გადაწყვეტილი ჯერ არაფერია. გიორგი იანტბელიძე: საქართველოს ჩემპიონატმა, სპორტული თვალსაზრისით, საკმაოდ მაღალ დონეზე ჩაიარა

მოგეხსენებათ, კვირას გივი კარტოზიას სახელობის თბილისის სპორტის სასახლეში დამთავრდა მოჭიდავეთა წლევანდელი ჩემპიონატი, რომელმაც ბერძნულ-რომაულსა და თავისუფალ ჭიდაობებში გამოავლინა ნაკრების ძირითადი ბირთვი, რომელიც მოემზადება სეზონის პირველი ნახევრის უმთავრესი შეჯიბრებების - ევროპის ჩემპიონატისა და მეორე ევროპული თამაშებისთვის. შეგახსენებთ, რომ კონტინენტის პირველობას 8-14 აპრილს რუმინეთის დედაქალაქი ბუქარესტი უმასპინძლებს, ხოლო მეორე ევროპული თამაშები ამჯერად მინსკში ჩატარდება 25-30 ივნისს.

თუმცა მოჭიდავეებს წლეულს კიდევ ერთი და ყველაზე მნიშვნელოვანი შეჯიბრება ელოდებათ - მსოფლიოს ჩემპიონატი, რომელიც 14-22 სექტემბერს ყაზახეთის დედაქალაქ ასტანაში გაიმართება. ამ ისედაც მნიშვნელოვანი და სეზონის დამაგვირგვინებელი შეჯიბრების მნიშვნელობა წლეულს კიდევ უფრო იზრდება, რადგან ის სალიცენზიო სტატუსისაა და ტოკიოს 2020 წლის ოლიმპიადის საგზურების უმეტესობა იქ გათამაშდება.

მსოფლიოს ჩემპიონატისთვის შესარჩევად ჩვენებს „კარტოზია-ბალავაძის ტურნირები“ ექნებათ, საქართელოს ჩემპიონატი კი ევროპის პირველობისა და ევროპული თამაშებისთვის შესარჩევი იყო. ორივე ნაკრების მთავარი მწვრთნელი აცხადებს, რომ ჯერ გუნდში ადგილი დაბევებული არავის არა აქვს და მოსამზადებელ პერიოდში თავისი უპირატესობა ყველამ კიდევ ერთხელ უნდა დაამტკიცოს საერთაშორისო ტურნირებზე. გთავაზობთ მათ კომენტარებს, რომლებიც ტურნირის დამთავრებისთანავე ჩავიწერეთ. ამასთან, ბერძენ-რომაელთა ნაკრების მთავარ მწვრთნელ ბექა როყვას იმაზეც დავეკითხეთ, ექნებოდა თუ არა ჩემპიონატიდან ჩხუბისთვის მოხსნილ ზურაბ დათუნაშვილს (87) ნაკრებში მოხვედრის შანსი.

ბექა როყვა (ბერძნულ-რომაულად მოჭიდავეთა ნაკრები):
- ჩემპიონატი ხარისხიანი გამოდგა, იყო კარგი შეხვედრები, მედალოსნებში გამოჩნდნენ ახალგაზრდა ბიჭები. მაგალითად, 77 კილოგრამში ახალგაზრდებმა სულაც ფინალი იჭიდავეს, სხვა წონებში იყო გარკვეული ცვლილებები - ვინც შარშან პრიზიორი გახდა, ახლა იმათმა ნაწილმა გაიმარჯვა.
ამ სეზონში მთავარ აქცენტს ევროპის ჩემპიონატზე გავაკეთებთ, მერე კი ევროპული თამაშებიც გვაქვს, სექტემბერში კი მსოფლიოს ჩემპიონატია, რომელიც სალიცენზიო შეჯიბრებაა.

მივიღებთ მონაწილეობას საერთაშორისო ტურნირებზე, გავივლით შეკრებებს, სათანადო ფიზიკურ მომზადებას და შევეცდებით, ისევ გავახაროთ ჩვენი ქვეყანა და გულშემატკივარი. თუმცა ამ სეზონის მთავარი აქცენტი ლიცენზიების მოპოვება და მსოფლიოს ჩემპიონატზე წარმატებით გამოსვლაა.

თუმცა მსოფლიოს ჩემპიონატისთვის შესარჩევად კიდევ გვექნება კარტოზია-ბალავაძის სახელობის ტურნირი. ჯერ არ შეგვიძლია თქმა, როგორ გადავანაწილებთ შემადგენლობას ევროპის ჩემპიონატსა და ევროპულ თამაშებზე. ამაზე სასაუბროდ მწვრთნელები შევიკრიბებით, წონითი კატეგორიების მიხედვით გადავხედავთ და იმის მიხედვით გადავწყვეტთ, ვის როდის ან სად ეკუთვნის გამოსვლა. ამ საკითხზე სამწვრთნელო შტაბთან ერთად ჩამოვყალიბდებით, ასე ცალსახად ვერ გადავწყვეთ, რადგან ახლა მორჩა შეჯიბრება. ჯერ არაა გადაწყვეტილი, ვინ რას იჭიდავებს და არც ჩემპიონატით არ გადაწყვეტილა რამე. ბუნებრივია, არის ზოგიერთი გამოკვეთილი წონა, მაგრამ ჩატარდება საერთაშორისო ტურნირები, გადავხედავთ, ვინ როგორ იჭიდავებს და დასკვნით ეტაპზე ამის მიხედვით ჩამოყალიბდება გუნდი.

