ბუნდესლიგა. XXVII ტური: ხანდახან ბაიერნიც აგებს [VIDEO]

ბუნდესლიგის 27-ე ტურში "ბაიერნის" გაჩემპიონების შანსი არსებობდა. ეს იმ შემთხვევაში მოხდებოდა, თუ კვირას მიუნხენელები "ლაიპციგს" მოუგებდნენ, ხოლო "ბაიერნის" კონკურენტები ქულებს დაკარგავდნენ.

მაგრამ, შაბათს ეს ინტრიგა გააქრო "შალკემ", რომელმაც, სრული ამ სიტყვის მნიშვნელობით, სამი ქულა გამოჰგლიჯა "ვოლფსბურგს".

ამ მატჩში სამი გადამწყვეტი მომენტი იყო: ჯერ "შალკეს" მეკარე ფერმანმა მოიგერია ვერჰაეგის 11-მეტრიანი (ჰოლანდიელმა ბოლო შვიდი პენალტიდან სამი გააფუჭა), შემდეგ, ემბოლომ აიძულა კნოხეს - საკუთარ კარში ჩაეჭრა ბურთი, კომპენსირებულ დროში კი "ვოლფსბურგის" მოთამაშემ მეკარის საჯარიმოს ხაზიდან ააცილა ბურთი კარს.

მატჩის გმირი, რა თქმა უნდა, ფერმანი იყო, რომელიც ლევერკუზენელ ლენოსთან ერთად, ლიდერია მოგერიებული პენალტებით (ცხრა) ბუნდესლიგის მოქმედ მეკარეებს შორის. გარდა ამისა, ფერმანმა ზედიზედ 103-ე მატჩი ჩაატარა ძირითადში, რაც გერმანიის ჩემპიონატის რეკორდია.

"შალკემ" ზედიზედ მეხუთე მატჩი მოიგო და პირველად 2009-10 წლების სეზონის შემდეგ, ზედიზედ ოთხ მატჩში არ გაუშვა.

ასე რომ, "ბაიერნის" ჩემპიონობა, მინიმუმ, 31 მარტამდე გადაიდო. ეს ისედაც ასე მოხდებოდა, "შალკესაც" რომ ვერ მოეგო, რადგან რეკორდმაისტერმა მოულოდნელად ლაიპციგში წააგო, თანაც, სავსებით სამართლიანად, რადგან მასპინძელი გუნდი არაფერში ჩამოუვარდებოდა მეტოქეს, დარტყმების რაოდენობით დაჯაბნა - 16:9 (ზუსტი დარტყმები - 6:2) და მომენტებიც მეტი შექმნა.

რა თქმა უნდა, მიუნხენელებისთვის რთულია ბუნდესლიგის მატჩებზე კონცენტრირება (ლიდერს პირველ ტაიმში მხოლოდ ერთი ზუსტი დარტყმა ჰქონდა), რადგან ჩემპიონობა თითქმის განაღდებული აქვთ, თან ჰაინკესმა ექსპერიმენტული შემადგენლობა ათამაშა. ამ მარცხის გამართლებაც ამ მიზეზებით შეიძლება.

რაც შეეხება "ლაიპციგს", მას შესანიშნავი კვირა გამოუვიდა - გავიდა ევროპალიგის მეოთხედფინალში და "ბაიერნს" მოუგო, რითაც ჩემპიონთა ლიგის საგზურისთვის ბრძოლაში დაბრუნდა. ძალიან მნიშვნელოვანი იყო გამარჯვების გოლის გატანა ტიმო ვერნერისთვის, რომელსაც 543 წუთი უგოლო სერია ჰქონდა.

"აინტრახტი" აგრძელებს ბრძოლას ჩემპიონთა ლიგის საგზურისთვის. ფრანკფურტელებმა უპრობლემოდ დაამარცხეს "მაინცი" და ისევ შევიდნენ ოთხეულში. თუმცა, იქ ადგილის შესანარჩუნებლად, კვირას მოთამაშე კონკურენტების წაფორხილება სჭირდებოდათ.

და ამ მხრივ, მოულოდნელი საჩუქარი მიიღეს "კიოლნისგან", რომელმაც კარგად ისარგებლა ალარიოს პირველ ტაიმში გაძევებით და "ლევერკუზენს" 2:0 აჯობა. ამით "თხებმა" ბოლო ადგილი "ჰამბურგს" გადაულოცეს და მეხუთე ადგილზე დატოვეს "ბაიერი".

"დორტმუნდი" ევროპალიგიდან გამოვარდა და შეუძლია მთელი კონცენტრაცია ჩემპიონთა ლიგის საგზურის მოპოვებაზე მიმართოს. შიურლემ შესანიშნავი მატჩი ჩაატარა და ამით უპასუხა იოახიმ ლიოვს ნაკრებში არგამოძახებისთვის.

