ბუქარესტში გოდერძი ბერდელიძემ ქართული ჰიმნი ააჟღერა

რუმინეთის დედაქალაქ ბუქარესტში, სადაც ახალგაზრდა და 23-წლამდელ ძალოსანთა ევროპის ჩემპიონატი გრძელდება, 22 ოქტომბერს საქართველოს ჰიმნიც აჟღერდა - 61 კილოგრამ წონით კატეგორიაში კონტინენტის ჩემპიონობა გოდერძი ბერდელიძემ მოიპოვა.

ევროპის ჩემპიონატი
61 კგ

1. გოდერძი ბერდელიძე (საქართველო)  277 (125+152)

2. ლუკ მაუ (გერმანია)  275 (116+159)

3. ბერკანტ იიგიტი (თურქეთი)  261 (111+150)
67 კგ

1. მირკო ზანი (იტალია)  315 (145+170)

2. ნენაძ ლაპცეუ (ბელარუსი)  303 (138+165)

3. გოგა ჩხეიძე (საქართველო)  301 (135+166)

ბუქარესტის ფიცარნაგზე გუშინ 23-წლამდელებში ორი ქართველი ცდიდა ძალებს, რომლებმაც ორ-ორი ოქროს, ვერცხლისა და ბრინჯაოს მედალი დაიმსახურეს. როგორც აღვნიშნეთ, განსაკუთრებით ბერდელიძე გამოირჩა. ატაცში მისი ორი ცდა გამოდგა შედეგიანი (პირველი 123-ზე გაუცუდდა), მაგრამ 125 კილოგრამი ოქროს მედლისთვის საკმარისი აღმოჩნდა. ჩვენებურს 9 კილოგრამით ჩამორჩა გერმანელი ლუკ მაუ, რომელიც მეორე ადგილზე გავიდა. 111 კილოგრამით მესამე იყო თურქი ბერკანტ იიგიტი.

აკვრაში გოდერძიმ სამივე ცდა გამოიყენა. ქართველ ძალოსანს საბოლოოდ 152 კილოგრამით ვერცხლის მედალი ერგო და ორჭიდში 277 კილოგრამით სხვებზე უკეთესი შედეგი აჩვენა. აკვრაში 159 კილოგრამით პირველი ადგილი მაუმ დაიკავა. იიგიტი 150 კილოგრამით აქაც ბრინჯაოს დაყაბულდა.

- დღეს ქართველ ძალოსანთა მონაგარს ოქროს მედლებიც შეემატა, - თქვა პაექრობის დასრულების შემდეგ საქართველოს ძალოსანთა ნაკრების მთავარმა მწვრთნელმა, ოლიმპიურმა ჩემპიონმა გიორგი ასანიძემ. - ყველა ჯილდო კარგია, მაგრამ ჩემპიონობა გაცილებით მეტი საამაყოა. ბერდელიძისთვის კარიერაში ეს პირველი ტიტულია და, დარწმუნებული ვარ, არასდროს დაავიწყდება. ცხადია, მედლებს ველოდით, მაგრამ დაბეჯითებით ვერ ვიტყოდით, ნამდვილად ოქროსი იქნებოდა. ქართველმა ძალოსანმა, მართალია, ორჭიდში საკუთარი შესაძლებლობები ბოლომდე ვერ გამოავლინა, თუმცა შანსი ხელიდან არ გაუშვა და 277 კილო ჩემპიონობისთვის საკმარისი აღმოჩნდა. ვულოცავ გოდერძის, ძალოსნობის ფედერაციასა და სრულიად საქართველოს ამ წარმატებას. შეჯიბრების ბოლომდე ჯერ კიდევ რამდენიმე დღეა დარჩენილი და ასპარეზობა ამ ამაღლებულ ტალღაზე უნდა განვაგრძოთ. დარწმუნებული ვარ ოქროები და სხვა სინჯის მედლებიც აუცილებლად იქნება.

გოდერძი ბერდელიძე: ბედნიერი ვარ, რომ თანატოლებში ევროპის ჩემპიონობა მოვიპოვე და საქართველოს დელეგაციას პირველი ოქროს მედლები მოვუტანე. დიდი მადლობა მწვრთნელებს, ძალოსნობის ეროვნულ ფედერაციას, გულშემატკივრებსა და ყველა იმ ადამიანს, ვინც მიქომაგა და ჩემს ამ გამარჯვებაში წვლილი შეიტანა...

გუშინვე 67 კილოგრამ წონით კატეგორიაში საპრიზო ადგილებისთვის ბრძოლაში ჩაება ზუგდიდელი გოგა ჩხეიძე, რომელმაც ერთი ვერცხლისა და ორი ბრინჯაოს მედალი მოიპოვა.  ქართველმა ძალოსანმა ექვსიდან ოთხი ცდა გამოიყენა. ატაცში ჯერ 131, შემდეგ 135 კილო დაძლია და მესამე ადგილი დაიკავა. პირველ-მეორე ადგილებზე იტალიელი მირკო ზანი (145) და ბელარუსი ნენაძ ლაპცეუ (138) გავიდნენ.

აკვრაში ჩხეიძემ ვერცხლის მედალი დაისაკუთრა. მესამე ცდაზე მან 166-კილოგრამიანი შტანგა შემართა თავზემოთ. ჩვენებურს ოთხი კილოგრამით აჯობა ზანიმ, ხოლო ლაპცეუს 165 კილოთი ბრინჯაო ხვდა.

*    *    *

ასპარეზობის დამთავრებამდე ხუთი დღით ადრე საქართველოს ნაკრების ანგარიშზეა 10 მედალი: 2 ოქრო (გოდერძი ბერდელიძე), 4 ვერცხლი (გიორგი დოკვაძე-2, გოდერძი ბერდელიძე-1, გოგა ჩხეიძე-1) და ამდენივე ბრინჯაო (გოგა ჩხეიძე-2, გიორგი დოკვაძე-1, არჩილ მალაყმაძე-1).

დანარჩენ ქართველთა ჩემპიონატზე გამოსვლის გრაფიკი ასეთია:

24 ოქტომბერი. ახალგაზრდები. 81 კგ: ბეგლარ სოლომონიძე და თებია ლომიძე; 89 კგ. ედუარდ კაკაბაძე;

25 ოქტომბერი. ახალგაზრდები. 96 კგ. ზაზა ლომთაძე და ირაკლი გობეჯიშვილი; 23-წლამდელები. 89 კგ. რევაზ დავითაძე; 96 კგ. ანტონ პლესნოი;

26 ოქტომბერი. ახალგაზრდები. 109 კგ. აკაკი ტალახაძე; +109 კგ. თორნიკე ტაბატაძე;

27 ოქტომბერი. 23-წლამდელები. +109 კგ. გიორგი ჩხეიძე.

254
მკითხველის კომენტარები / 0 /
მსგავსი ამბები
რუბრიკის სხვა სიახლეები
;