გაგიმხელთ ძალიან მნიშვნელოვან სიახლეს... კობიაშვილი ვაისზე, ჩემპიონატზე, ახალ პროექტებზე

საქართველოს ფეხბურთის ფედერაციის პრეზიდენტ ლევან კობიაშვილთან სალაპარაკო ბევრი დაგროვდა. ამიტომ, გუშინ "ლელო" მას ფეხბურთის ფედერაციაში ესტუმრა და მიმდინარე საინტერესო თემებზე ელაპარაკა.

დახმარება სკოლებს და ფეხბურთი სკოლებში

- წლის დასასრულს ბევრი აღარაფერი უკლია და, ალბათ, უკვე შეიძლება განვლილი პერიოდის შეფასება. რისი მომტანი იყო ის ქართული ფეხბურთისთვის, რა ტენდენციები გამოიკვეთა?
- რა თქმა უნდა, შეიძლება ლაპარაკი როგორც დადებით, ისე უარყოფით ტენდენციებზე. მთავარია, გამოკვეთილია ის მიმართულებები, რომელიც ჩვენთვის პრიორიტეტულია. რა თქმა უნდა, არის გულშემატკივართა ნაწილი, რომელიც ფეხბურთის ფედერაციის მუშაობას აფასებს იმით, თუ რამდენი თამაში მოიგო საქართველოს ნაკრებმა და მე მესმის მათი, მაგრამ, როცა საქმე ეხება ფეხბურთის ფედერაციის მუშაობას, ზოგადად, არის რამდენიმე მიმართულება და ეს ყველაფერი ერთიანობაში უნდა განვიხილოთ.

...ავიღოთ თუნდაც ფეხბურთის მასობრიობა. ფედერაცია მოწოდებულია იმისთვის, რომ ხელს უწყობდეს ქვეყანაში ფეხბურთის განვითარებას. ვერც მე და ვერც ფეხბურთის ფედერაციის ვერცერთი თანამშრომელი ვერ ჩავიცვამთ ფორმას, ვერ გავალთ მინდორზე და ვერ ვითამაშებთ ფეხბურთს.

დღეს ძალიან ბევრს ლაპარაკობენ ბავშვთა ფეხბურთზე. რა თქმა უნდა, აქ არის პრობლემები, მაგრამ არც ის მიმაჩნია მართებულად, რომ ხაზი გადავუსვათ ყველა მწვრთნელისა და სკოლის მუშაობას. ბოლოს და ბოლოს, ის ფეხბურთელები, რომლებიც დღეს საქართველოს ნაკრებში თამაშობენ, სწორედ აქ გაიზარდნენ...

მეორე მხრივ, რა თქმა უნდა, ბავშვთა ფეხბურთს სჭირდება მეტი ხელშეწყობა და ჩვენ ამაზე ბევრს ვფიქრობთ. დარჩენილია მხოლოდ ერთი რეგიონი, დანარჩენ რეგიონებში უკვე ჩავატარეთ სკოლების ინსპექტირება და ზუსტად ვიცით, ვის რაში უნდა დავეხმაროთ. ინსპექტირება აუცილებელი იყო იმისთვის, რომ, ჯერ ერთი, გაგვეგო რეალური მდგომარეობა და, მეორეც - ყველა სკოლას ერთნაირი მდგომარეობა არ აქვს. პირობითად რომ ვთქვათ, ზოგს ხუთი ასაკი ჰყავს და ზოგს ერთი...

...ახლა ნამდვილად აღარ არის ის თანხა, რაზეც ადრე იყო ლაპარაკი... ნეტავ იყოს...

გაგიმხელთ ძალიან მნიშვნელოვან სიახლეს. 2018 წლიდან ბავშვთა სკოლებს დავეხმარებით კონკრეტული თანხით. მონიტორინგის საფუძველზე განისაზღვრება, რომელი სკოლა რა თანხას მიიღებს. უკვე წლებია, ზუსტად არ ვიცით, რამდენი ბავშვი თამაშობს ფეხბურთს საქართველოში. ვამბობთ 18-20 ათასს, მაგრამ საიდან მოდის ეს ციფრები? ეს ხომ ზოგადი ციფრია? ჩვენ ვამბობთ ამას ისე, რომ არ ვიცით რეალური სურათი. მონიტორინგი ამის განსაზღვრაშიც დაგვეხმარება...