შიურლემ ბატშუაის 24-ე წუთზე გაატანინა და დორტმუნდელებმა ერთადერთი გოლით მოიგეს, რითაც "შალკეს" დევნაც გააგრძელეს და ოთხი ქულითაც დაშორდნენ მეხუთე ადგილზე მყოფ "ლევერკუზენს".

გიჟური სცენარი ჰქონდა მატჩს მიონხენგლადბახში. "ჰოფენჰაიმი" სამჯერ გავიდა წინ, მაგრამ "ბორუსია" ახერხებდა გათანაბრებას. ამ მატჩში დრმიჩმაც კი გაიტანა, რომელიც ორ წელი უგოლოდ იყო.

მაყურებელი კმაყოფილი დარჩა, მაგრამ შედეგი არც ერთ გუნდს არ აწყობდა: "ჰოფენჰაიმმა" ვერ გამოაგდო ევროთასების ზონიდან "ლაიპციგი", "გლადბახი" კი საბოლოოდ დამკვიდრდა ცხრილის შუაში.

ფაქტები

* "შალკემ" ზედიზედ მეხუთე მატჩი მოიგო და ოთხი ტურია, გოლს არ უშვებს.

* "შალკეს" სტუმრად ზედიზედ სამი მოგება აქვს და სამივე "მშრალი" ანგარიშით.

* "შალკეს" მცველმა ბასტიან ოშჩიპკამ მე-200 მატჩი ითამაშა ბუნდესლიგაში.

* ფერმანს ორი პენალტი აქვს მოგერიებული 2018 წელს.

* "ვოლფსბურგი" შვიდი ტურია ვერ იგებს და ზედიზედ სამი წაგება აქვს.

* "ვოლფსბურგს" შინ ექვსი ტურია არ მოუგია და სამმატჩიანი წაგებათა სერია აქვს.

* "აინტრახტს" 10 ტურია ფრე არ უთამაშია.

* "აინტრახტი" შინ ცხრა ტურია (+7=2) არ მარცხდება.

* "აინტრახტს" საკუთარ მოედანზე ექვსმატჩიანი მოგებათა სერია აქვს.

* "გლადბახს" ბოლო რვა მატჩში მხოლოდ ერთი მოგება აქვს.

* "გლადბახს" ოთხი ტურია, საკუთარ მოედანზე არ მოუგია.

* დრმიჩმა პირველი გოლი გაიტანა ბუნდესლიგაში 2016 წლის თებერვლის შემდეგ.

* გინტერმა ამ სეზონში უფრო მეტი გოლი (ხუთი) გაიტანა, ვიდრე წინა ექვს სეზონში ერთად აღებული.

* "ჰოფენჰაიმმა" მერვე გოლი გაიტანა პირველ 15 წუთში, რაც ლიგაში საუკეთესო შედეგია.

* კრამარიჩმა შვიდი გოლი გაიტანა ბოლო შვიდ მატჩში. მხოლოდ ლევანდოვსკის აქვს 2018 წელს მეტი გოლი გატანილი - 8.

* "შტუტგარტი" შვიდი ტურია (+5=2) არ მარცხდება.

* "შტუტგარტს" სტუმრად სამმატჩიანი მოგებათა სერია აქვს.

* გომესმა "შტუტგარტში" დაბრუნების შემდეგ, 10 მატჩში ექვსი გოლი გაიტანა.

* "შტუტგარტი" დაუმარცხებელია მას შემდეგ, რაც ამ გუნდის მთავარი მწვრთნელი გახდა თაიფუნ ქორქუთი - 5 მოგება და 2 ფრე.

* პეტერსენის გოლი 750-ე იყო "ფრაიბურგისთვის" პირველ ბუნდესლიგაში.

* პეტერსენი 13 გოლით საუკეთესო გერმანელი ბომბარდირია.

* "მაინცს" ბოლო რვა მატჩში მხოლოდ ერთი მოგება აქვს.

* "აუგსბურგმა" შინ ზედიზედ მესამედ წააგო.

* "აუგსბურგის" ფეხბურთელმა ფილიპ მაქსმა მე-12 საგოლე პასი შეასრულა, რითაც ბუნდესლიგის ლიდერია.

* "ვერდერს" ბოლო რვა მატჩში მხოლოდ ერთი წაგება აქვს.

* "ვერდერის" ბოლო რვა გოლი რვა სხვადასხვა ფეხბურთელმა გაიტანა.

* "ჰამბურგს" 14-მატჩიანი მოუგებელი სერია აქვს.

* "ჰამბურგმა" ბოლო ექვს მატჩში ხუთჯერ წააგო.

