გასაოცარი სტატისტიკა  ჩვენი რეალობისთვის:  თამაშებს საშუალოდ  9 ათასი ადამიანი უყურებს 

მოულოდნელი და სასიამოვნო ციფრია: პირველ წრეში ეროვნული ლიგის მატჩების ინტერნეტრეპორტაჟების ნახვების საერთო რაოდენობამ 407 259 შეადგინა, - ეს ინფორმაცია ეროვნული ლიგის ოფიციალურმა ვებგვერდმა გამოაქვეყნა. 

სულ პირველ წრეში 45 მატჩი ჩატარდა, ანუ ერთ მატჩს საშუალოდ 9 050 ინტერნეტმაყურებელი ჰყავდა...

ანგისიდან ვოქსამდე ფეხით სიარული

ამ მონაცემების გამოქვეყნებას გულშემატკივართა გამოხმაურება მოჰყვა. აი, რას წერენ სოციალურ ქსელებში:

“ბათუმმა უკვე დაამტკიცა, რომ ეროვნულ ლიგას უნდა უყურო. უყურო იმიტომ, რომ ბათუმმა თავისი გულშემატკივრებით სიახლე შეიტანა, რასაც წლებია, ერი მონატრებულია. წინ ბათუმის “დინამო”! ჩვენ ჩემპიონები ვართ!

...”ეგ კარგია, მაგრამ უფრო კარგი იქნება თუ ამას სტადიონიდან უყურებთ. თამაშები კი არა ინტერნეტტელევიზიამ, არამედ, რომელიმე არხმა უნდა გააშუქოს”...

...”იმედია, რეპორტაჟების ხარისხი გამოსწორდება”.

...”ყურება ნელ-ნელა მატულობს. როგორც კი საქმის კეთება დაიწყეს, დაეტყო კიდეც”.

ბათუმელთა გულშემატკივარმა გენო თებიძემ ასეთი პოსტი გამოაქვეყნა: “ბათუმის “დინამოს” სტადიონზე მისვლა იმითაც მაგარია, რომ ამდენი გულანთებული ვაჟკაცი და ქვეყნის მოტრფიალე ახალგაზრდები იხილო! რა ლამაზი სანახავი იყო, ჯერ შესვლის დროს გადაჭედილი, ძლივს ფეხზე დასადგომი იდგილის პოვნა, მერე იმ “საგიჟეთში” ხმის “დატოვება” და ბოლოს ბედნიერ ადამიანებთან ერთად ანგისის “სტადიონიდან” ვოქსამდე ფეხით სიარული”.

353 600 ათასი  დაინტერესებული

აქვე გთავაზობთ საინტერესო სტატისტიკას, რომელიც მეტყველებს იმაზე, რომ საფეხბურთო ლიგისადმი ინტერესს საკმაოდ ბევრი ადამიანი ავლენს. ეს სტატისტიკა შედგენილია “ფეისბუქში” ეროვნული ლიგის კლუბების ოფიციალური გვერდების მოწონებების (ე.წ. ლაიქების) მიხედვით. სულ, ეროვნული ლიგის და ლიგა 2-ის გუნდების მოწონებების რაოდენობა 353 600 ათასს აღწევს.

ეროვნული ლიგა
დინამო (თბ) 167 000
ტორპედო 28 000 
დინამო (ბთ) 19 000
ლოკომოტივი 18 000
საბურთალო 17 000 
დილა 15 000
ვიტ ჯორჯია 13 000
ჩიხურა 11 000
სიონი 7 200
რუსთავი 6 300
სულ 301 500 

ეროვნული ლიგა 2
გაგრა 11 000
კოლხეთი (ფ) 9 000
ზუგდიდი 5 600
ცხინვალი 5 200 
თელავი 5 100
გურია 5 200
სამტრედია 5 100
შევარდენი 1906 3 600
მერანი (თბ) 2 300
შუქურა ?
სულ 52 100

თამაშის დღეს ქალაქი ფეხბურთისთვის ემზადება 

სადავო არაა, რომ ეროვნული ლიგა ბათუმის “დინამოს” დაბრუნებამ გამოაცოცხლა და ინტერესიც ამის გამო გაიზარდა. ამ თემაზე “ლელოსთან” ბათუმის “დინამოს” სპორტულმა დირექტორმა ასლან ბალაძემ ილაპარაკა. შეგახსენებთ, რომ ბალაძე პირველი ეროვნული ჩემპიონატისა და საქართველოს ნაკრების პირველი მატჩის მონაწილეა.

