გააგდეთ ეს კლოუნი ჩელსიდან! მედია და ექსპერტები მიზეზებს ეძებენ, ფანები კი სარის გაშვებას ითხოვენ...

"ჩელსიში" არსებული სიტუაცია ინგლისური მედიის ყურადღების ცენტრში რჩება. ახლა მთავარი კითხვა ეს არის - როდემდე მოითმენს რომან აბრამოვიჩი? უმძიმესია თავად მაურიციო სარის მდგომარეობაც. ის ყოველ წუთს ელის ბოსის ზარს ან მესიჯს. "აბრამოვიჩს ჯერ არ დაურეკავს", - უთხრა მან არაორაზოვნად ინგლისელ ჟურნალისტს, როცა "სიტისთან" წაგების მეორე დღეს გუნდიდან შესაძლო წასვლაზე ჰკითხეს...

"გააგდეთ ეს კლოუნი ჩემი "ჩელსიდან"! - გაჰკივის ერთ-ერთი ფანი სოცქსელში. მაგრამ ახლა უკვე შეიძლება ითქვას, რომ სარიმ პირველი ტალღა გადაიტანა. "ჩელსი" ჩვეულებრივად ვარჯიშობს მისი ხელმძღვანელობით. ეტყობა, აბრამოვიჩმა მოცდა ამჯობინა. მან არ დაურეკა სარის და ამით აგრძნობინა, რომ ძალიან გაბრაზებულია. ეს ისედაც ნათელია, მაგრამ სარიმ ეს ალბათ ასეც შეიძლება გაიგოს - "შენ ჯერ კიდევ გაქვს შანსი, რომ სიტუაცია გამოასწორო"!

შანსი მართლაც არის. "ჩელსის" შეუძლია, იბრძოლოს პრემიერლიგის ოთხეულში მოსახვედრად. ამას გარდა, "არისტოკრატები" რჩებიან ინგლისის ასოციაციის თასზე და გასულები არიან ლიგის თასის ფინალში, სადაც მაოხრებელ "მანჩესტერ სიტის" უნდა შეხვდნენ.

მოდი, ვნახოთ რას წერს ინგლისური მედია:

 

Daily Mail

"წლის დასაწყისში პრემიერლიგის პირველ სამ მატჩში "ჩელსიმ" 3 გოლი გაუშვა, მომდევნო 3-ში კი - 10. რა მოხდა? "არსენალთან" წაგების შემდეგ მაურიციო სარიმ ბევრი ილაპარაკა თავის ფეხბურთელებზე. ამით მან დაიწყო ომი, რომელიც, იმთავითვე ნათელი იყო, შედეგს ვერ მოიტანდა. რა გამოვიდა? 2019 წლის დასაწყისიდან "ჩელსიზე" მეტი გოლი პრემიერლიგაში მხოლოდ "ფულჰემმა" გაუშვა. როგორც ჩანს, სარიმ ნამდვილად დაკარგა გავლენა გასახდელში".

 

Mirror

"ჩელსის" ყოფილი მწვრთნელი ანტონიო კონტე არ ემხრობოდა იდეას, რომ მის გუნდს "მანჩესტერ სიტის" წინააღმდეგ გახსნილი ფეხბურთი უნდა ეთამაშა. როცა ის გააკრიტიკეს "სიტისთან" სტუმრად 0:1 წაგების შემდეგ, მან გულწრფელად თქვა:

"გახნილი ფეხბურთი რომ გვეთამაშა, 3:0-ს ან 4:0-ს წავაგებდით. არ ვარ ისეთი სულელი, ეს გამეკეთებინა. როცა "არსენალმა" ანალოგიური სქემით ითამაშა, ნახევარ საათში 3 გოლი გაუშვა და ბევრი კრიტიკაც დაიმსახურა თქვენგან, იმ ხალხისგან, ახლა მე რომ მაკრიტიკებთ".

კონტეს ეს კომენტარი მეხსიერებაში ამოტივტივდა მაშინვე, როგორც კი მისმა მემკვიდრემ "ჩელსის" ისტორიაში ერთ-ერთი ყველაზე სამარცხვინო მარცხი იგემა. კონტემ მაშინ "ავტობუსი" ჩაუყენა "სიტის" და აიძულა "ქალაქელები", მეტი გოლის გატანაზე კი არა, 1:0-ის შენარჩუნებაზე ეზრუნათ...

"სქაი სპორტის" ექსპერტებმაც კი შეიცვალეს აზრი. "ლივერპულის" ლეგენდა ჯეიმი კარაგერმა ისიც კი თქვა - სარიმ "ჩელსი" "არსენალად" გადააქციაო.

