გაურკვევლობა 'ჩელსიში' - სარის მიმართ კრიტიკა მატულობს

კლაუდიო რანიერის თავის დროზე, „ჩელსიში“ მუშაობის დროს, ყველა აკრიტიკებდა ზედმეტი დაბნეულობისა და ჩამოუყალიბებლობის გამო.

ამჯერად კი საქმე უფრო რთულად არის. არანაკლები კრიტიკა შეხვდა მაურიციო სარის. ბოლო დროს „ჩელსიმ“ აურია და ეს ამ ამბის გამოძახილი უნდა იყოს...

მაურიციო სარი გაურკვევლობაშია. კრიზისი ახლა უფრო ღრმაა. ეს მას შემდეგ, რაც „ჩელსიმ“ ლონდონურ დერბიში 0:2 წააგო „არსენალთან“. სარიმ ვერ გაიგო, როგორ უნდა ათამაშოს ერთად მატეო კოვაჩიჩი და როს ბარკლი, ჟორჟინიო და ნგოლო კანტე.

16-ჯერ პრემიერლიგაში და ერთხელ თასზე მოხდა ისე, რომ სარიმ კოვაჩიჩი შეცვალა ბარკლით, ან პირიქით. ეს უკვე რაღაც აკვიატებას ჰგავს. ასე მოხდა ლონდონური დერბის დროსაც. მატჩი კოვაჩიჩმა დაიწყო, მის ნაცვლად კი 63-ე წუთზე თამაშში ბარკლი ჩაერთო...

კოვაჩიჩს 90 წუთი არასოდეს უთამაშია პრემიერლიგაში. რაც შეეხება ბარკლის, მან 19 შეხვედრაში ითამაშა და მხოლოდ 7-ჯერ იყო სასტარტოში.

სარის ბოლო დროს მძაფრად აკრიტიკებენ იმის გამოც, რომ ოპტიმალურ პოზიციებზე არ ათამაშებს ედენ აზარსა და კანტეს. ამ უკანასკნელმა ბოლო დროს უფრო და უფრო ახლოს წაიწია თავდამსხმელებთან. ხოლო, რაც შეეხება აზარს, ალვარო მორატას მიმართ ნდობის ვოტუმის ამოწურვის შემდეგ ის ხშირად „9 ნომრის“ პოზიციაზე ირჯება.

ახლა მორატა უკვე „ატლეტიკოს“ ფეხბურთელია. ვნახოთ, ეს შანსი იქნება ოლივიე ჟირუსათვის, თუ აზარი ისევ ცენტრფორვარდად მოგვევლინება...

„ძალიან გაბრაზებული ვარ იმით, რაც ვნახე ლონდონურ დერბიში. ეს არ იყო ის, რისკენაც მივდივართ. ფეხბურთელებში ვერ ვნახე დიდი ლტოლვა გამარჯვებისკენ და შეუძლებელია, რომ ამას რამენაირად შევეგუოთ. ჩვენ დღეს ფეხბურთს არ ვთამაშობდით...

...რა თქმა უნდა, როცა გუნდი მარცხდება, პირველ რიგში ,პასუხისმგებელი მწვრთნელია, მაგრამ მე ვფიქრობ, ლონდონურ დერბიში ნაწვნევი მარცხის სიმწარე ყველამ ერთად უნდა გავიზიაროთ. ჩვენ არ წაგვიგია ტაქტიკური თვალსაზრისით. უბრალოდ, არ იყო მებრძოლი სული. მოწინააღმდეგე შეტევაში გაცილებით მწვავედ მოქმედებდა. ეს არის ის, რაც უსათუოდ უნდა გამოვასწოროთ“, - განაცხადა სარიმ, ვისაც ზოგიერთი ინგლისელი ექსპერტი მალე „ჩელსიდან“ გაშვებას უწინასწარმეტყველებს.

ყოველდღიური სპორტული გაზეთი "ლელო"
837
მკითხველის კომენტარები / 0 /
მსგავსი ამბები
რუბრიკის სხვა სიახლეები
;