ბუდაპეშტში ჩემპიონები გვერგო - დღეს 'დიდი პრიზის' ტურნირი იწყება

დღეს ბუდაპეშტში სტარტს აიღებს ძიუდოისტთა „დიდი პრიზის“ ტურნირი, რომელშიც საქართველოს ვაჟთა ნაკრები არასრული შემადგენლობით გამოვა:

მხოლოდ 8 სპორტსმენით ვიასპარეზებთ, ორ წონაში საერთოდ არ გვეყოლება მონაწილე, ქალებში კი ერთი წარმომადგენლით გამოვალთ. ვაჟებში ჯაბა პაპინაშვილი, თემურ ნოზაძე (ორივე - 60), ტატო გრიგალაშვილი (81), ბექა ღვინიაშვილი, ავთანდილ ჭრიკიშვილი (ორივე - 90), გიორგი ბერიაშვილი (100), ონისე ბუღაძე და გელა ზაალიშვილი (ორივე - +100) გამოვლენ, ხოლო ქალებში ტატიანა ლევიცკა-შუკვანი (52) იჭიდავებს. 

პარასკევი
დღეს ჩვენგან 60 და 52 კილოგრამების წარმომადგენლები იასპარეზებენ. ნოზაძე ჯგუფში ყაზახთა მსოფლიოს ჩემპიონ იელდოშ სმეტოვთან მოხვდა, თუმცა მასთან დაჭიდება მერვედფინალამდე არ მოუწევს, იქამდე მისასვლელად კი ჯერ პორტუგალიელი გონცალო მანსიმო უნდა დაამარცხოს, ხოლო შემდეგ - უზბეკი კამრან ნურიალევიც. 

პაპინაშვილი პირველ წრეში ისვენებს, მისი პირველი მეტოქე კი ძიუდოს საერთაშორისო ფედერაციის დროშით მოჭიდავე მოჰამად ლოტფი ხედერისა და ბრაზილიელი იტალო კარვალოს პაექრობაში გამოვლინდება. მსოფლიოს ჩემპიონი პაპინაშვილსაც ჰყავს ჯგუფში - მონღოლი ბოლდბაატარ განბატი, ვისაც მერვედფინალში შეიძლება შეხვდეს. თუმცა იმავე ეტაპზე სავარაუდო მეტოქეთა შორის რუსთა ქართველი იაგო აბულაძე და ბულგარელი იანისლავ გერჩევიც არიან. რეიტინგით ამ ჯგუფის ფავორიტი ესპანელი ევროპის მედალოსანი ფრანსისკო გარიგოსია. ამათგან პაპინაშვილი გერჩევს ჯერ არ შეხვედრია, გარიგოსთან და განბატთან თითოჯერ იჭიდავა და წააგო, ხოლო აბულაძესთან თითო მოგება-წაგება აქვს. 

ლევიცკა-შუკვანიც საკმაოდ ძლიერ ჯგუფშია - კოსოვოელთა ოლიმპიურ, მსოფლიოსა და ევროპის ჩემპიონ მაილინდა კელმენდთან, თუმცა მას მეოთხედფინალში თუ შეხვდება. ჩვენებური პირველ წრეში რუსთა ევროპის ვიცე-ჩემპიონ ალესია კუზნეცოვას ხვდება, ამ წყვილში გამარჯვებულის მეტოქე კი კუბელი ნაომის აკოსტა ბატე ან პოლონელი კაროლინა პინკოვსკა იქნება. 

შაბათი 
ამ დღეს ბუდაპეშტში მხოლოდ გრიგალაშვილი გვეყოლება, ვინც წინა კვირას ნეაპოლში მსოფლიოს უნივერსიადაზე იჭიდავა და ბრინჯაოც მოიპოვა. უნგრეთში ის მეორე წრიდან ჩაებმება ასპარეზობაში, სადაც ესპანელ იგორ ზაპირაინ ჰერეროს დაეჭიდება, ამათში მოგებულს კი მომდევნო წრეში ბერძენი დავიდ ცოკოურისის, იტალიელი კრისტიან პარლატისა და რუმინელი ვლად ვისანის სამეულიდან უძლიერესი შეხვდება. ამავე ჯგუფში არიან უბერებელი ბრაზილიელი, 35 წლის ორგზის ოლიმპიური პრიზიორი, მსოფლიოს ფინალისტი და ბრინჯაოს მედალოსანი ლეანდრო გილეირო, ჩერნოგორიელი მსოფლიოს ფინალისტი სრდან მრვალჯევიჩი და პორტუგალიელთა ქართველი ანრი ეგუტიძე. 

კვირა
ამ დღეს ჩვენგან 90, 100 და მძიმე წონების ფალავნები იჭიდავებენ. 

90-ში ევროპის მედალოსანი ღვინიაშვილი პირველივე წრეში უზბეკ იაკიო იმამოვს დაეჭიდება, ხოლო მოგების შემთხვევაში ახალ მეტოქედ ყაზახ იერსულთან მუზაპაროვსა და იტალიელ მსოფლიოს ვიცე-ჩემპიონ მატეო მარკონჩინის შორის უძლიერესი ეყოლება. ამავე ჯგუფშია კუბელთა მსოფლიოს მოქმედი ფინალისტი ივან ფელიპე სილვა მორალესი. 

ევროპის სამგზის და მსოფლიოს ჩემპიონი ავთანდილ ჭრიკიშვილიც პირველივე წრეში იჭიდავებს - პოლონელ პიოტრ კუჩერასთან, ამ წყვილის გამარჯვებული კი შემდეგ წრეში შვეიცარიელ კირილ გროსკლაუსსა და მექსიკელ ვიქტორ ოჩოას შორის მოგებულს შეხვდება. ჩვენებური ჯგუფში ესპანელთა ქართველ მსოფლიოს ჩემპიონ ნიკოლოზ შერაზადიშვილთანაა - მათი გზები მერვედფინალში იკვეთება. ისე კი ჯობდა, ჭრიკიშვილი ბადის ქვედა მხარეს მოხვედრილიყო - იქ ისეთი გამორჩეული არავინაა, შერაზადიშვილს კი მეოთხედფინალამდე არ შეხვდებოდა. 

ბერიაშვილიც მაინცდამაინც კორეელთა მსოფლიოს ჩემპიონ გუჰამ ჩოსთან მოხვდა ჯგუფში, თუმცა მეოთხედფინალამდე არ ხვდება მას. ის პირველ წრეში ავსტრიელ აარონ ფარას დაეჭიდება, ამ წყვილის გამარჯვებულს კი მერვედფინალში ესტონელი გრიგორი მინასკინი ელოდება. 

დაბოლოს, მძიმე წონა, სადაც ზაალიშვილი ასევე პირველივე წრეში იტალიელ ვინჩენცო დ არკოს ხვდება, ვისაც წლეულს თბილისში მოუგო. ამათში გამარჯვებულს შემდეგ რუს სოსლან ბოსტანოვსა და ტაჯიკ თემურ რახიმოვს შორის უძლიერესი ხვდება. 

ბუღაძე დომინიკელ ხოსე ნოვა ალკანტარას ხვდება, წარმატების შემთხვევაში კი ავსტრალიელ ლიამ პარკსა და უზბეკ ბეკმუროდ ოლტიბოევს შორის მოგებული ეყოლება კონკურენტად. ამ ჯგუფიდან გამოვყოფთ რუს ანტონ კრივობოკოვსაც.

ყოველდღიური სპორტული გაზეთი "ლელო"
925
მკითხველის კომენტარები / 0 /
მსგავსი ამბები
;