[განახლებული, VIDEO] U17. ტაჯიკეთთან დამარცხებული საქართველო მეხუთე ადგილისთვის ფინეთს შეხვდება

მინსკში გრძელდება XVI საერთაშორისო ტურნირი "განვითარების თასი", რომლის ორგანიზატორიც ბელრუსის ფეხბურთის ფედერაციაა. 23 იანვარს ჯგუფური ეტაპის გადამწყვეტი მატჩები გაიმართა. თურმე, საქართველოს დიდი იმედგაცრუება ელოდა...

ზოგადად, მესამე სათამაშო დღე B ჯგუფის ლიდერებისთვის "შავი დღე" იყო. ნული ქულით ბოლო ადგილზე მყოფმა ისლანდიამ ლიდერი ისრაელი (რომელსაც ჩვენი მძლეველი ტაჯიკებისთვის მეორე ტურში 4:0 ჰქონდა მოგებული) 2:0 დაამარცხა. საქართველომ კი ტაჯიკეთთან 1:2 დათმო და პირველობის ნაცვლად, მხოლოდ მესამე ადგილს დასჯერდა.

არადა, საქართველოს 17-წლამდელთა ნაკრებს ჰქონდა შანსი, ჯგუფში პირველი ადგილი დაეკავებინა, რადგან მესამე ტურის წინ, ისრაელთან ერთად, 4-4 ქულით პირველ-მეორე ადგილებს ინაწილებდა. სულ მცირე, გიორგი ჩიტაურის გუნდს მესამე ადგილისთვის უნდა ებრძოლა, მაგრამ მოხდა ძალზე მოულოდნელი რამ...

ტაჯიკები, რომლებმაც პირველ ტურში ისლანდიასთან 2:1 მოიგეს და მესამე ადგილზე იყვნენ, ფინალში გასვლის იმედად მოედანზე მობილიზებულები გავიდნენ. მათ მე-5 წუთზე საკმაოდ სახიფათო შეტევა წამოიწყეს, მაგრამ ჩვენმა მეკარე ლუკა ხარატიშვილმა საიმედოდ ითამაშა.

მე-8 წუთზე ანგარიშის გახსნა საქართველოს შეეძლო, მაგრამ ლუკა სალუქვაძემ კარში დარტყმა ვერ მოახერხა. სამაგიეროდ, ჩვენებმა ეს მე-14 წუთზე შეძლეს - ჯარიმის შესრულების შემდეგ მეტოქის საჯარიმოში ყველას თორნიკე დუნდუამ დაასწრო და თავისიანები ზუსტი თავურით დააწინაურა - 1:0.

29-ე წუთზე ქართველ შემტევს ტაჯიკების კარის აღება მეორედაც შეეძლოთ, მაგრამ ახლო მანძილიდან ვერ გაიტანა, ისევე, როგორც 33-ე წუთზე, როცა მისი თავურის შემდეგ ტაჯიკები ძელმა იხსნა.

ამის შემდეგ გაუგებარი რამ მოხდა. 36-ე წუთზე ჩვენებმა დაცვაში ძალიან უყურადღებოდ ითამაშეს და აინი ალიჯანიმ წონასწორობა აღადგინა.

მეორე ტაიმშიც უპირატესობას საქართველო ფლობდა, თუმცა არაერთი საგოლე შანსი დაიკარგა. 44-ე წუთზე კარის წინ მარტო დარჩენილმა გიორგი ჩხეტიანმა მიზანს ააცილა. 54-ე წუთზე იმავე ჩხეტიანის თავურზე ამჯერად მეკარემ იყოჩაღა...

მეორე ტაიმში ჭაბუკმა ქართველებმა ყველაზე რეალური საგოლე მომენტი 57-ე წუთზე შექმნეს: ფლანგური გადაცემის შემდეგ ჯადული იობაშვილი კარის წინ მცველებს გაექცა, მაგრამ მეკარის წინ მარტო დარჩენილმა მიზანს ააცილა...

ამდენი გამოუყენებელი მომენტისთვის საქართველოს ნაკრები მატჩის დასრულებამდე 3 წუთით ადრე დაისაჯა - ტაჯიკთა სწრაფი კონტრშეტევისას ჩვენი ნაკრების დაცვა ისევ ჩავარდა და მამედ აზიზოვმა თავის გუნდს გამარჯვება მოუტანა.

ტაჯიკეთი-საქართველო  2:1
გოლები: 0:1 დუნდუა (13), 1:1 ალიჯანი (36), 2:1  აზიზოვი (77)
საქართველო: ხარატიშვილი, ზოსიაშვილი (72. ონიანი), ხვადაგიანი, დუნდუა (41. გ. მამაგეიშვილი), უბილავა (41. გვიშიანი), ტატიშვილი (41. გაგნიძე), აბჟანდაძე (41. აბუაშვილი), სალუქვაძე, უგრეხელიძე (62. ო. მამაგეიშვილი), თუთაშვილი (41. ჩხეტიანი), იობაშვილი; სათადარიგოები: ასათიანი, ავალიანი.

საბოლოოდ, B ჯგუფში სატურნირო ცხრილმა ასეთი სახე მიიღო: 1. ტაჯიკეთი (6 ქულა); 2. ისრაელი (4); 3. საქართველო (4); 4. ისლანდია (3).

საქართველო ახლა V ადგილისთვის იბრძოლებს. 25 იანვარს ჩიტაურის გუნდი A ჯგუფის მესამეადგილოსან ფინეთს (რომელმაც ბოლო ტურში უზბეკეთს 2:1 მოუგო) დაუპირისპირდება. თბილისის დროით მატჩი 13:15 საათზე დაიწყება.


2131
მკითხველის კომენტარები / 3 /
Tbiliskii
0
Vinc dasazaxebelia da martla nijieria imas ar ezaxis treneri da imis bralia yajikebi da avganelebi ro gvigeben ukve
კახაბერი
0
მიზეზი: კორუფცია და ნეპოტიზმი....; შედეგი : ქვეშჩასვრილი ქართული ფეხბურთი
მსგავსი ამბები
რუბრიკის სხვა სიახლეები
;