გაზაევმა კვირკველია 20 ტურში მეშვიდედ აღიარა!

რუსეთის პრემიერლიგაში 20 ტური მიილია და 4 მარტამდე შესვენება გამოცხადდა. საბა კვირკველია სიმბოლურ ნაკრებში მეშვიდედ მოხვდა, ერთხელაც ტურის MVP (ყველაზე ღირებული მოთამაშე) გახდა, რაც სარეკორდო მაჩვენებელია.

საქართველოს ნაკრებისა და მოსკოვის "ლოკომოტივის" მცველისთვის მიმდინარე სეზონი ისეთი წარმატებულია, წლების წინათ ბევრი გამორჩეული ქართველი ფეხბურთელიც რომ ვერ მოიწონებდა თავს.

რუსეთის პრემიერლიგაში კი ბევრ ცნობილ ქართველ ფეხბურთელს უთამაშია, რომლებიც მუდამ საუკეთესოებში ხვდებოდნენ, მაგრამ კვირკველიას მსგავს პატივში არავინ ყოფილა. წლეულს, 25 წლის ქართველს, შეიძლება ითქვას, რუსეთში ტურის სიმბოლურ ნაკრებში ადგილი დაჯავშნილი აქვს.

უკვე ვწერდით, რომ მე-20 ტურში, მოსკოვის "ლოკომოტივმა" სტუმრად 3:1 დაამარცხა "ტოსნო", 20 ტურში 45 ქულა დააგროვა, უშუალო კონკურენტები - "ზენიტი" და "სპარტაკი" 8 ქულით ჩამოიშორა და ჩემპიონატის საშემოდგომო ეტაპის გამარჯვებული გახდა.

საქართველოს ნაკრებისა და მოსკოვის "ლოკომოტივის" მცველმა ხსენებულ მატჩში შეუცვლელად ითამაშა. ცნობილმა სპეციალისტმა, ვალერი გაზაევმა ის ინტერნეტგამოცემა "ჩემპიონატის" სიმბოლურ ნაკრებში დაასახელა და ეს ასე დაასაბუთა:

"მოსკოვის "ლოკომოტივში" გადასვლის შემდეგ კვირკველია რუსეთის პრემიერლიგის ერთ-ერთი უძლიერესი ცენტრალური მცველი გახდა. ქართველმა ფეხბურთელმა თავი განვლილ ტურშიც საუკეთესოდ წარმოაჩინა - "ტოსნოს" წინააღმდეგაც ძალზე დამაჯერებლად ითამაშა", - წერს გაზაევი.
ამას გარდა, სპეციალურმა სტატისტიკურმა პორტალმა წჰოსცორედ.ცომ-მა კვირკველია რუსული პრემიერლიგის 20 ტურის შემაჯამებელ სიმბოლურ ნაკრებში შეიყვანა.

ყოველდღიური სპორტული გაზეთი "ლელო"
1398
მკითხველის კომენტარები / 0 /
მსგავსი ამბები
რუბრიკის სხვა სიახლეები
;