...რაც შეეხება სკოლებისადმი დახმარებას, მათ მიეცემათ საშუალება, პრიორიტეტები თავად განსაზღვრონ. ზოგს საფარი აქვს გამოსაცვლელი, ზოგს გასახდელი აქვს გასარემონტებელი, ზოგმა, შეიძლება, ფიზმომზადების მწვრთნელის მიყვანა არჩიოს და ასე შემდეგ. ეს არ იქნება ასტრონომიული თანხები, მაგრამ მჯერა, რომ დღევანდელ ვითარებაში იქნება ძალიან მნიშვნელოვანი პროექტი...

...ინგლისმა 3-4 წლის წინ დაიწყო ბავშვთა აკადემიებში გიგანტური ინვესტიციების ჩადება და შედეგი უკვე არის. გახსოვთ, ასეთი წარმატებით ეთამაშოთ ინგლისის ასაკობრივ ნაკრებებს? გერმანიამ ჯერ 15 წლის წინ დაიწყო ამ გზით სიარული და რა მიიღეს შედეგად, ყველამ კარგად ვიცით. კარგით, თავი დავანებოთ გრანდებს, ამავე გზაზე დგანან სლოვენია, სლოვაკეთი...

ჩვენ ვამთავრებთ ლაგოდეხში სამუშაოებს და გვექნება საქართველოს ფეხბურთის ფედერაციის კიდევ ერთი აკადემია. როგორც იცით, არის ასეთი აკადემია თბილისში და ის მალე რუსთავში გადავა. გვაქვს ასევე აკადემია ზუგდიდში და გვექნება მარტვილში... საერთოდ, ჩვენი მიზანია, ერთ რეგიონში ერთი აკადემია მაინც იყოს და ამისკენ მივდივართ. საცხოვრებელი, კვება, სავარჯიშო ინფრასტრუქტურა - ყველაფერს უზრუნველყოფს ფეხბურთის ფედერაცია...

- მაგრამ რამდენად გვაქვს თუნდაც ბავშვთა ფეხბურთში შესაბამისი სამწვრთნელო რესურსი? გვყავს ისეთი მწვრთნელები, რომლებიც თანამედროვე მოთხოვნების შესაბამისად იმუშავებენ?
- ჩვენი პროექტი ამ მხრივაც გულისხმობს სტრატეგიის შეცვლას. გაიხსნება მწვრთნელთა გადამზადების ცენტრი. ეს ძალიან საჭიროა. მაგალითად, როცა რეგიონიდან ჩამოდის მწვრთნელი და უნდა ლიცენზიის აღება, ის აწყდება პრობლემებს - ეძებს დასარჩენს და ასე შემდეგ. მწვრთნელები ერთად იცხოვრებენ და ეს მათ მეტად ჩართულობა-გახსნილობას შეუწყობს ხელს...

რა თქმა უნდა, მწვრთნელს არავინ შეუმუშავებს ტაქტიკურ სქემას, რომლითაც მან გუნდი უნდა ათამაშოს, მაგრამ კონკრეტულ ასაკში რა უნდა ასწავლოს ბავშვს, როგორ უნდა დატვირთოს და ასე შემდეგ, ეს მეთოდიკა უკვე დიდი ხნის დადგენილია. მაგალითად, მოზარდმა თუ თავის დროზე არ ისწავლა სათამაშო დისციპლინა, დროული პასი და გახსნა, მერე და მერე ამის სწავლა უკვე ძალიან დაგვიანებულია...

