოქტომბერი
საქართველო-ფიჯი
11 ოქტომბერი
საქართველო-ავსტრალია

898
მკითხველის კომენტარები / 0 /
მსგავსი ამბები
რუბრიკის სხვა სიახლეები
;