გავუფრთხილდეთ გულშემატკივრებს!

მიზეზს ვერ გეტყვით, მაგრამ ფაქტია: ყოველი სანაკრებო პაუზის მერე გამართული ტური, მუდამ უცნაურობებითაა ხოლმე აღსავსე. გამონაკლისი არც ამჯერად მოხდა: კვლავაც, ერთიმეორეზე საინტერესო და დაძაბული მატჩები, კვლავაც არაპროგნოზირებადი შედეგები და თან აშკარად არასასიამოვნო ფაქტიც:

ქვემოქართლური დერბის მიმდინარეობისას, "რუსთავისა" და "სიონის" ფანკლუბების წევრებმა ტრიბუნაზე ისეთი ხელჩართული ჩხუბი გააჩაღეს, "მიხეილ მესხის" სტადიონის დაცვა გაშველებას ვერაფრით ახერხებდა. ეგ კი არა, მატჩის დასრულებისთანავე სტადიონის ტერიტორიაზე საპატრულო პოლიცია რომ არ გამოჩენილიყო, არავინ იცის, ტრიბუნებზე დაწყებულ ჩხუბს როგორი გაგრძელება ექნებოდა...

იმედს ვიტოვებთ, რომ ჩვენი ჩემპიონატის მატჩებში მსგავსი ფაქტები აღარ მოხდება; სამწუხაროდ, უკვე წლებია, რაც დედაქალაქში გამართულ მატჩებს ძალიან ცოტა გულშემატკივარი ესწრება. ჰოდა, ჯერჯერობით შემორჩენილ ამ მართლაც ერთგულ გულშემატკივრებს (ისე, როგორც ფეხბურთელების ოჯახის წევრებს) რატომ უნდა ეშინოდეთ სტადიონზე მისვლა?

მოკლედ, ძალზე სერიოზული პრობლემა გახდა ამა თუ იმ გუნდის მატჩებზე გულშემატკივართა უსაფრთხოების დაცვა და ამჯერად თუ ყველაფერმა... უმსხვერპლოდ(!) ჩაიარა, არავინ იცის, სხვა შემთხვევაში როგორი ფატალური შედეგით დასრულდება ორი დაპირისპირებული ფანკლუბის წევრთა შორის მორიგი თავპირისმტვრევა...

ახლა კი გასული ტურის სპორტულ მხარეზეც ვისაუბროთ და ვიდრე გამორჩეულ მოვლენებსა თუ ფაქტებს გავიხსენებთ, მანამდე იმის აღნიშვნა გვინდა, თუ როგორ დაიძაბა სიტუაცია სატურნირო ცხრილის ზედა და ქვედა ნაწილში...

ჩემპიონი ლიდერებს
უახლოვდება

უცნაურია, მაგრამ ფაქტია: ქვეყნის მოქმედ ჩემოიონს ამ ტურამდე მხოლოდ 1 საგარეო მატჩი ჰქონდა მოგებული (ისიც, სეზონის სტარტზე); და აი, თითქმის სამთვიანი პაუზის შემდეგ, კახა ჩხეტიანის გუნდმა შეძლო და გასვლით შეხვედრაში გაიმარჯვა, თანაც - დიდი ანგარიშით.

თუმცა, როგორც XIV ტურის მიმოხილვის შესავალში აღვნიშნეთ, "ტორპედოს" გამარჯვება არავის უნდა გაჰკვირვებოდა; რაღა თქმა უნდა, ერთი მხრივ, ძალიან პოზიტიური ფაქტია, ჩვენი ჩემპიონი მოახლოებული ევროტურნირებისათვის ნელ-ნელა რომ ფორმაში შედის, მაგრამ ნუ დაგვავიწყდება, რომ წლევანდელ ევროტურნირებზე "სამტრედიამაც" უნდა იასპარეზოს.

ამ შემთხვევაში კი აღარც ვიცით, რა პროგნოზი გავაკეთოთ: რანაირად და როგორ უნდა მოასწროს სრულიად გამოუცდელი ბიჭებით დაკომპლექტებულმა გუნდმა გაძლიერება კარსმომდგარი ევროტურნირებისათვის?

