[VIDEO] ძალოსნობა. პლესნოი, დავითაძე... და უკვე 16 მედალი ბუქარესტში!

3 ოქროს მედალი და ევროპის 4 რეკორდი! - ასეთია საქართველოს ძალოსანთა ნაკრების წევრ ანტონ პლესნოის ნადავლი 23-წლამდელთა ევროპის ჩემპიონატზე, რომელსაც რუმინეთის დედაქალაქი ბუქარესტი მასპინძლობს.

როგორც ვწერდით, ანტონმა გუშინ ატაცში ორი ცდა გამოიყენა. მესამეზე 173-კილოგრამიანი შტანგა დაიმორჩილა და ოქროს მედალი მოიპოვა. უკრაინელი ვოლოდიმირ ჰოზა მას ცხრა კილოგრამით ჩამორჩა და ვერცხლის მედალი ხვდა. 163 კილოგრამით ამ მოძრაობაში მესამე იყო რუსი სტანისლავ მაზნიცინი.

აკვრაშიც პლესნოიმ ყველა მოლოდინს გადააჭარბა - მესამე ცდაზე 215-კილოგრამიანი შტანგა შემართა თავს ზემოთ და მეორე ოქროს ჯილდო დაიმსახურა. რუსმა მაზნიცინმა და უკრაინელმა ჰოზამ 200-200 კილოგრამი დაძლიეს და, შესაბამისად, ვერცხლისა და ბრინჯაოს მედლები გაინაწილეს. ორჭიდის ჯამში პლესნოიმ მეორეადგილოსან უკრაინელს 24 კილოგრამით აჯობა და კვარცხლბეკის უმაღლეს საფეხურზე ავიდა.

საგულისხმოა, რომ ანტონ პლესნოის წლეულს აჭარის დედაქალაქში ევროპის ჩემპიონატზე ატაცში (173 კგ) ვერცხლი და ორჭიდში (377 კგ) ბრინჯაო ერგო. პატაიაში მსოფლიოს ჩემპიონატზე ატაცში 181 კილოგრამით პირველი ადგილი დაიკავა, ხოლო ორჭიდში 394 კილოგრამით მე-3 ადგილი ხვდა.

96 კგ

  1. ანტონ პლესნოი (საქართველო) – 388 (173+215)
  2. ვოლოდიმირ ჰოზა (უკრაინა) – 364 (164+200)
  3. 3. სტანისლავ მაზიცინი (რუსეთი) – 363 (163+200)

პლესნოიმდე ცოტა ხნით ადრე საქართველოს სასპორტო დელეგაციის ყულაბას ბუქარესტში სამი მედალი შესძინა რევაზ დავითაძემ, რომელმაც 23-წლამდელთა 89 კილოგრამ წონით კატეგორიაში იასპარეზა.

ევროპის შარშანდელმა ჩემპიონმა 21 წლის დავითაძემ წლეულს ბათუმში უფროსების კონტინენტის პირველობაზე ატაცში 170 კილოგრამით ოქროს მედალი დაიმსახურა, აკვრასა (200 კგ) და ორჭიდში (370 კგ) ვერცხლის მედლები ერგო. ტაილანდურ პატაიაში ძალოსანთა მსოფლიოს ჩემპიონატზე მან 172 კილოგრამით ატაცში ოქრო მოიპოვა, ხოლო ორჭიდში 371 კილოგრამით მესამე ადგილი დაიკავა.

ქართველმა ძალოსანმა ატაცში რუმინულ ფიცარნაგზეც იყოჩაღა - 168 კილოგრამით ოქრო არავის დაუთმო. 165 კილოთი მეორე იყო სომეხი ჰაკობ მკრტიჩიანი, მესამე ადგილით მისი თანამემამულე დავიდ ჰოვანისიანი (161 კგ) დაკმაყოფილდა.

მუხლის ტრავმამ დავითაძეს აკვრაში საკუთარი შესაძლებლობების ბოლომდე გამოვლენის საშუალება არ მისცა. ამის მიუხედავად, მან ამ მოძრაობაში 195 კილოგრამით მესამე ადგილი დაიკავა. პირველი-მეორე ადგილები მკრტიჩიანმა (210 კგ) და ჰოვანისიანმა (196 კგ) გაიყვეს. ორჭიდის ჯამმა  ქართველ ათლეტს ვერცხლის მედალი მოუტანა.

89 კგ

  1. ჰაკობ მკრტიჩიანი (სომხეთი) – 375 (165+210)
  2. რევაზ დავითაძე (საქართველო) – 363 (168+195)
  3. დავიდ ჰოვანისიანი (სომხეთი) – 357 (161+196)

ამრიგად, შეჯიბრების დამთავრებამდე ორი დღით ადრე ქართველმა ძალოსნებმა ბუქარესტში 16 მედალი მოიპოვეს - 6 ოქროსი, 5-5 ვერცხლისა და ბრინჯაოსი.

შაბათს ევროპის ჩემპიონატზე ახალგაზრდებს შორის 109 კილოში აკაკი ტალახაძე, ხოლო +109 კილოში თორნიკე ტაბატაძე მოსინჯავს ძალებს. კვირას კი შეჯიბრებაში მსგავსი ტურნირების მრავალგზის გამარჯვებული გიორგი ჩხეიძე (+109 კგ) ჩაებმება.

* * *

ბუქარესტშივე მიმდინარე იუნიორ ძალოსანთა ევროპის ჩემპიონატზე პარასკევს 96 კგ წონით კატეგორიაში ორი ქართველი ძალოსანი ასპარეზობდა.

ზაზა ლომთაძემ ატაცში 145/149 კილოგრამი დაძლია და მე-9 ადგილზე გავიდა. ძალოსანმა აკვრაში 175/182/188 გაართვა თავი და მე-6 ადგილი ერგო, ორჭიდში მოგროვებული 337 კილოგრამით კი მე-8 საფეხურზე დადგა.

რაც შეეხება ირაკლი გობეჯიშვილს, ძალოსანმა რომელსაც მსგავსი რანგის ტურნირზე დებიუტი ჰქონდა, ატაცში თავი 145/150 კილოგრამს გაართვა და მე-7 საფეხურზე დადგა. გობეჯიშვილი აკვრაში დაძლეული 175/182 კილოგრამით მე-9 საფეხურზე იყო, იგივე ადგილი ერგო ორჭიდის 332 კილოგრამითაც.

1331
მკითხველის კომენტარები / 0 /
მსგავსი ამბები
რუბრიკის სხვა სიახლეები
;