“ეროვნული ჩემპიონატი დაწყების დღიდან მახსოვს. სულ ვოცნებობდით, რომ ჩვენს თამაშებზე ბევრი მაყურებელი ყოფილიყო. პირველ წლებშიც ასეც იყო - დღეს რომ გვიკვირს, იმდენი ხალხი მაშინ სულ დადიოდა... მაგრამ ეს იყო 29 წლის წინ, მას შემდეგ იყო დიდი წყვეტა, დიდი იმედგაცრუება და ჩავარდნა. ბათუმის “დინამოსა” და “საბურთალოს” თამაშზე 5 ათასი თუ მეტი მაყურებელი რომ მოვიდა, იმიტომ გვიხარია, რომ ხალხი ფეხბურთისკენ შემოტრიალებას იწყებს. ამ მატჩს ფეხბურთის ფედერაციის ხელმძღვანელები ესწრებოდნენ და გაოცებულები იყვნენ, თითქოს სხვა პლანეტაზე მოვხვდითო.

პირადად მე ბათუმში მსგავსი აჟიოტაჟი არ მახსენდება. თამაშის დღეს ქალაქი ფეხბურთისთვის ემზადება. სტადიონი თამაშამდე ერთი საათით ადრე, ფაქტობრივად, გავსებული იყო. საცოდაობა არ იყო, 2006 წლის შემდეგ ამ საფეხბურთო ქალაქში სტადიონი რომ არ გვქონდა?!”.

ბათუმელთა სპორტული დირექტორი “ლელოში” გამოქვეყნებულ წერილსაც გამოეხმაურა: 

“თქვენს გაზეთში ეწერა - ახლა ბათუმში ისეთი საფეხბურთო ბუმია, შესაძლოა, ბილეთების გადამყიდველებიც გაჩნდნენო. ამ მოვლენას სხვა კუთხითაც შევხედავდი - შესაძლოა, ბათუმში დაწყებულმა ბუმმა ქართულ ფეხბურთს და ჩემპიონატს სხვა მუხტი მისცეს, რადგან ეროვნულ ლიგაში კონკურენცია გაიზარდა, გულშემატკივრის ფაქტორი კი გუნდის წარმატებას განსაზღვრავს. იმედია, მსგავსი რამ სხვა ქალაქებშიც მოხდება”.
ნავალოვსკის სტიმული

ეროვნული ნაკრების მცველ გიორგი ნავალოვსკი რუსეთის, ბელარუსის, აზერბაიჯანისა და საბერძნეთის ჩემპიონატებში უთამაშია. მისი თქმით, ბათუმელი გულშემატკივრებითა და სტადიონზე ნანახით გაოცებულია: 

- ხალხის გარეშე ფეხბურთის თამაში უინტერესოა, სტიმული და ძალა გაკლდება. რეალურად, “საბურთალოსთან” ხალხის თანადგომამ მოგვაგებინა. 0:2-ს რომ ვაგებდით, გულშემატკივრებმა გინება და სტვენა კი არ დაგვიწყეს, გვამხნევებდნენ. 

- ის ტემპი, რაც “დინამო”-”საბურთალოს” მატჩისას ვიხილეთ, საქართველოში აქამდე წარმოუდგენელი ჩანდა... 

- ჩვენს ჩემპიონატში მსგავს ტემპში თამაშს მეც ვერ წარმოვიდგენდი. არ ვიცი, გუნდმა და თითოეულმა ჩვენგანმა ამის ძალა სად მონახა, მაგრამ ფაქტია, ასეთი გულშემატკივრობის გამო ვეღარ ვჩერდებოდით. ხალხმა მაგრად დაგვმუხტა... სხვათა შორის, მსგავსი თამაშები რუსეთის პირველ ლიგასა და ბელარუსში თითქმის არ მახსენდება. პატარა ევროპა იყო და ვისურვებდი, რომ ასეთი ბევრი თამაში გვქონდეს. ჩემპიონატის დონე მხოლოდ ასეთი თამაშებით და გულშემატკივრობით აიწევს. 

- შემდეგი მატჩი ქუთაისის “ტორპედოსთან” გელით. წყალტუბოშიც არანაკლებ დაძაბული თამაში და არანაკლები გულშემატკივრობაა მოსალოდნელი...

- ძალიანაც კარგი! ქუთაისელებს ფეხბურთი რომ უყვართ და სტადიონზე ბევრი ხალხი დადის, ეს ყველამ იცის. ეს მოთამაშეებისთვის დიდი მოტივაციაა და, რაც მთავარია, პასუხისმგებლობას გვიზრდის. ისევ ბათუმელებზე ვიტყვი - “ჩიხურასთან” წვიმდა, მაგრამ იმდენი ხალხი მოვიდა, თამაში მარტო მათი გულისთვის გვიღირდა. ნეტავ ასეთი ფანები ყველა გუნდს ჰყავდეს, ბევრად საინტერესო თამაშები იქნებოდა. ასეთ ატმოსფეროში მოედანზე გასვლა დიდი სიამოვნებაა. 

2049
მკითხველის კომენტარები / 1 /
სოსო
0
ბათუმის დინამო და მისი სტადიონი სინქრონულად შენდება და იქნებ ისეც მოხდეს,რომ ახალ სტადიონზე ისეთი გუნდი გავიდეს,რომელიც ევროლიგის ჯგუფურ ეტაპზე გასვლის პრეტენზიას განაცხადებს.
მსგავსი ამბები
რუბრიკის სხვა სიახლეები
;