ბუნდესლიგა. III ტურის წინათქმა: დორტმუნდი შეჩერებას არ აპირებს, ბაიერნმა კბილები აილესა

განვლილი ორი ტურის შემდეგ ბუნდესლიგის 5 გუნდს აქვს 100-პროცენტიანი მაჩვენებელი და მათ შორის არ არის „ბაიერნი“. თუმცა ნიკო კოვაჩის გუნდმა მეორე ტურში სტუმრად 3:0 მოუგო „შალკეს“ და ახლა, როცა ახალწვეულებიც (განსაკუთრებით ფილიპე კოუტინიო) ათამაშდებიან, „რეკორდმაისტერიც“ უთუოდ იტყვის თავის წონად სიტყვას.

ამ ტურში „ბაიერნი“ „მაინცს“ მასპინძლობს და ულაპარაკოდ უნდა მოიგოს. შესანიშნავ ფორმაში მყოფი „დორტმუნდი“ და პაკო ალკასერი კი დებიუტანტ „უნიონთან“ გამართავენ საგარეო მატჩს და მაღალი ალბათობით არც იქ უნდა გაუჭირდეთ 3 ქულის მოპოვება, უშუალოდ ალკასერს კი - მიმდინარე საგოლე მარაგის გაზრდა.

„დორტმუნდი“ და „უნიონი“ არასოდეს შეხვედრიან ერთმანეთს ჩემპიონატის ეგიდით, სამაგიეროდ, 2016 და 2018 წლებში ორჯერ ითამაშეს თასზე და „უნიონმა“ ორჯერვე დამატებით დროში გადაიყვანა თამაში, თუმცა საბოლოოდ ორივე შემთხვევაში დამარცხდა - ერთხელ პენალტების სერიით, ხოლო მეორედ - დამატებითი დროის ბოლოს, 120-ე წუთზე მარკო როისის მიერ გატანილი გოლით.

ქვედა ეშელონებიდან ყურადღებას იქცევს „ლევერკუზენისა“ და „ჰოფენჰაიმის“ დაპირისპირება, ასევე „ლაიპციგის“ ვიზიტი მიონხენგლადბახში.
აღსანიშნავია ბუნდესლიგის პირველი ორი ტურის ძალიან მაღალი შედეგიანობა - 18 მატჩში გავიდა 62 გოლი, ანუ საშუალოდ 3,44 გოლი ერთ მატჩში, რაც ტრადიციულად უხვგოლიანი ჰოლანდიური ერედივიზიონის მაჩვენებელსაც (3,21) აღემატება.

ფაქტები

* „ბაიერნმა“ „მაინცს“ ბოლო 4 ბუნდესლიგური მატჩიდან ოთხივე მოუგო საერთო ანგარიშით - 14:1. გასულ სეზონში მიუნხენური შეხვედრა 6:0 დასრულდა.

* ამ სეზონში „მაინცმა“ 6-დან 5 გოლი 75-ე წუთის შემდეგ გაუშვა.

* 2019 წლის 11 მაისიდან მოყოლებული, „დორტმუნდმა“ ყველა ფრონტზე (მათ შორის - ამხანაგურიც) 12 მატჩი ჩაატარა და 12-ივე მოიგო.

* „ლევერკუზენსა“ და „ჰოფენჰაიმს“ შორის ბოლო სამი ბუნდესლიგური მატჩი ერთნაირი ანგარიშით - 4:1 დასრულდა. აქედან ორი „ჰოფენჰაიმის“ სასარგებლოდ იყო, ერთიც „ლევერკუზენის“ (სტუმრად).

* „ლაიპციგმა“, მას მერე, რაც 2016 წელს ბუნდესლიგაში გადავიდა, „გლადბახს“ 6 თამაშიდან 4 მოუგო (მათ შორის 3 - სტუმრად) და 2 ფრედ ითამაშა.

* „აინტრახტმა“ „ფორტუნას“ გასულ სეზონში ორივე თამაში მოუგო - 3:0 სტუმრად, 7:1 - შინ.

* „ვერდერსა“ და „აუგსბურგს“ შორის ბოლოს 11 ბუნდესლიგური მატჩიდან თითოეულში გავიდა მინიმუმ 3 გოლი მაინც.

* ზოგადად, „ვერდერისა“ და „აუგსბურგის“ ბოლო 9 საჩემპიონატო მატჩიდან 6 - სტუმრად მყოფმა გუნდმა მოიგო.

გერმანია, ბუნდესლიგა. III ტური

შაბათი, 31 აგვისტო
ბაიერნი-მაინცი 17:30
ფრაიბურგი-კიოლნი 17:30
ლევერკუზენი-ჰოფენჰაიმი 17:30
შალკე-ჰერტა 17:30
ვოლფსბურგი-პადერბორნი 17:30
უნიონი-დორტმუნდი 20:30

კვირა, 1 სექტემბერი
ვერდერი-აუგსბურგი 17:30
აინტრახტი-ფორტუნა 20:00

1. დორტმუნდი 2 2 0 0 8:2 6
2. ფრაიბურგი 2 2 0 0 6:1 6
3. ლაიპციგი 2 2 0 0 6:1 6
4. ვოლფსბურგი 2 2 0 0 5:1 6
5. ლევერკუზენი 2 2 0 0 6:3 6
6. ბაიერნი 2 1 1 0 5:2 4
7. გლადბახი 2 1 1 0 3:1 4
8. ფორტუნა 2 1 0 1 4:4 3
9. ჰოფენჰაიმი 2 1 0 1 3:3 3
10. აინტრახტი 2 1 0 1 2:2 3
11. ჰერტა 2 0 1 1 2:5 1
12. შალკე 2 0 1 1 0:3 1
13. აუგსბურგი 2 0 1 1 2:6 1
14. უნიონი 2 0 1 1 1:5 1
15. ვერდერი 2 0 0 2 3:6 0
16. პადერბორნი 2 0 0 2 3:6 0
17. კიოლნი 2 0 0 2 2:5 0
18. მაინცი 2 0 0 2 1:6 0

ბომბარდირები: 5 - რ. ლევანდოვსკი (ბაიერნი); 3 - პ. ალკასერი (დორტმუნდი); 2 - ჯ. სანჩო (დორტმუნდი), ს. მამბა (პადერბორნი), გ. ვალდშმიდტი (ფრაიბურგი), ვ. ვიგჰორსტი (ვოლფსბურგი), ტ. ვერნერი (ლაიპციგი).

ყოველდღიური სპორტული გაზეთი "ლელო"
303
მკითხველის კომენტარები / 0 /
მსგავსი ამბები
რუბრიკის სხვა სიახლეები
;