გეტყვით კიდევ ერთი მნიშვნელოვანი სიახლის თაობაზე, ოღონდ ეს არ ეხება თბილისს. უკვე ათასზე მეტ სკოლაში ვართ შესულები, სადაც დაიწყება ფეხბურთის გაკვეთილები. ვფიქრობ, ეს ამბავი ძალიან ბევრ მშობელს გაახარებს. ეს იმას ნიშნავს, რომ ჩვენს ქვეყანაში გაცილებით მეტი ბავშვი ითამაშებს ფეხბურთს....

ვაისს ფინანსები არ აინტერესებს...

- უნდა გკითხოთ ვლადიმირ ვაისზე. ვიცით, რომ მასთან ახალი კონტრაქტის გაფორმებაზე მუშაობა მიმდინარეობს. რა ვითარებაა ამ მხრივ?
- ჩვენი სურვილია, რომ ვლადიმირ ვაისი დარჩეს საქართველოს ნაკრებში და ამაზე ადრეც ვილაპარაკე. ცოტა ხნის წინაც შევხვდით ერთმანეთს და კიდევ შევხვდებით. შეიძლება ითქვას, ერთ საერთო წერტილამდე ვართ მისულები. რა თქმა უნდა, გულშემატკივარმა უნდა იცოდეს ის არგუმენტები, რის გამოც ასეთი გადაწყვეტილება მივიღეთ.

მე არ გავურბივარ პასუხისმგებლობას და ვამბობ, რომ იყო შეცდომები როგორც ფედერაციის, ისე ფეხბურთელებისა და ვაისის მხრიდან, მაგრამ კარგად ვიცი ნაკრების შიდა სამზარეულო და ისიც ვიცი, როგორი ურთიერთობა აქვთ ერთმანეთში ფეხბურთელებსა და მწვრთნელს. ამიტომაც მივიღეთ ეს გადაწყვეტილება. ხოლო იმას, რომ საქართველოს ნაკრებმა მოგების გარეშე ჩაამთავრა მსოფლიოს ჩემპიონატის შესარჩევი ციკლი, ჩემზე მეტად განიცდის ის ხალხი, ვინც ვაისთან ახალი კონტრაქტის გაფორმების წინააღმდეგია? ეს შედეგი ჩემთვისაც მიუღებელია და არც მე ვარ ბედნიერი ამის გამო.

როცა ფეხბურთის ფედერაციის პრეზიდენტი ხარ და ნაკრებს ასეთი შედეგი აქვს, ახალი კონტრაქტი სხვანაირად აღიქმება, მაგრამ ჩვენ მაინც მივდივართ ამაზე. ამას მარტო იმიტომ არ ვაკეთებთ, ყოველ შესარჩევ ციკლში მწვრთნელი არ იცვლებაო, რომ ამბობენ. ესეც არის ერთ-ერთი არგუმენტი, მაგრამ დამიჯერეთ, ვლადიმირ ვაისი არ არის საქართველოს ნაკრების პრობლემა.

- ფეხბურთის ფედერაციის შეცდომები ახსენეთ. კონკრეტულად რა შეცდომა იგულისხმეთ?
- მე ყოველთვის გუნდურობის მომხრე ვარ და როცა ვლაპარაკობთ რაიმე შეცდომაზე, არ უნდა დავივიწყოთ სწორედ გუნდურობის პრინციპი. მიდგომა, რომ ნაკრები თუ თამაშს ვერ მოიგებს, ქართული ფეხბურთი დაიქცა, არ მგონია, მართებული იყოს.

- ხომ არ ყოყმანობს ვაისი და ხომ არ უკავშირდება ეს ფინანსურ მხარეს?
- მერწმუნეთ, ფინანსები არაფერ შუაშია. ასე იყო პირველი კონტრაქტის დროსაც და ასეა ახლაც. უბრალოდ, არის რაღაც დეტალები... ჩვენ, მეც მათ შორის, ჯერ კიდევ ფეხბურთელობის დროს, ვსხდებოდით ხოლმე და ვითვლიდით იმ ქულებს, რომელიც ამა თუ იმ შესარჩევ ციკლში უნდა დაგვეგროვებინა, მაგრამ ყველამ კარგად ვიცით, რომ არასოდეს არ დაგვიგროვებია იმდენი ქულა, რამდენის მოლოდინიც გვქონია. ერთა ლიგა ჩვენთვის დიდი შანსია. მგონი, რეალურად, ახლა გვეძლევა შანსი, რომ გავიდეთ პირველ ადგილზე. ეს ძალიან დიდი პასუხისმგებლობაა.

