გავყიდოთ ლობჟანიძე, რათა გავძლიერდეთ!.. რანდერსმა ბრონდბიუს შეთავაზება უარყო, მაგრამ ქართველს მაინც ყიდის

საბა ლობჟანიძის ტრანსფერი "ბრონდბიუში", როგორც ჩანს, ჩაიშალა, მაგრამ, დიდი ალბათობით, 24 წლის ქართველი შემტევი სხვა კლუბში გადავა. ამაზე "რანდერსის" ოფიციალური წარმომადგენლის კომენტარიც მეტყველებს.

 "წინადადება ნამდვილად მივიღეთ, მაგრამ ეს არ იყო დამაკმაყოფილებელი შემოთავაზება. მას შემდეგ ჩვენ "ბრონდბიუსგან" არაფერი გვსმენია, სრული სიწყნარეა", - ამბობს "რანდერსის" სპორტული დირექტორმა სიორენ პედერსენი.

შეგახსენებთ, რომ სამი კვირის წინ გავრცელდა ინფორმაცია, თითქოს, "ბრონდბიუმ" "რანდერსს" ლობჟანიძის ტრანსფერის გამოსყიდვისთვის მიმართა. მხოლოდ ახლა გახდა ცნობილი, რომ ეს შეთავაზება "რანდერსმა" უარყო.

ცნობილი გახდა ამ მოლაპარაკებების დეტალებიც: "ბრონდბიუს" წარმომადგენლები "რანდერსის" ხელმძღვანელებს სამი კვირის წინ შეხვდნენ და ლობჟანიძის ტრანსფერით დიდი დაინტერესება გამოხატეს. ამ დროს, "რანდერსის" ბოსებმა "ბრონდბიუს" განუცხადეს, რომ შემოთავაზებული თანხა საკმარისად მაღალი ფსონი არ არის და რომ ამ ფასში ქართველის გაშვებას არ აპირებდნენ. მას შემდეგ "ბრონდბიუსგანაც" არაფერი ისმის და ლობჟანიძეც ჯერ ისევ "რანდერსში" თამაშობს. შეგახსენებთ, რომ მას ამ კლუბთან კონტრაქტი 2020 წლის ზაფხულში ეწურება.

მაგრამ ეს ყველაფერი არ არის. "რანდერსის" დირექტორმა პედერსენმა tipsbladet.dk-სთან ინტერვიუში განაცხადა, რომ ქართველის მიმართ ინტერესი სხვა კლუბებიდანაც არის:

"ჩვენი ჩანაფიქრია, რომ ფეხბურთელები გავყიდოთ და ტრანსფერებიდან შემოსავალი მივიღოთ. ჩემი ვარაუდით, უახლოეს პერიოდში საბა ლობჟანიძეს სხვა გუნდში გავუშვებთ. ქართველით ძალიან ბევრი კლუბია დაინტერესებული და მისი ტრანსფერით ფინანსურად გაძლიერება გვსურს".

ყოველდღიური სპორტული გაზეთი "ლელო"
2363
მკითხველის კომენტარები / 0 /
მსგავსი ამბები
რუბრიკის სხვა სიახლეები
;