გალაქტიკო საქართველოში: 'რეალი' საზაფხულო სკოლით ჩამოდის

2019 წლის 2 ივნისიდან 2 ივლისამდე საქართველოში "გალაქტიკო" ჩამოდის. თბილისის ზღვაზე მდებარე "ზესტაფონის" საწვრთნელი ბაზა მადრიდის "რეალის" საზაფხულო კემპს უმასპინძლებს...

ორგანიზაცია "თავისუფალი ფეხბურთი", რომელმაც აქამდე "ინტერისა" და "იუვენტუსის" ანალოგიური კემპები მოაწყო, ახლა მსოფლიო ფეხბურთის ერთ-ერთ უმთავრეს გრანდს დაუკავშირდა. მსოფლიო ფეხბურთის გრანდის კემპში 150 ბავშვი ივარჯიშებს. პროექტის პრეზენტაცია სასტუმრო "რუმსში" გაიმართა.
პროექტი ორგანიზაცია "თავისუფალი ფეხბურთის" ინიცირებულია. მისმა ერთ-ერთმა დამფუძნებელმა ლევან სეთურიძემ თანამშრომლობის პერსპექტივაზე ილაპარაკა.

"ჩვენმა ორგანიზაციამ წელს ორი წარმატებული კემპი ჩაატარა და გვაქვს ამბიცია, რომ "რეალის" საზაფხულო სკოლის პროექტიც წარმატებული იყოს. ეს ყველაფერი იმისთვის კეთდება, რომ ქართულ ფეხბურთში სიახლეები შემოვიტანოთ და მის წინსვლას ხელი შევუწყოთ. რომ არა "ზესტაფონისა" და სფფ-ის ხელმძღვანელობა, თბილისის მერია და პრეზიდენტის ადმინისტრაცია, ეს კემპი ვერ შედგებოდა", - ამბობს სეთურიძე.

მადრიდული კლუბის წარმომადგენელმა, "რეალის" პროექტების მენეჯერმა ანდრეს მუნტანერმა თქვა, რომ თანამშრომლობის გაგრძელების იმედი აქვს: "მადლობა "თავისუფალი ფეხბურთის" წარმომადგენლებს, რომლებმაც ეს ინიციატივა გამოიჩინეს. ჩვენ საქართველოდან შარშან დაგვიკავშირდნენ და როგორც ხედავთ, მოლაპარაკება წარმატებით დასრულდა. დიდი იმედი გვაქვს, რომ ეს პროექტი წარმატებით განხორციელდება და თანამშრომლობა მომავალშიც გაგრძელდება.

საზაფხულო სკოლები უკვე 44 ქვეყანაში გვაქვს მოწყობილი და მჯერა, აქაც დავაარსებთ სკოლას, რომელიც ქართველ ბავშვებს წინსვლაში დაეხმარება".
პეტრე სარდანაძე, "თავისუფალი ფეხბურთი": "ჩვენთვის საამაყოა, საქართველოში ისეთი ბრენდი რომ შემოვიყვანეთ, როგორიც "რეალია". ორ ესპანელ სპეციალისტთან ერთად, ქართველი მწვრთნელები და მენეჯერებიც დაგვეხმარებიან. წინა კემპებზე 100-100 ბავშვი ვარჯიშობდა, ახლა კი 150 ბავშვი იქნება და იმედია, ეს ქართველ ბავშვებს წინსვლაში წაადგებათ".

ყოველდღიური სპორტული გაზეთი "ლელო"
972
მკითხველის კომენტარები / 0 /
მსგავსი ამბები
რუბრიკის სხვა სიახლეები
;