ბუნდესლიგა. I ტურის მიმოხილვა: დორტმუნდი უკვე ზემოდან იყურება,  ბაიერნი  გასაძლიერებელია [VIDEO]

ტრადიციულად, გერმანიაში სეზონი იმ მინდორზე იხსნება, რომელზეც წინა სეზონის ჩემპიონი ლუდის თანხლებით აღნიშნავს ტიტულის მოპოვებას. ბოლო შვიდი წელია ეს გუნდი „ბაიერნია“. მან ჩემპიონობის დაცვა ბერლინის „ჰერტასთან“ მატჩით დაიწყო.

მიუნხენური კლუბის ძირითადში მხოლოდ ერთი ახალწვეული გამოჩნდა - ბენჟამინ პავარი. და მატჩმა გამოაჩინა, რომ ეს არ არის საკმარისი - „ბაიერნს“ გაძლიერება ესაჭიროება და დაგვიანებით, მაგრამ გუნდმა ამაზე ზრუნვა დაიწყო - ჩემპიონს ივან პერიშიჩი და ფილიპე კოუტინიო გააძლიერებენ.

მანამდე კი ნიკო კოვაჩის გუნდმა პირველი ქულები დაკარგა. პირველ რიგში, თვალში საცემი იყო „ბაიერნის“ დაბალი სიჩქარე. მატჩის შემდეგ მიუნხენელები ამტკიცებდნენ, რომ მათ დიდი უპირატესობა ჰქონდათ და აუცილებლად უნდა მოეგოთ. შესაძლოა, ასეც იყო, მაგრამ ძალიან დაბალი გახლდათ შეტევაში ინტენსივობა და ბერლინელები ახერხებდნენ სულის მოთქმას, ბოლოს კი ფავორიტის განსაკუთრებული შტურმიც ვერ ვიხილეთ.

რა თქმა უნდა, ბერლინელების გარდა, ეს შედეგი ყველაზე მეტად „დორტმუნდში“ გაუხარდებოდათ. ამ გუნდმა უკვე მოუგო „ბაიერნს“ სუპერთასი და ჩემპიონატიც ძალიან კარგად დაიწყო და იმავე „ბაიერნს“ ზემოდან უყურებს. 

„აუგსბურგთან“ მატჩის პირველ წუთებში გუნდებმა გოლები გაცვალეს, რის შემდეგაც „დორტმუნდი“ უზარმაზარ უპირატესობას დაეუფლა. პირველ ტაიმში მასპინძლებმა ოთხი ასპროცენტიანი მომენტი ვერ გამოიყენეს, საწყის 45 წუთში „დორტმუნდს“ 78 პროცენტი ჰქონდა ბურთის ფლობა, საგოლე შანსების შეფარდება - 12:2, მაგრამ ანგარიში 1:1 იყო.

თუმცა, მეორე ტაიმში ყველაფერი თავის ადგილას დადგა და „დორტმუნდმა“ შარშანდელის გამო დამაჯერებელი რევანში აიღო. გასულ სეზონში დორტმუნდელებმა მარტში წააგეს ბავარიულ კლუბთან და იმ მარცხმა დიდი როლი ითამაშა საჩემპიონო რბოლაში. ეს 5:1 მოგება კი გასაკვირი სულაც არ იყო, რადგან „აუგსბურგმა“ წინა უქმეებზე გერმანიის თასის პირველი რაუნდი წააგო რეგიონალლიგელ „ფერლთან“.

ფაქტები

* გაგრძელდა ტრადიცია, რომლის მიხედვითაც ბუნდესლიგის ჩემპიონი 2002 წლიდან არ აგებს გახსნის მატჩს - +14=4.

* „ბაიერნმა“ შეწყვიტა გახსნის თამაშებში ზედიზედ შვიდმატჩიანი მოგებათა სერია.

* რობერტ ლევანდოვსკიმ ზედიზედ მეხუთე სეზონში გაიტანა გახსნის მატჩში და ამით ბუნდესლიგის ახალი რეკორდი დაამყარა.

* დოდი ლუკებაკიოს „ბაიერნის“ წინააღმდეგ სამ მატჩში 5 გოლი დაუგროვდა, აქედან 4 - მიუნხენში.

* „ბაიერნი“ ბუნდესლიგაში 25 საშინაო მატჩია არ აგებს „ჰერტასთან“ - +19=6-0.

* „ჰერტამ“ „ბაიერნის“ წინააღმდეგ ბოლო ექვს მატჩში მხოლოდ ერთხელ წააგო, მაგრამ ბოლო 22 მატჩში მხოლოდ ორი მოგება აქვს.

* დორტმუნდს“ მხოლოდ ორი მოგება ჰქონდა „აუგსბურგთან“ ბოლო ექვს მატჩში.

* ბუნდესიგაში გატანილი 20 გოლიდან პაკო ალკასერმა 6 „აუგსბურგს“ შეუგდო.

