ბუნდესლიგა ფრაზებში - 'ლიფტში ქალი შემხვდა. 'ბაიერნის' ფორმაში რომ დამინახა, მითხრა'

ბუნდესლიგის სეზონი დასრულებულია. მიუხედავად იმისა, რომ "ბაიერნმა" კარგა ხნით ადრე გაინაღდა ჩემპიონის ტიტული, პირველობამ მაინც ძალიან საინტერესოდ ჩაიარა... მაგრამ დღეს ჩვენ სხვა კუთხით შევხედავთ ბუნდესლიგას.

სეზონის განმავლობაში ფეხბურთელებმა თუ მწვრთნელებმა არაერთი საინტერესო თუ სახალისო რამ თქვეს და აქ სწორედ ეს ფრაზებია თავმოყრილი:

"მეც გერმანელი ვარ", - თქვა "ჰოფენჰაიმის" ფეხბურთელმა ნიკო შულცმა, როცა მიხვდა, რომ ბუნდესნაკრებში გამოძახების ყველანაირი შანსი დაკარგა.

"ეს კიდევ არ არის ის სიტყვები, რომელიც უნდა გამომეყენებინა", - ასეთი იყო "ფრაიბურგის" მწვრთნელ კრისტიან შტრაიხის რეაქცია მას შემდეგ, რაც "შალკესთან" შეხვედრაში მსაჯის შეურაცხყოფისთვის გააძევეს.

"ის შესახედავად 50 წლის კაცს ჰგავს, თუმცა ისეთ ფორმაშია, 28 წლის გეგონება", - ასე დაახასიათა ხავი მარტინესმა "ბაიერნის" მესამე მეკარე ტომ შტარკე.

"არ მეგონა, თუ ამ თამაშს შემოვატრიალებდით. 25 წუთის შემდეგ მეოთხე მსაჯს ვკითხე - ნუთუ ბოლომდე უნდა ვითამაშოთ-მეთქი", - თქვა

"დორტმუნდთან"სასწაულებრივი "ქამბექის" (4:4 0:4-ის შემდეგ) შემდეგ "შალკეს" მთავარმა მწვრთნელმა დომენიკო ტედესკომ.

"რესტორანში გერმანული კერძები გავსინჯე. ვერ ვიტყვი, რომ მომეწონა, მაგრამ ვერც იმას ვიტყვი, რომ ზიზღი გამოიწვია ჩემში", - "ვერდერის" ჩინელი ფორვარდი იუნგ ჩენგი.

"ლიფტში ქალი შემხვდა. "ბაიერნის" ფორმაში რომ დამინახა, მითხრა - რა დიდებულია, ამ გუნდის ფანი რომ ხართო", - "ბაიერნის" მთავარი მწვრთნელი იუპ ჰაინკესი.

"ეს არ იყო ჩვენს გეგმაში, მაგრამ ყველა გეგმა გამართლებულია, თუ წარმატებით სრულდება", - ასე გამოეხმაურა თომას მიულერი "კიოლნთან" ნიკლას ზიულეს მიერ გატანილ გოლს.

"მას უფრო მეტი ტიტული აქვს მოგებული, ვიდრე ჩემს გარდერობში "პოლოს" პერანგებია", - "ჰოფენჰაიმის" მწვრთნელი იულიან ნაგელსმანი კარლო ანჩელოტიზე.

"იმდენი გოლი მე ვარჯიშის დროს ვერ გამაქვს, რამდენსაც ის თამაშისას ახერხებს", - "ბაიერნის" ფორვარდი სანდრო ვაგნერი კრიშტიანო რონალდოზე.

"ჩემს ცოლს უკვე აერია სათვალავი, თუ რამდენი ოპერაცია მაქვს გაკეთებული", - "შტუტგარტის" მცველი კრისტიან გენტნერი.

"მეც ისევე ვიბრძოდი, როგორც ფეხბურთელები - მინდორზე", - "ბაიერნის" მწვრთნელი იუპ ჰაინკესი "შალკესთან" მატჩზე, რომელიც მან ავადმყოფობის გამო გააცდინა.

"ბიბლიოთეკაში ვიყავი და ვეძებდი წიგნს სათაურით: "როგორ დავამარცხოთ "ბაიერნი"? მე ის ვერ ვიპოვე", - "ჰერტას" მწვრთნელი პალ დარდაი.

"ჩემმა ცოლმა და ქალიშვილმა მირჩიეს ამის გაკეთება, ჩემმა ძაღლმა კანდომ კი ორჯერ დაიყეფა", - იუპ ჰაინკესი "ბაიერნში" დაბრუნებაზე.

"შეიძლება, ხალხს ეგონა, რომ არც კი ვთამაშობდი", - სანდრო ვაგნერის სიტყვები "ბრაგასთან" მარცხის შემდეგ.

"მიყვარს ყვითელი და შავი", - "დორტმუნდში" ახალმისული ფორვარდი მიში ბატშუაი.

"ჩემი აზრით, მე საუკეთესო გერმანელი ფორვარდი ვარ. ამას ჩემი თამაშის სტანდარტების გათვალისწინებით ვამბობ", - სანდრო ვაგნერი "ბაიერნის" მაისურით გატანილი პირველი გოლის შემდეგ.

"მან დღეს მარცხენა ფეხი გამოიყენა. არადა, ის მას მხოლოდ იმისთვის იყენებს, რომ არ წაიქცეს", - იუპ ჰაინკესი თომას მიულერის ერთ-ერთ გოლზე.

"რამდენიმე კათხა ლუდი და ძილი", - ასეთი რეცეპტი გამოუწერა საკუთარ თავს "შალკეს" მეკარე რალფ ფერმანმა "ვერდერთან" მატჩში დაშვებული შეცდომის შემდეგ.

"ყველას ჰგონია, ვხუმრობ, მაგრამ ჩემი განზრახვა სერიოზულია", - ლეგენდარული მორბენალი უსეინ ბოლტი "დორტმუნდში" გასინჯვის წინ.

"ის ისეთივე კარგი იყო, როგორიც ჩემი ბაღია", - მარიო გიოტცე "გლადბახის" სტადიონის გაზონზე.

ყოველდღიური სპორტული გაზეთი "ლელო"
468
მკითხველის კომენტარები / 0 /
მსგავსი ამბები
რუბრიკის სხვა სიახლეები