ისე, "სამტრედიაში" რამდენიმე პერსპექტიული ფეხბურთელიც წარმოჩინდა და ამის ნათელი მაგალითია 19 წლის ფორვარდი ზაურ ხაბეიშვილი, რომელმაც მიმდინარე სეზონში უკვე მეორე გოლი გაიტანა. რაც შეეხება "ტორპედოს", კახა ჩხეტიანის გუნდშიც უნდა ველოდოთ ევროტურნირების წინ გარკვეულ და, რაც მთავარია, დამაიმედებელ ცვლილებებს.

მანამდე კი იმ ფეხბურთელებს გამოვარჩევთ, "სამტრედიასთან" მატჩში თავი რომ გამოიჩინეს: 25 წლის მერაბ გიგაურმა მიმდინარე სეზონში პირველი გოლი გაიტანა, მისმა თანატოლმა ევგენი ბოხაშვილმა კი სულაც სადებიუტო გოლი გაიტანა საქართველოს ჩემპიონატში; დანარჩენი 2 გოლი კი "ტორპედოს" საკვანძო ფეხბურთელებმა გაიტანეს: 35 წლის გრიგოლ დოლიძემ და გუნდის საუკეთესო ბომბარდირმა, 28 წლის ლევან კუტალიამ.

ევროტურნირებზე ამათ უნდა
ეთამაშათ...

შარშანდელი ევროტურნირების წინ ძალზე პესიმისტური განწყობა გვქონდა და, სამწუხაროდ, ეს უსიამოვნო (ამასთან, რეალობაზე დაფუძნებული) პროგნოზი გამართლდა კიდეც. შეგახსენებთ, რომ შარშან, ქართული გუნდებისათვის ევროტურნირები პირველსავე ეტაპზე დასრულდა.

არადა, იმ მომენტისთვის საქართველოს ჩემპიონატში ყველაზე შთამბეჭდავად რომელი გუნდიც გამოიყურებოდა, სწორედ ის არ მონაწილეობდა ევროტურნირებზე: შარშან ამ დროისთვის, კახა კაჭარავას დამოძღვრილ "დინამოში" ხომ გიორგი ჩაკვეტაძე, საბა ლობჟანიძე, გიორგი პაპუნაშვილი, ბაჩანა არაბული და სხვები თამაშობდნენ...

...დაახლოებით, ანალოგიური სიტუაციაა წლეულსაც: ძალიან საწყენია, რომ ეროვნული ლიგის ორ გამორჩეულ გუნდს, "საბურთალოსა" და "დილას", ამ ზაფხულს ევროტურნირებზე ვერ ვიხილავთ.

ისე კი შემტევი ფეხბურთის მოყვარული ეს ორი გუნდი ამჟამად მართლაც მშვენიერ ფორმაშია და ამის დასტურად, იმავე "დილას" მორიგი წარმატებული მატჩიც გამოდგება - გიორგი დარასელიას დამოძღვრილმა გუნდმა თითო ტაიმში თითო გოლი გაუტანა ბოლო დროს აშკარად მოყოჩაღებულ "კოლხეთს" და ისედაც ხანგრძლივი წაუგებელი სერია კიდევ უფრო გაზარდა.

პირველი გოლი ყოფილი გუნდის კარში მიკოლა კოვტალიუკმა გაიტანა (უკრაინელმა ცენტრფორვარდმა წლეულს უკვე მეშვიდე გოლი შეაგდო), მატჩის მიწურულს კი გორელთა გუნდის 28 წლის უნივერსალმა ფეხბურთელმა გიორგი კორიფაძემ (ამჯერად მარცხენა მცველად რომ ვიხილეთ) სოლორეიდი ზუსტი დარტყმით დაასრულა და "დილას" მაისურით პირველი გოლი გაიტანა.

