გაორებული გრძნობები: კაკაბაძე 'ლუცერნში' წარადგინეს

უკვე ოფიციალურად - ოთარ კაკაბაძე "ლუცერნის " ფეხბურთელია. შვეიცარიულმა კლუბმა საქართველოს ნაკრების მარჯვენა მცველი უკვე წარადგინა კიდეც.

"ლუცერნის" ახალწვეულმა კლუბთან კონტრაქტი 2021 წლის 30 ივნისამდე გააფორმა. შვეიცარიული მედიის ცნობით, "ლუცერნს" ეს ტრანსფერი 500 ათასი ევრო დაუჯდა.

"ოთარ კაკაბაძის ტრანსფერით, გუნდმა მარჯვენა ფლანგზე კარგი მოთამაშე დაიმატა და გაძლიერდა. ის ახალგაზრდა, წარმატებას მოწყურებული ფეხბურთელია. დარწმუნებული ვართ, მას თავისი პოტენციალი ბოლომდე არ გამოუვლენია", - აღნიშნა წარდგენისას "ლუცერნის" სპორტულმა დირექტორმა რემო მაიერმა.

კომენტარი კაკაბაძემაც გააკეთა: "ბედნიერი ვარ "ლუცერნში" გადმოსვლით. მოუთმენლად ველოდები იმ დღეს, როცა პირველად ვითამაშებ ახალი კლუბის მაისურით და თანაგუნდელებს დავეხმარები. დიდი მადლობა შესანიშნავი დახვედრისთვის".

შეგახსენებთ, რომ კაკაბაძის სახელს ზაფხულში ლა ლიგასაც უკავშირებდნენ და "ხეტაფეს" ვარიანტიც სახელდებოდა, თუმცა 23 წლის მცველი, საბოლოოდ, "ლუცერნში" ვაკო გვილიას გვერდით აღმოჩნდა.

შვეიცარიულმა გამოცემამ ყურადღება ამ ფაქტზეც გაამახვილა: "ახალ გუნდში კაკაბაძეს დახვდება მისი მეგობარი, ნახევარმცველი ვაკო გვილია, რომელთან ერთადაც ის საქართველოს ნაკრებში თამაშობს. გვილიაც და კაკაბაძეც კლუბის სელექციონერებმა მსოფლიოს ჩემპიონატის შესარჩევი ციკლის შეხვედრებისას აღმოაჩინეს. მათ მშვენიერი შემოქმედებითი თვისებები გამოავლინეს, რამაც კლუბის წარმომადგენელთა შთაბეჭდილებებზე გადამწყვეტი გავლენა იქონია".

"ლუცერნცაიტუნგი" ფინანსურ მხარეს შეეხო: "კაკაბაძეს ტარაგონას "ჟიმნასტიკთან" კონტრაქტი მიმდინარე სეზონის ბოლომდე (2019 წლის ზაფხული) აკავშირებდა. მაგრამ ტარაგონელებმა მისი გაყიდვა გადაწყვიტეს. ქართველი ლუცერნშია და კონტრაქტიც გააფორმა, მაგრამ ეს ჯერ საკმარისი არ არის საიმისოდ, რომ კვირას "გრასჰოპერსის" წინააღმდეგ ითამაშოს. კაკაბაძეს შვეიცარიაში ჯერ სამუშაო უფლების მიღება დასჭირდება".

"ლუცერნში" გადასვლისთანავე კაკაბაძე ყოფილი კლუბის, "ჟიმნასტიკის" გულშემატკივრებს თბილად დაემშვიდობა. საქართველოს ნაკრების მცველმა განცხადება ოფიციალურ გვერდზე გამოაქვეყნა.

"დღეს გაორებული გრძნობების დღეა. ერთი მხრივ, ვემშვიდობები კლუბს, რომელიც დამეხმარა ბოლო 2 წლის განმავლობაში, მერწმუნა საკუთარი თავის და დიდი წვლილი შეიტანა ჩემს განვითარებაში.

სამწუხაროდ, პირველი სურვილი ვერ შევუსრულე. მინდა ამის გამო ბოდიში მოვუხადო გულშემატკივრებს. მეორე მხრივ კი, მადლობას ვუხდი დირექტორს, თანაგუნდელებს და გულშემატკივრებს იმ მხარდაჭერისთვის, რაც მივიღე ჩემი ესპანური კარიერის განმავლობაში. ეს ყველაფერი ძალიან ლამაზი იყო და იმედი მაქვს, ერთ დღესაც დავბრუნდები. დიდ წარმატებას ვუსურვებ "ჟიმნასტიკს" ახალ სეზონში. იმედია, გუნდი ყველა დასახულ მიზანს მიაღწევს.

მინდა განსაკუთრებული მადლობა გადავუხადო ემილიო ვიკეირას - ეს არის ადამიანი, რომელმაც მომცა შანსი და დამეხმარა ამ ლამაზ ეტაპზე. "ვისკა ნასტიკ!" - გეხუტებით ყველას", - წერს კაკაბაძე.

ყოველდღიური სპორტული გაზეთი "ლელო"
1054
მკითხველის კომენტარები / 0 /
მსგავსი ამბები
რუბრიკის სხვა სიახლეები
;