...მომავალი შესარჩევი ციკლი წინასგან აშკარად განსხვავებული იქნება. ჩვენ ვეღარ ვითამაშებთ ისე, როგორც ადრე. ახლა უკვე ჩვენ უნდა ვიყოთ ფავორიტები.

- ალბათ, ვლადიმირ ვაისის კონტრაქტში ზუსტად უნდა განისაზღვროს შესაბამისი მიზანიც...
- რა თქმა უნდა. ჩვენ გვაქვს უნიკალური შანსი, რომ ვითამაშოთ ევროპის ჩემპიონატზე და, აქედან გამომდინარე, ჩვენი მიზანი უნდა იყოს ჯგუფში პირველი ადგილის დაკავება, მერე კი პლეი ოფში წარმატებული თამაში.

- რამდენად მზად იქნება ჩვენი ნაკრები ფსიქოლოგიურად ცოტა უცნაური როლისთვის, როცა თავად უნდა იყოს ფავორიტი და ეგრეთ წოდებული "პირველი ნომერი"?
- მზად უნდა ვიყოთ. თუნდაც მორიგი ორი ამხანაგური შეხვედრა სწორედ ამას ემსახურება. ასევე გამოვიყენებთ იმ ფანჯარას, რომელიც იქნება 2018 წელს ამხანაგური შეხვედრებისთვის. ჩვენ ახლა, რაც შეიძლება, მეტი მატჩი უნდა მოვიგოთ, რათა ჩამოგვიყალიბდეს გამარჯვებულის მენტალიტეტი. კარგად ვითამაშეთ, მაგრამ წავაგეთ - ეს არის დაუშვებელი მიდგომა და ვიტყოდი - ძალიან საშიშიც! ასე შეიძლება მარცხს შეეჩვიოს ფეხბურთელი...

- ბოლო პერიოდში იყო გამონათებები ასაკობრივი ნაკრებების დონეზე. აგერ, რამდენიმე დღის წინ, 17-წლამდელებმა ელიტრაუნდის საგზური მოიპოვეს. რა ხდება მერე, რატომ იკარგებიან ხშირად ასაკობრივ ნაკრებებში გამორჩეული ფეხბურთელები?
- ჩვენ ასაკობრივ ნაკრებებში გვაქვს გარკვეული წარმატებები, რაც ნიშნავს იმას, რომ გვყავს მწვრთნელები, რომლებიც ამ ფეხბურთელებს კარგად ამზადებენ. რა თქმა უნდა, არის წარუმატებლობებიც, მაგრამ ეს თაობაზეა დამოკიდებული. შვედეთის 19-წლამდელთა ნაკრებმა პირველად თბილისში ითამაშა ევროპის ჩემპიონატზე და ვინმე დამაჯერებს, რომ შვედეთში ბავშვთა ფეხბურთი მკვდარია? და რამდენჯერ ვითამაშეთ ჩვენ ასაკობრივ ჩემპიონატებზე?..

ჩვენ შევქმენით შუალედური ნაკრებები და ეს ნაბიჯი გამართლებული მგონია. ფეხბურთელს აღარ დაეკარგება წელიწადი და, ვთქვათ, 20-წლამდელთა ნაკრები დაეხმარება იმაში, რომ ახალგაზრდულ ნაკრებში მომზადებული მივიდეს...

ახალგაზრდა ფეხბურთელი დგება არჩევანის წინაშე - ის ან უნდა დარჩეს საქართველოში, ან უცხოეთში უნდა წავიდეს სათამაშოდ. ფაქტია, საქართველოს ჩემპიონატი უნდა გახდეს უფრო მაღალი დონის ტურნირი, სადაც ფეხბურთელისთვის პროგრესი შესაძლებელი იქნება.

