გავიცნოთ მეტოქე. გიბრალტარი - ნუ გავიმეორებთ მეზობლის შეცდომას!

ფიფას რეიტინგში: 194
სატრანსფერო ღირებულება: 225 000 ევრო

ურთიერთშეხვედრები საქართველოსთან

14.10.14 გიბრალტარი-საქართველო 0:3
08.10.15 საქართველო-გიბრალტარი 4:0

...საფეხბურთო სომხეთი იმედგაცრუებულია: ადგილობრივმა საფეხბურთო ნაკრებმა, რომელიც საკმაოდ კარგადაა დაკომპლექტებული, ვერ მოახერხა ერთა ლიგის ჯგუფის მოგება და ამაში მთავარი დამნაშავე... გიბრალტარის უპირველესი გუნდია, რომელმაც ერევანში მოახერხა გამარჯვება (1:0)...

ასე რომ, თანამედროვე ფეხბურთში ყველა მოწინააღმდეგე ბოლომდე დაფასებას მოითხოვს და ეჭვგარეშეა ისიც, რომ ევროპის ჩემპიონატის შესარჩევ ციკლში არავითარ შემთხვევაში არ უნდა დავუშვათ ის შეცდომა, რომელიც სომხებმა დაუშვეს ერთა ლიგის გათამაშებაში.

2018 წელი გიბრალტარის ნაკრებისთვის განსაკუთრებული აღმოჩნდა. სწორედ ამ, მათთვის იღბლიან წელს მოიპოვეს პირველი ოფიციალური გამარჯვება. ეს მოხდა სომხეთთან გასვლით შეხვედრაში!

2018 წელი კი გიბრალტარმა ლატვიასთან მოგებით დაიწყო და ამ მოგებასაც არანაკლები რეზონანსი ჰქონდა, ვიდრე ერევანში მიღწეულ წარმატებას. ამხანაგურ შეხვედრაში ერთადერთი გოლი ლაიამ უოლკერმა შეაგდო. სწორედ ამ წაგების შემდეგ გაუშვეს გუნდიდან ლატვიელთა გამოცდილი თავკაცი ალექსანდრ სტარკოვსი.

ამის შემდეგ გიბრალტარის ნაკრები ერთა ლიგის გათამაშებაში ჩაება. პირველი თამაში გუნდმა შინ გამართა მაკედონიასთან და 0:2 დამარცხდა. ბალკანელებმა იოლად მოიგეს, რაც, მათი შემადგენლობიდან გამომდინარე, უცნაური სულაც არ იყო. შემდეგ ჩვენი მომავალი მეტოქე გასვლაზე დაუპირისპირდა ლიხტენშტაინს და 0:2 წააგო. მასპინძლებს აშკარა უპირატესობა ჰქონდათ.

13 ოქტომბერი კი სამუდამოდ ჩაიწერა გიბრალტარული ფეხბურთის (თუ ასეთი ფენომენი საერთოდ არსებობს) ისტორიაში. ამ დღეს გუნდმა ერევანში დაამარცხა სომხეთის უპირველესი გუნდი. ცხადია, ეს იყო უდიდესი სენსაცია. სტუმართა შემადგენლობაში ერთადერთი გოლი ჯოზეფ ლუის ჩიპოლინამ გაიტანა. მას ეგრევე შესთავაზა კონტრაქტი ერთ-ერთმა აზერბაიჯანულმა კლუბმა, თუმცა ამ დროისთვის ჩიპოლინა კვლავ სამშობლოში თამაშობს.

ამას კიდევ ერთი გამარჯვება მოჰყვა. გიბრალტარმა საშინაო შეხვედრაში 2:1 მოუგო ლიხტენშტაინს. მასპინძელთაგან გოლები კაბრერამ და ჩიპოლინამ გაიტანეს, სტუმართაგან კი თავი სალანოვიჩმა გამოიჩინა.

სომხეთი გიბრალტარში რევანშის წყურვილით სავსე ჩავიდა და იოლად, 6:2 მოიგო. გიბრალტარელთა შემადგენლობაში თავი დე ბარმა და პრისტლიმ გამოიჩინეს. ბოლო შეხვედრა კი ჩვენმა მომავალმა მეტოქემ ულაპარაკოდ წააგო მაკედონიაში - 0:4 .