 

The Guardian

"მანჩესტერ სიტისთვის" ეს იყო ერთკვირიანი ციკლის ბრწყინვალე დასასრული. ლოგიკურია, დაისვას კითხვა - უნდა გააგრძელოს თუ არა სარიმ მუშაობა "ჩელსის" მთავარი მწვრთნელის პოსტზე? ეს იყო ლონდონელთა ზედიზედ მე-4 საგარეო მარცხი ყველა ტურნირის ჩათვლით, რაც განგაშის ნიშანი უნდა იყოს.

ყველამ ნახა - საფინალო სასტვენის შემდეგ სარიმ ისე მიაშურა გასახდელს, პეპ გვარდიოლას ხელი ჰაერში გაშვერილი დარჩა. კიდევ კარგი, იქვე იყო ჯანფრანკო ძოლა, სარის ასისტენტი, რომელმაც სცადა, აეხსნა მთავარი მწვრთნელის მდგომარეობა...

ვერავინ დაიწყებს იმის მტკიცებას, რომ სარიმ ეს შეგნებულად გააკეთა. ერთხელ მათ თქვა - მე და გვარდიოლა არიგო საკის მოსწავლეები ვართო. ამით მან პეპთან პროფესიულ სიახლოვეს გაუსვა ხაზი.

ალბათ, მისი თავი იმ მომენტში გატენილი იყო ფიქრებით იმაზე, თუ რა იქნებოდა ამის შემდეგ - ურთიერთობა რომან აბრამოვიჩთან, მედიასთან, ფანებთან... ბოლოს და ბოლოს, ფეხბურთელებთან...

 

BBC

"წაგების შემდეგ სარი მოჩვენებასავით გამოიყურებოდა. ასეთი გამომეტყველება უკვე ჰქონდათ თავის დროზე მის წინამორბედებს - ლუიშ ფელიპე სკოლარისა და ანდრე ვილაშ-ბოაშს. სარიამ აღიარა, რომ მისი სამსახური საფრთხის ქვეშაა. ეს კიდევ უფრო რეალური გახდება მას მერე, თუ "ჩელსი" არ გამოასწორებს მდგომარეობას...

სარის გუნდს არ ეყო (უფრო სწორად, საერთოდ არ ჰქონდა) ბრძოლის ჟინი და ეს გამოჩნდა უკვე მე-4 წუთზე, როცა ლონდონელებს ჩაეძინათ საჯარიმოში და რაჰიმ სტერლინგმა სათავე დაუდო ყველაზე დიდ რბევას აბრამოვიჩის ეპოქაში. "ჩელსი" დამცირებული დარჩა იმ გუნდთან მატჩში, რომელთან მოგებაც ძალიან უნდოდა "არისტოკრატების" მფლობელს...

ამბობენ, "ჩელსის" მწვრთნელის მობილურზე ხშირად მიდის აბრამოვიჩის "მესიჯები" მაშინ, როცა საქმე არ არის კარგად. მაგრამ ამჯერად სარის ტელეფონი დუმს. რას უნდა ნიშნავდეს ეს? თუმცა ის ყველაფერში ვერ იქნება დამნაშავე, რადგან მისი შეგირდები მომენტებში ისეთ შეცდომებს უშვებდნენ, დამწყებ ფეხბურთელებს რომ არ ეპატიებათ...

აი, მაგალითად, პირველი გოლის ეპიზოდი - რატომ გადადის მარკო ალონსო იმ ზონაში, სადაც ასაყვანი არავინ არ არის, ამ დროს კი კევინ დე ბრუინსა და ბერნარდო სილვას თავისუფალი მოქმედების საშუალება ეძლევათ და ისინი ქმნიან სტერლინგის პირველ გოლს.

ან რა ხდებოდა როს ბარკლის თავში იმ დროს, როცა საკუთარ საჯარიმოსთან ვითარების განმუხტვას ცდილობდა და... ბურთი პირდაპირ სერხიო აგუეროს ჩააბარა?! ესეც მესამე გოლი!..

 

ეს არის ყველა ის საკითხი, რაც სარიმ უახლოეს პერიოდში უნდა გადაწყვიტოს, თუ უნდა (და რა თქმა უნდა, ასეა), რომ დარჩეს "ჩელსის" მთავარი მწვრთნელის პოსტზე.

ყოველდღიური სპორტული გაზეთი "ლელო"
470
მკითხველის კომენტარები / 0 /
მსგავსი ამბები
რუბრიკის სხვა სიახლეები