* კრისტიან ტიტცი "ჰამბურგის" მე-18 მწვრთნელია ბოლო 10 წელიწადში.

* "ჰერტამ" შეწყვიტა ოთხმატჩიანი უგოლო სერია, რომელიც 447 წუთს უდრიდა.

* "ჰერტამ" ბოლო 10 მატჩში მერვედ მოუგო "ჰამბურგს".

* "დორტმუნდი" 11 მატჩია ბუნდესლიგაში არ მარცხდება.

* მიში ბატშუაიმ "ჩელსიდან" "დორტმუნდში" გადასვლის შემდეგ, შვიდ მატჩში ექვსი გოლი გაიტანა.

* "ჰანოვერმა" ზედიზედ მეოთხე მატჩი წააგო.

* "ჰანოვერს" რვამატჩიანი მოუგებელი სერია აქვს.

* "ჰანოვერი" ცხრა მატჩია სტუმრად ვერ იგებს.

* შეწყდა "ლევერკუზენის" სტუმრად 10-მატჩიანი წაუგებელი სერია.

* "ლევერკუზენმა" ბოლო 25 წელიწადში მხოლოდ მესამედ წააგო კიოლნში.

* "ბაიერნმა" შეწყვიტა 13-მატჩიანი წაუგებელი სერია. გუნდის ბოლო მარცხი 25 ნოემბრით თარიღდებოდა ("გლადბახთან" - 1:2).

* ვაგნერმა "ბაიერნის" ბოლო სამ მატჩში შეძლო გატანა.

* კეიტას საპასუხო გოლი "ლაიპციგის" რიგით მე-11 დარტყმა იყო მატჩში.

* "ლაიპციგმა" ყველა მატჩი მოიგო, როცა კეიტამ გაიტანა - ეს სერია 10 თამაშს უტოლდება.

* "ლაიპციგს" ბაიერნთან" ზედიზედ ოთხი წაგება ჰქონდა.

ფრაიბურგი-შტუტგარტი 1:2
გოლები: 0:1 გომესი (4), 1:1 პეტერსენი (53), 1:2 გომესი (75)

გლადბახი-ჰოფენჰაიმი 3:3
გოლები: 0:1 ჰიუბნერი (13), 1:1 დრმიჩი (33), 1:2 კრამარიჩი (57-პენ), 2:2 შტინდლი (72), 2:3 გრილიტში (73), 3:3 გინტერი (89)

აინტრახტი-მაინცი 3:0
გოლები: 1:0 ბოატენგი (6), 2:0 იოვიჩი (23), 3:0 რებიჩი (41)

აუგსბურგი-ვერდერი 1:3
გოლები: 0:1 ბელფოდილი (5), 0:2 ბელფოდილი (40), 1:2 ხედირა (63), 1:3 კრუზე (82)

ჰამბურგი-ჰერტა 1:2
გოლები: 1:0 დუგლას სანტოსი (25), 1:1 ლაზარო (56), 1:2 კალუ (63)

ვოლფსბურგი-შალკე 0:1
გოლი: 0:1 კნოხე (86-საკ. კარში)
76-ე წუთზე ვერჰაეგმა ვერ გაიტანა პენალტი.

დორტმუნდი-ჰანოვერი 1:0
გოლი: 1:0 ბატშუაი (24)

კიოლნი-ლევერკუზენი 2:0
გოლები: 1:0 ოსაკო (9), 2:0 ცოლერი (69)
გაძევება: ალარიო (33, ლევერკუზენი)

ლაიპციგი-ბაიერნი 2:1
გოლები: 0:1 ვაგნერი (12), 1:1 კეიტა (37), 2:1 ვერნერი (56)

ბომბარდირები: 23 - რობერტ ლევანდოვსკი (ბაიერნი); 13 - პიერ-ემერიკ ობამეიანგი (დორტმუნდი), ნილს პეტერსენი (ფრაიბურგი); 11 - ალფრედ ფინბოგასონი (აუგსბურგი), მიახელ გრეგორიტში (აუგსბურგი), ტიმო ვერნერი (ლაიპციგი).

მომდევნო ტური
31 მარტი: ჰოფენჰაიმი-კიოლნი, შალკე-ფრაიბურგი, ლევერკუზენი-აუგსბურგი, ჰანოვერი-ლაიპციგი, შტუტგარტი-ჰამბურგი, ბაიერნი-დორტმუნდი, ჰერტა-ვოლფსბურგი.
1 აპრილი: ვერდერი-აინტრახტი, მაინცი-გლადბახი.

ყოველდღიური სპორტული გაზეთი "ლელო"
1026
მკითხველის კომენტარები / 0 /
მსგავსი ამბები
რუბრიკის სხვა სიახლეები
;