ხულიო სესარ რიბასი, როგორც პროგრესის სათავე

თამამად შეიძლება ითქვას, რომ გიბრალტარის ნაკრებს ამ ბოლო დროს აშკარა პროგრესი აქვს და ამ პროგრესის სათავე ურუგვაელი მწვრთნელის, ხულიო სესარ რიბასის მოღვაწეობაში უნდა ვეძებოთ.

70-იანი წლების ბოლოს და 80-იანების დასაწყისში რიბასი ურუგვაიში საკმაოდ ცნობილი ფეხბურთელი გახლდათ. მან ძირითადად ცნობილ ურუგვაულ გუნდებში ითამაშა. ამპლუით ნახევარმცველმა ურუგვაის ნაკრების შემადგენლობაში 15 შეხვედრა ჩაატარა.

რიბასი პირველად სამწვრთნელო ასპარეზზე 1993 წელს გამოვიდა. 61 წლის სპეციალისტი სხვადასხვა დროს წვრთნიდა "სუდ ამერიკას", "ბელავისტას", "ნასიონალს", "პენიაროლს", "ლივერპულს" (ურუგვაი), "ვენეციას", "ჟუვენტუდეს", ომანის ნაკრებს, "დეპორტივო მალდონადოს", "კართაგენასა" და "ლინკოლნს" (გიბრალტარი). 2018 წლიდან ურუგვაელი სპეციალისტი გიბრალტარის ნაკრებს უდგას სათავეში.

გიბრალტარის ნაკრების მთავარი მწვრთნელის პოსტზე მან 6 შეხვედრა ჩაატარა, 4 მატჩი წააგო და 2 მოიგო - მშვენიერი მაჩვენებელი უსუსტესი გუნდის მწვრთნელისთვის!

ლიდერები

ჯოზეფ ლუის ჩიპოლინა "ლინკოლნის" ღირსებას იცავს. მან ერთა ლიგაზე ძალიან კარგად და შედეგიანად ითამაშა. გუნდისთვის მნიშვნელოვანი ფეხბურთელია 30 წლის ნახევარმცველი ლაიამ უოლკერი, ვინც წლების განმავლობაში ინგლისსა და ისრაელში თამაშობდა, ახლა კი გიბრალტარში დაბრუნდა და "ფკ ეუროპას" ღირსებას იცავს.

საინტერესო ფეხბურთელია "ლინკოლნის" კიდევ ერთი ლიდერი ლი კაშიარო, ასევე, ინგლისში დაბადებული მეკარე მატ კაფერი, რომელიც ახლა "გიბრალტარ ფინიქსისთვის" იღწვის.

სომხეთსა და მაკედონიასთან ერთა ლიგის ბოლო შეხვედრებისთვის გიბრალტარის ნაკრების შემადგენლობაში გამოძახებულები იყვნენ:

მეკარეები - მატ კაფერი (გიბრალტარ ფინიქსი), დეილი კოლინგი (ფკ ეუროპა);
მცველები - როი ჩიპოლინა (ლინკოლნ რედ იმპსი), ხუან კარლოს გარსია (ლინკოლნ რედ იმპსი), ჯოზეფ ჩიპოლინა (ლინკოლნ რედ იმპსი), ჯეიკ სერჯენტი (ვესტ დისბერი), ჯეისი ოლივერი (აბინგდონ იუნაიტედი), ლუის ანსლი (ლინკოლნ რედ იმპსი), აიმან მუელი (გიბრალტარ იუნაიტედი), ეთან ბრიტო (მონს კალპი), ეთან ჯოლი (ფკ ეუროპა);
ნახევარმცველები - ლაიამ უოლკერი (ფკ ეუროპა), ანტონი ბარდონი (ლინკოლნ რედ იმპსი), ანტონი ერნანდესი (ლინკოლნ რედ იმპსი), ენდრიუ ერნანდესი (ლინკოლნ რედ იმპსი), ალან პონსი (ლინკოლნ რედ იმპსი);
თავდამსხმელები - ლი კაშიარო (ლინკოლნ რედ იმპსი), ადამ პრისტლი (ოსეტ იუნაიტედი), ჯიმი კუმბსი (ვესტ დისბერი), ტიჯეი დე ბარი (ფკ ეუროპა), რაის სტიჩი (აფელტონ თაუნი)

ყოველდღიური სპორტული გაზეთი "ლელო"
601
მკითხველის კომენტარები / 0 /
მსგავსი ამბები
რუბრიკის სხვა სიახლეები