ისე როგორ იქნებოდა, "კოლხეთის" ფეხბურთელთაგან რომელიმეს წითელი ბარათი არ მიეღო ან ავტოგოლი არ გაეფორმებინა: უკვე მატჩის დასაწყისშივე გააძევეს მოედნიდან ფოთელთა გუნდის კაპიტანი და ლიდერი, 28 წლის ლაშა გოგონაია...

ქვემოქართლური დერბი ახალი
პერსონებით

"რუსთავისა" და "სიონის" დაპირისპირება ამ ტურის ერთ-ერთ ცენტრალურ მატჩად მიიჩნეოდა და ქვემოქართლურმა დერბიმაც, მოლოდინი აშკარად გაამართლა! სამწუხაროდ, ამ მართლაც თვალსასეირო მატჩს უსიამოვნო ფონიც ახლდა - ფანკლუბების წევრებს შორის მომხდარ დაპირისპირებას ვგულისხმობთ...

არადა, მსგავსი დინამიკური და სახიფათო მომენტებით აღსავსე მატჩებით ნამდვილად არა ვართ განებივრებულნი ეროვნული ლიგის წლევანდელ გათამაშებაში. მოკლედ, ორივე გუნდის გამოცდილ მწვრთნელებს, ვარლამ კილასონიასა ("რუსთავი") და კობა ჟორჟიკაშვილსაც ("სიონი") ქება ეკუთვნით და, რა თქმა უნდა, ორივე გუნდის ფეხბურთელებსაც.

ისიც აუცილებლად უნდა აღვნიშნოთ რომ ორივე გუნდში მრავლად არიან ერთიმეორეზე გამოცდილი ფეხბურთელები, თუმცა, ამ ქვემოქართლურ დერბიში მთავარ პერსონებად ახალგაზრდა მოთამაშეები მოგვევლინნენ.

მშვენიერი მატჩი ჩაატარა "რუსთავის" 22 წლის შემტევმა ზაზა ციცქიშვილმა, რომელმაც უმაღლეს ლიგაში სადებიუტო დუბლი შეასრულა; ასევე ქებას იმსახურებს 21 წლის თორნიკე კირკიტაძე, პირველად რომ გამოჩნდა ამ სეზონში ძირითად შემადგენლობაში, თანაც, მისთვის აშკარად უცხო - მარცხენა ფლანგზე.

ასევე პირველად ვიხილეთ თავის გუნდის ძირითად შემადგენლობაში "სიონის" 20 ნიჭიერი გარემარბი ლაშა ლეჟავა, რომელმაც ამ მატჩში საგოლე პასიც შეასრულა და თავადაც ჰქონდა გოლის გატანის ურეალურესი შანსი , მაგრამ გამოცდილ ნუკრი რევიშვილს ვერ აჯობა. ცალკე უნდა ვთქვათ, ამ მატჩის კიდევ ერთ გამორჩეულ ფეხბურთელზეც: "სიონის" 23 წლის ცენტრალური მცველმა სანდრო გურეშიძემ არაერთხელ ჩაშალა მეტოქის შეტევები და პირველი ტაიმის მიწურულს, ზუსტი თავური დარტყმით, ამ სეზონში თავისი მეორე გოლიც გაიტანა.

ვინ იქნება შემდეგი?

მალე, ალბათ, ასე ვიტყვით: ნეტავ, რომელი გუნდი მოახერხებს "ლოკომოტივის" წაუგებელი სერიის შეწყვეტას? ჰო, მართლაც ასეა: ლაშა ჭაღიაშვილის დამოძღვრილი გუნდი აგრძელებს თავის შთამბეჭდავ სერიას და, უამრავი საკადრო პრობლემის მიუხედავად, უკვე მე-6 მატჩია, რაც წაუგებლად ასპარეზობს.
იმაზე აღარაფერს ვამბობთ, "ლოკომოტივმა" თუ რა გუნდებთან დააგროვა ბოლო ოთხ მატჩში 10 ქულა : თბილისის "დინამოსთან", "ტორპედოსთან", "ჩიხურასთან", "საბურთალოსთან"...