გეგუჩაძის მჯერა

- რით ახსნით ახალგაზრდული ნაკრების სასტარტო ფიასკოს?
- ეს ჩემთვისაც ძალიან მოულოდნელი იყო. მაგრამ მე მაინც მჯერა გია გეგუჩაძის სამწვრთნელო კვალიფიკაციის და მჯერა, უახლოეს ორ თამაშში მოედანზე სულ სხვა გუნდს ვნახავთ. მწვრთნელი არ არის ამ ნაკრების პრობლემა. მიმაჩნია, რომ თუნდაც ფეხბურთელების მიდგომა საქმისადმი უშუალოდ მინდორზე უნდა იყოს ცოტა სხვანაირი.

- საქართველოს ფეხბურთის ფედერაცია უზრუნველყოფს ეროვნული ჩემპიონატისა და სანაკრებო შეხვედრების გაშუქებას. ჟურნალისტთა ასოციაციასთან ერთობლივი პროექტი საშუალებას იძლევა, სანაკრებო გასვლით შეხვედრებს დავესწროთ. მაგრამ ერთ-ერთ ყველაზე მტკივნეულ წერტილად რჩება ეროვნული ჩემპიონატი. ფაქტია, ძალიან ხშირად, რასაც საქართველოს მოედნებზე ვხედავთ, იმას ფეხბურთი არ ჰქვია...

- ჩვენი შეხედულებები ფეხბურთზე ძალიან არ განსხვავდება ერთმანეთისგან. გაშუქება დონეს ვერ აამაღლებს. კლუბების შიგნით დიდი სამუშაოა ჩასატარებელი. გულშემატკივარიც უფრო აქტიური და ჩართული უნდა იყოს. მეტად უნდა აკონტროლოს და აკრიტიკოს კლუბიც, გუნდიც... რომ წააგებს მათი საყვარელი გუნდი, სულ მსაჯობაში კი არ უნდა ეძებონ მიზეზი, ხელმძღვანელობასაც უნდა მოსთხოვონ პასუხი...

ჩემი აზრით, ლეგიონერების გარეშე ძალიან გაჭირდება დონის მომატება. ჩვენ ვხედავთ, როგორ აკომპლექტებენ კლუბებს თუნდაც ყოფილ პოსტსაბჭოთა ქვეყნებში. და რაც ყველაზე მნიშვნელოვანია, ამ ლეგიონერების ჩამოყვანა ან მათი ხელფასი ნამდვილად არ არის ასტრონომიული.

ჩემპიონატის ახალი ფორმატიც ზოგისთვის მისაღებია, ზოგისთვის - მიუღებელი. მე შემიძლია ყველანაირი აზრი მოვისმინო, მაგრამ ფორმატი ყველაფერს ვერ და არ წყვეტს. ეს არ არის გარანტია, რომ ევროპულ ტურნირებში მაინცდამაინც ჯგუფურ ეტაპზე მოხვდებიან ჩვენი კლუბები.

ზესტაფონის თემა მალე დაიხურება

- ფეხბურთის განვითარების სახელმწიფო პროგრამაზეც ვთქვათ. "ლელოშიც" ბევრი დაიწერა ამის თაობაზე - არის თუ არა მართებული, როცა ფეხბურთელების ხელფასებზე ამხელა თანხა იხარჯება, რომელიც რეალურად წყალშია გადაყრილი. ხომ არ იქნებოდა უმჯობესი, ეს ფული ინფრასტრუქტურასა და ბავშვთა ფეხბურთს მოხმარდეს? თუმცა გვესმის საწინააღმდეგო არგუმენტიც, რომელსაც, ცხადია, აქვს არსებობის უფლება - ამ ფულის გარეშე, შეიძლება, საერთოდ ჩაგვეშალოს ჩემპიონატი...
- ახლა ნამდვილად აღარ არის ის თანხა, რაზედაც ადრე იყო ლაპარაკი... ნეტავ იყოს... მინდა გითხრათ სრული პასუხისმგებლობით, რომ ფეხბურთის ფედერაციას ამ ფულთან საერთოდ არ აქვს შეხება.