* „დორტმუნდმა“ ზედიზედ მეხუთედ დაიწყო ჩემპიონატი მოგებით.

* შარშანდელი სეზონიდან მოყოლებული, კაი ჰავერცმა ზედიზედ მეექვსე მატჩში გაიტანა. ის ჰორსტ კოპელის შემდეგ მეორე ყველაზე ახალგაზრდა ფეხბურთელია, ვისაც ბუნდესლიგაში 25 გოლი დაუგროვდა.

* იანვრის შემდეგ, „ლევერკუზენი“ ზედიზედ 17 მატჩია უგოლოდ არ ტოვებს მოედანს.

* „ვოლფსბურგს“ ბოლო 11 მატჩში მხოლოდ ორი წაგება აქვს „კიოლნთან“.

* „ვერდერმა“ 1867-ე მატჩი ჩაატარა ბუნდესლიგაში და აბსოლუტური რეკორდი დაამყარა. მან გაუსწრო „ჰამბურგს“ (1866 მატჩი), რომელიც უკვე მეორე წელია მეორე ბუნდესლიგაში თამაშობს.

* „ვერდერმა“ ბოლოს ჩემპიონატი მოგებით 2013 წელს დაიწყო.

* „ფრაიბურგს“ ზედიზედ 11-ჯერ არ ჰქონდა მოგებული ბუნდესლიგაში პირველი ტური - +0=5-6.

* ცნობილი ფრანგი მცველის ლილიან ტურამის ვაჟს - მარკუს ტურამს დებიუტი ჰქონდა ბუნდესლიგაში. ის მეექვსე ფრანგია „გლადბახის“ ისტორიაში.

* „გლადბახის“ დამრიგებელს როზეს კარიერაში არასოდეს წაუგია საშინაო მატჩი - +42=11-0.

* გუნდებმა პირველად ითამაშეს უგოლო ფრე 2006 წლის შემდეგ.

* „გლადბახმა“ ზედიზედ მეცხრედ ვერ მოიგო შინ.

* იულიან ნაგელსმანმა პირველი მატჩი ჩაატარა „ლაიპციგის“ მთავარი მწვრთნელის რანგში.

* მარსელ ზაბიტცერმა „ლაიპციგის“ ოთხივე გოლში მიიღო მონაწილეობა.

* „ლაიპციგმა“ პირველად მოიგო პირველ ტურში.

ბაიერნი-ჰერტა 2:2
გოლები: 1:0 ლევანდოვსკი (24), 1:1 ლუკებაკიო (36), 1:2 გრუიჩი (38), 2:2 ლევანდოვსკი (60-პენ)

დორტმუნდი-აუგსბურგი 5:1
გოლები: 0:1 ნიდერლეხნერი (1), 1:1 პაკო ალკასერი (3), 2:1 სანჩო (51), 3:1 როისი (57), 4:1 პაკო ალკასერი (59), 5:1 ბრანდტი (82)

ლევერკუზ.-პადერბორნი 3:2
გოლები: 1:0 ბეილი (10), 1:1 მიჩელი (15), 2:1 ჰავერცი (19), 2:2 მამბა (25), 3:2 ფოლანდი (69)

ვოლფსბურგი-კიოლნი 2:1
გოლები: 1:0 არნოლდი(16), 2:0 ვეგჰორსტი (60), 2:1 ტეროდე (90+1)

ვერდერი-ფორტუნა 1:3
გოლები: 0:1 ჰენინგსი (36), 1:1 ი. ეგეშტაინი (47), 1:2 კარამანი (52), 1:3 აიჰანი (64)

ფრაიბურგი-მაინცი 3:0
გოლები: 1:0 ჰიოგერი (81), 2:0 შმიდი (84), 3:0 ვალდშმიდტი (87-პენ)

გლადბახი-შალკე 0:0

აინტრახტი-ჰოფენჰაიმი 1:0
გოლი: 1:0 ჰინტერეგერი (1)

უნიონი-ლაიპციგი 0:4
გოლები: 0:1 ჰალშტენბერგი (16), 0:2 ზაბიტცერი (31), 0:3 ვერნერი (42), 0:4 ნკუნკუ (69)

მომდევნო ტური
23 აგვისტო: კიოლნი-დორტმუნდი
24 აგვისტო: ჰოფენჰაიმი-ვერდერი, ფორტუნა-ლევერკუზენი, მაინცი-გლადბახი, აუგსბურგი-უნიონი, პადერბორნი-ფრაიბურგი, შალკე-ბაიერნი
25 აგვისტო: ლაიპციგი-აინტრახტი, ჰერტა-ვოლფსბურგი

ყოველდღიური სპორტული გაზეთი "ლელო"
273
მკითხველის კომენტარები / 0 /
მსგავსი ამბები
რუბრიკის სხვა სიახლეები
;