რაც შეეხება დათუნაშვილის საკითხს, ამაზე ჯერ ფედერაციამ უნდა იმსჯელოს.

გიორგი იანტბელიძე (თავისუფალი სტილით მოჭიდავეთა ნაკრები):
- საქართველოს ჩემპიონატმა კარგად ჩაიარა, სპორტული თვალსაზრისით - საკმაოდ მაღალ დონეზე. გამოიკვეთა ნაკრები გუნდი, რომელიც მონაწილეობას მიიღებს საერთაშორისო შეჯიბრებებში. გვაქვს გარკვეული საკადრო ცვლილებები, რაც სასიხარულოა - ბიჭები ცდილობენ ნაკრებში დამკვიდრებას, რასაც მივესალმებით. ცხადია, თითოეული მათგანი გამოიცდება საერთაშორისო სარბიელზე და თუ მათ შეძლეს ადგილის საბოლოოდ შენარჩუნება, მიირებენ მტავარ შეჯიბრებეზე მონაწილეობას..

უმეტესწილად, კარგი შეხვედრები იყო. მაგალითად, 74 კილოგრამში საინტერესო ორთაბრძოლები ჩატარდა, ასევე - 70-შიც, სადაც, მართალია, ჩვენი ლიდერი, მსოფლიოს ჩემპიონი ზურაბ იაკობიშვილი ტრავმის გამო არ მონაწილეობდა, მაგრამ ნამდვილად სასიხარულოა, რომ 20 წლის მირზა სხულუხიამ შეძლო ქვეყნის პირველობის მოგება. მან დაიმსახურა, რომ აუცილებლად უნდა გამოვცადოთ საერთაშორისო ასპარეზზე, რაც ნამდვილად სასიხარულოა.

ასევე 79 კილოგრამში განმეორდა 23-წლიანთა საქართველოს ჩემპიონატის ფინალი, რომელიც საინტერესოდ დამთავრდა - პირველად თუ ტარიელ გაფრინდაშვილმა მოუგო წმინდად, ახლა ნიკა კენჭაძემ აჯობა სუფთად. კარგია, ეს ახალგაზრდა ბიჭები ასე რომ ცდილობენ მაქსიმალურად თავის წარმოჩენას და ეროვნულ ნაკრებში თავის დამკვიდრებას.

ახალი კადრებიდან სრულიად უცნობი არავინ გამოჩენილა, ვისაც აქამდე არ ვიცნობდით. ახლა ჩვენი მთავარი ამოცანაა, ყველას ყურადღება მივაქციოთ, ყველას მივცეთ შანსი, მოვამზადოთ, გამოვიყვანოთ საერთაშორისო შეჯიბრებებზე.

ვიდრე ევროპის ჩემპიონატზე წასაყვანი ნაკრების შემადგენლობა ოფიციალურად არ დასახელდება, მანამ ჯერჯერობით არავის აქვს განაღდებული ადგილი გუნდში. საერთაშორისო ტურნირებზე ყველა გამოიცდება და ვინმე ახალი თუ გამოჩნდება, ან მეორე ნომერი დაგვაჯერებს, რომ ფინალში ახლანდელი წაგება შემთხვევითი იყო, შეიძლება, ის წავიყვანოთ. აგერ, 70 კილოგრამში 23-წლიანებში საქართველოს წლევანდელი ჩემპიონი საერთოდ გამოვარდა, მეორეზე გასული სხულუხია კი ჩემპიონი გახდა. ამიტომ ვამბობ, რომ ყველა გამოიცდება და ვეცდებით, ყველას ვაჩვენებინოთ მათი მაქსიმუმი საერთაშორისო შეჯიბრებებზე.

ამ ჩემპიონატის წინ ვგეგმავდით კრასნოიარსკში, ივან იარიგინის მემორიალზე ნაკრების წევრთა უმეტესობის წაყვანას, თუმცა ეს საკითხი ამ დღეებში გაირკვევა. აი, ახალგაზრდები კი იქ ნამდვილად წავლენ. ლიდერებს რაც შეეხებათ, კარგად გავაანალიზებთ, ვინ სად, რომელ ტურნირზე გამოვიდეს. ე

ვროპის ჩემპიონატისთვის მოსამზადებელ ეტაპს ფიზიკური შეკრებით დავიწყებთ, რომელსაც ამჯერად საქართველოში გავივლით - ბაკურიანში და არა სომხურ წახკაძორში, რადგან იქ კვების საკითხი სათანადოდ ვერ მოგვიგვარეს.

რაც შეეხებათ ვლადიმერ ხინჩეგაშვილს და იაკობიშვილს, გადავწყვიტეთ, არ გაგვერისკა და დაგვესვენებინა, რათა თითქმის მორჩენილი ტრავმები თავიდან არ გართულებოდათ.

ყოველდღიური სპორტული გაზეთი "ლელო"
886
მკითხველის კომენტარები / 0 /
მსგავსი ამბები
რუბრიკის სხვა სიახლეები
;