...ამ ტურის წინათქმაშიც აღვნიშნეთ, რომ მიმდინარე ჩემპიონატში "საბურთალომ" პირველი მარცხი სწორედ "საბურთალოსთან" განიცადა; ასე რომ, გიორგი ჭიაბრიშვილის გუნდს (რომელსაც საქართველოს სხვადასხვა ასაკობრივ ნაკრებში არაერთი ფეხბურთელი ჰყავდა მივლინებული ამ პაუზის დროს), რევანშის სურვილიც ჰქონდა და ეს დედაქალაქური დერბიც, თავდაპირველად, "საბურთალოსთვის" სასურველი სცენარით წარიმართა, განსაკუთრებით - მეორე ტაიმის დასაწყისი: "საბურთალოს" 22 წლის გარემარბმა და ეროვნული ლიგის უდავოდ საუკეთესო ლეგიონერმა (ლეანდრო რიბეიროსთან ერთად) ვაგნერ გონსალვეშმა მშვენიერი რეიდი შემოგვთავაზა, რაც "ლოკომოტივის" მცველებმა მხოლოდ წესების დარღვევით შეაჩერეს.

ფრანგულ-ბრაზილიური წარმოშობის ვაგნერმა პენალტი ზუსტად კი გამოიყენა, მაგრამ "ლოკომოტივი" არ დანებდა და ტურის ერთ-ერთი გამორჩეული გოლითაც უპასუხა: 23 წლის ლუკა კიკაბიძემ სოლორეიდი... საკუთარ ნახევარზე დაიწყო, მეტოქის საჯარიმოში შევიდა და ზუსტადაც დაარტყა.
უფრო საინტრიგო დერბის მოლოდინი

"საბურთალომ" ლიდერობა ამ ტურის შემდეგაც შეინარჩუნა, მაგრამ უშუალო კონკურენტმა გაიმარჯვა და "დინამომაც" ორ ქულამდე შეამცირა სხვაობა; აი, მომდევნო ტურში კი მეორე წრის მართლაც ცენტრალური მატჩი გველოდება: კიდევ ერთი დედაქალაქური დერბი, რომელშიც ერთმანეთს "საბურთალო" და "დინამო" უნდა დაუპირისპირდნენ!

...მანამდე კი, კახა კაჭარავას გუნდმა მინიმალური ანგარიშით სძლია ლამის განახევრებულ "ჩიხურას". საჩხერელთა გუნდს იმდენად სერიოზული საკადრო პრობლემები ჰქონდა, რომ სათადარიგოთა სკამზე, შვიდის ნაცვლად მხოლოდ 5 ფეხბურთელი ჰყავდა.

ამის მიუხედავად, ვერავინ იტყვის, რომ სოსო ფრუიძის გუნდი თავიდანვე განწირული იყო წაგებისთვის: მეორე ტაიმში სტუმარმა რამდენიმე სახიფათო მომენტი შექმნა, მაგრამ "დინამოს" 18 წლის მეკარე დემეტრე ბულისკერიამ ამ სეზონში მესამე "მშრალი" მატჩი ჩაატარა და დიდი წვლილი შეიტანა საკუთარი გუნდის გამარჯვებაში. ისევე, როგორც "დინამოს" 24 წლის საყრდენმა ნახევარმცველმა დმიტრო ივანისენიამ, რომელიც კარგად გაერკვა სიტუაციაში და ახლო მანძილიდან მატჩის ერთადერთი გოლი გაიტანა.

სხვათა შორის, "დინამოს" შემადგენლობაში გარკვეული სიახლეებიც იყო: თითქმის ორთვიანი პაუზის შემდეგ, მოედანს დაუბრუნდა 18 წლის ნიჭიერი ნახევარმცველი გიორგი კუცია, ხოლო დაცვის ცენტრში დავით კობოურისა და ლუკა ლოჩოშვილის დუეტი ვიხილეთ.

ყოველდღიური სპორტული გაზეთი "ლელო"
1303
მკითხველის კომენტარები / 0 /
მსგავსი ამბები
რუბრიკის სხვა სიახლეები
;