ბუნდესლიგა. ბოლო ტურის წინათქმა: მიუნხენში  საჩემპიონო  ზეიმისთვის  ემზადებიან, დორტმუნდში იმედები იწურება

ბუნდესლიგაში ერთი ტურიც ჩათამაშდება და ეს სეზონი ისტორიის კუთვნილება გახდება - სეზონი, რომელიც კარგი გამოვიდა თუნდაც იმის გამო, რომ ბოლო ტურამდეა შენარჩუნებული საჩემპიონო ინტრიგა.

საკმარისია, “ბაიერნი” საკუთარ მოედანზე დამარცხდეს “აინტრახტთან” და “დორტმუნდმა” მოიგოს “გლადბახთან” საგარეო შეხვედრა, რომ ვერცხლის სინს ლუსიენ ფავრის გუნდი ჩაიბარებს. რამდენად სამართლიანი იქნება ეს, თავად განსაჯეთ, მაგრამ ფაქტია, შანსი არსებობს.

“ბაიერნს” საჩემპიონო შეხვედრა ელოდება. რა თქმა უნდა, ფსიქოლოგიური კუთხით ეს თამაში რთულია მასპინძლებისთვის, თუმცა სათქმელია ისიც, რომ “ბაიერნის” ძირითად ბირთვს გამოცდილება ნამდვილად არ აკლია.

“აინტრახტისთვისაც” ოქროს ფასი აქვს ამ თამაშს. საქმე ისაა, რომ ცუდ ფორმაში მყოფი ფრანკფურტელები (ბოლო ორი მატჩი ჯამში 1:8 წააგეს) ინარჩუნებენ ჩემპიონთა ლიგის საგზურის მოგების შანსს. ეს შანსი ახლა გაცილებით დიდი იქნებოდა, გუნდს წინა ტურის საშინაო შეხვედრა რომ არ წაეგო (0:2) “მაინცთან”.

“აინტრახტთან” დაპირისპირება მართლაც რომ განსაკუთრებულია “ბაიერნისათვის”. გასაგებია, რომ სასწორზე ტიტული დევს, მაგრამ დატვირთვა სხვა მხრივაც დიდია. საქმე ისაა, რომ ამ შეხვედრის შემდეგ გააცილებენ “რეკორდმაისტერის” ორ ლიდერს, მსოფლიო ფეხბურთის ორ აღიარებულ ვარსკვლავს - არიენ რობენსა და ფრანკ რიბერის.

მიუხედავად იმისა, რომ ამ ბოლო დროს კრიტიკული შენიშვნები ორივეს მისამართით საკმაოდ ისმოდა, უნდა შევთანხმდეთ, რომ რიბერიმ და რობენმა ძალიან ბევრი გააკეთეს ამ გუნდის წარმატებისთვის და “ბაიერნის” ბოლო წლების ისტორიას თუ ვინმე ქმნიდა, უპირველეს ყოვლისა, ეს ორი მეგავარსკვლავი იყო. 

მოკლედ, ამ თამაშის წინ “ბაიერნის” არაერთ ქომაგს მოადგება თვალზე ცრემლი, მათ შორის - საქართველოშიც. “ბაიერნი” ყველაფერს გააკეთებს იმისთვის, რომ ორ ლიდერს “ოქროს” გაცილება მოუწყოს.

თავის მხრივ, ჩემპიონობის მაძიებელ “დორტმუნდს” დიდი წინააღმდეგობა ელის “გლადბახისგან”. ეს კლუბიც ჩემპიონთა ლიგაზე გასასვლელად იბრძვის. მართალია, ბოლო დროს დორტმუნდელები სულ უგებენ სეხნიას (ორივეს ხომ ოფიციალურად “ბორუსია” ჰქვია), მაგრამ მეტოქე ისეთია, რომ ერთი კონკრეტული შეხვედრის მაღალ დონეზე ჩატარება ნამდვილად შეუძლია.

ჩემპიონთა ლიგაზე გასვლის შესანიშნავი შანსი აქვს “ლევერკუზენს”. ამ გუნდის ამოცანაა, გასვლით შეხვედრაში დაამარცხოს “ჰერტა”, რაც ნამდვილად არ უნდა იყოს გადაუჭრელი ამოცანა, თუმც კი ადვილი არ იქნება. ბუნდესლიგაში ადვილი თამაში ვის გაუგია?!.

ფაქტები
* “დორტმუნდმა” ბოლო 7 დაპირისპირებაში აჯობა “გლადბახს”.
* “ბაიერნმა” უკანასკნელ მატჩში 3:0 მოუგო “აინტრახტს”.
* “ფორტუნასა” და “ჰანოვერის” ბოლო 2 შეხვედრაში ორივეს არ გაუტანია.
* “ლევერკუზენმა” ბოლო შეხვედრაში დაამარცხა “ჰერტა”.
* “მაინცისა” და “ჰოფენჰაიმის” უკანასკნელ სამ შეხვედრაში ორივემ გაიტანა.

გერმანია. ბუნდესლიგა. ბოლო ტური

შაბათი, 18 მაისი
ბაიერნი-აინტრახტი 17:30
შალკე-შტუტგარტი 17:30
გლადბახი-დორტმუნდი 17:30
ჰერტა-ლევერკუზენი 17:30
ვერდერი-ლაიპციგი 17:30
ფრაიბურგი-ნიურნბერგი 17:30
მაინცი-ჰოფენჰაიმი 17:30
ვოლფსბურგი-აუგსბურგი 17:30
ფორტუნა-ჰანოვერი 17:30

1. ბაიერნი 33 23 6 4 83:31 75
2. დორტმუნდი 33 22 7 4 79:44 73
3. ლაიპციგი 33 19 9 5 62:27 66
4. გლადბახი 33 16 7 10 55:40 55
5. ლევერკუზენი 33 17 4 12 64:51 55
6. აინტრახტი 33 15 9 9 59:43 54
7. ვოლფსბურგი 33 15 7 11 54:49 52
8. ჰოფენჰაიმი 33 13 12 8 68:48 51
9. ვერდერი 33 13 11 9 56:48 50
10. ჰერტა 33 11 10 12 48:52 43
11. ფორტუნა 33 12 5 16 47:64 41
12. მაინცი 33 11 7 15 42:55 40
13. ფრაიბურგი 33 7 12 14 41:60 33
14. აუგსბურგი 33 8 8 17 50:63 32
15. შალკე 33 8 8 17 37:55 32
16. შტუტგარტი 33 7 6 20 32:70 27
17. ჰანოვერი 33 5 6 22 30:69 21
18. ნიურნბერგი 33 3 10 20 25:63 19

ბომბარდირები: 22 - ლევანდოვსკი (ბაიერნი); 18 - პაკო ალკასერი (დორტმუნდი); 17 - იოვიჩი (აინტრახტი); 16 - როისი (დორტმუნდი), კრამარიჩი (ჰოფენჰაიმი), ვერნერი (ლაიპციგი), ჰავერცი (ლევერკუზენი).

ყოველდღიური სპორტული გაზეთი "ლელო"
511
მკითხველის კომენტარები / 0 /
მსგავსი ამბები
რუბრიკის სხვა სიახლეები
;