რაც შეეხება ცვლილებებს მიმართულებებსა და პრიორიტეტებში, ეს ნებისმიერ პროგრამაში შეიძლება შევიდეს, თუ არის ამის საჭიროება. მაგალითად, ჩვენ გვინდა, სამოტივაციო თანხა გავზარდოთ, რათა კლუბებს მეტი სტიმული ჰქონდეთ სპონსორის მოძიებისთვის. დღეს ქართულ ფეხბურთში ინვესტორების დეფიციტია. და ეს მაშინ, როცა სახელმწიფო ასე უდგას გვერდით ფეხბურთს. მაგალითად, ილია კოკაია ავიღოთ, ვინც წლების განმავლობაში საკუთარი ფულით გააკეთა ყველაფერი...

...მერწმუნეთ, საქართველოს ნაკრების არც ერთი ფეხბურთელი არ ფიქრობს პრემიებზე, ეს ზუსტად ვიცი...

- კოკაია ახსენეთ და, "ზესტაფონის" თემასაც შევეხოთ, რომელიც წინა ფედერაციიდან მემკვიდრეობით "გადმოგყვათ"...
- ჩვენი აზრით, "ზესტაფონი" სჭირდება ქართულ ფეხბურთს და საქართველოს ჩემპიონატი, ძლიერ "ზესტაფონთან" ერთად, უფრო ძლიერი ტურნირი იქნება. იყო შეხვედრა და ორივე მხრიდან არის მზაობა, რომ ეს საკითხი მოგვარდეს, ეს თემა დაიხუროს ისე, როგორც უკეთესი იქნება ქართული ფეხბურთის ინტერესებისთვის. ჯერ დეტალურად ვერ ვილაპარაკებ. მიდის მუშაობა ამ საკითხზეც...

- ერთა ლიგა ჩვენთვის განსაკუთრებული შანსი რომაა, ეს უკვე ვთქვით. აქედან გამომდინარე, ხომ არ შეიძლება, განვიხილოთ ნაკრების ფეხბურთელთა პრემირების საკითხი ცალკეული შეხვედრების შედეგების მიხედვით?
- ჩვენი პოზიცია ასეთია: არავის არაფერს ვუკარგავთ, ოღონდ, გათვალისწინებული უნდა იყოს საბოლოო შედეგი. ასეა სხვა ქვეყნებშიც. გეტყვით, რომ გასულ შესარჩევ ციკლში პრემია გათვალისწინებული იყო მესამე ადგილზე გასვლის შემთხვევაშიც კი, მაგრამ კარგად გესმით, რომ მეხუთე ადგილისთვის ბონუსს ვერ გავცემთ. ისე კი, მერწმუნეთ, საქართველოს ნაკრების არცერთი ფეხბურთელი არ ფიქრობს ამაზე. ეს ზუსტად ვიცი!

ყოველდღიური სპორტული გაზეთი "ლელო"
3989
მკითხველის კომენტარები / 6 /
123
0
უუუჰ არიქა არვინ გაგიგოთ DDDDD
რეხო
1
კობიაშვილო ჩაატარე თბილისში ოთხთა ტურნირი-საქართველოს პირველობის დასავლეთის,აღმოსავლეთის,ახალგაზრდული და ლეგიონერების ნაკრებების მონაწილეობით.კარგი პიარით,საპრიზო ფონდით და აუცილებლად დინამოზე.უნდა გაიყიდოს ბილეთები და ამ ბილეთების ნომრებით გათამაშდეს აბონომენტები ნაკრების თამაშებზე,ხოლო საუკეთესო ფეხბურთელების ნაკრებმა ითამაშოს აზერბაიჯანთან
მსგავსი ამბები
რუბრიკის სხვა სიახლეები
;