გაცვლა, რომლის წყალობითაც ბითაძე შეიძლება ნიუ ორლეანში აღმოჩნდეს

20 ივნისს NBA-ის დრაფტზე გოგა ბითაძე მე-18 ნომრად „ინდიანა პეისერსმა“ აიყვანა. ამერიკული მედიის დიდი ნაწილი პესიმისტურად უყურებს გოგას სიტუაციას „ინდიანაში“ - ექსპერტების მტკიცებით, მაილს ტერნერთან და დომანტას საბონისთან ერთად როტაციაში გოგას ძალზე ცოტა სათამაშო დრო მიეცემა.

Def Pen წერს, რომ არის შანსი გოგას ეს არცთუ სახარბიელო პერსპექტივა შეიცვალოს - გამოცემა „ნიუ ორლეანში“ შექმნილ სიტუაციას ეხმაურება.

„პელიკანსმა“ „ლეიკერსს“ ენტონი დევისი რამდენიმე კალათბურთელში გაუცვალა, ხოლო დრაფტის პირველ ნომრად ფორვარდი ზაიონ უილიამსონი აიყვანა. გამოცემის აზრით, ზაიონს გვერდში კარგი ცენტრი ესაჭიროება - 8 კანდიდატს შორის ნომერ პირველ ვარიანტად კი „ინდიანას“ ცენტრი მაილს ტერნერი მიიჩნევა:

„პელიკანსში იციან, რომ ეს შესაძლოა, აუხდენელი ოცნებაა, თუმცა ინდიანას წინახაზი გადაჭედილია - მაილსი სათამაშო დროს უყოფდა საბონისსა და თადეუს იანგს. იანგი, ალბათ, ახალ კლუბს იშოვის, მაგრამ „პეისერსმა“ ახლა ახალი ცენტრი დრაფტიდან დაიმატა - გოგა ბითაძე. გოგა მართლაც კარგი ცენტრია და ის უკვე მზად არის NBA-ში სათამაშოდ. ის შესანიშნავად აყენებს „სქრინებს“, არის კარგი მსროლელი შორი დისტანციიდან და კარგად კითხულობს თამაშს ფარქვეშ. რომ დავუფიქრდეთ, თუ „პეისერსს“ არ სურს ტერნერთან განშორება, შესაძლოა, „ნიუ ორლეანმა“ „ინდიანას“ ბითაძის დატრეიდების ინიციატივით მიმართოს“, - წერს ექსპერტი და რედაქტორი დევიდ მოროუ. 

შეგახსენებთ, რომ გოგასა და ზაიონის გზები ერთხელ უკვე გადაიკვეთა - ინტერნეტი მოიარა დრაფტის მედია, დღის ფოტომ, სადაც ზაიონ უილიამსონი და გოგა ბითაძე ერთად წარუდგნენ ჟურნალისტებს, თუმცა ამერიკელმა ქართველს მედიის მთელი ყურადღება „მოპარა“. სხვათა შორის, ამ ფაქტმა ამერიკაში გოგას ცნობადობაზეც დადებითად იმოქმედა. 

ყოველდღიური სპორტული გაზეთი "ლელო"
1263
მკითხველის კომენტარები / 0 /
მსგავსი ამბები
რუბრიკის სხვა სიახლეები
;