გაწევ-გამოწევა და სუპერმეკარეები მერსისაიდულ დერბიში

ინგლისის პრემიერ ლიგის 33-ე ტურის შეხვედრაში "ევერტონმა" "ლივერპულს" უმასპინძლა. მერსისაიდული დერბი უგოლო გამოდგა.

პირველ ნახევარში რამდენიმე სახიფათო ეპიზოდი შეიქმნა, თუმცა ლივერპულური გუნდის მეკარეები მოწოდების სიმაღლეზე იყვნენ და რამდენიმე მშვენიერი სეივი შემოგვთავაზეს.

განსაკუთრებით დიდი დატვირთვა ჰქონდა "ევერტონისა" და ინგლისი ნაკრების კიპერს, ჯორდან პიკფორდს, რომელმაც "გუდისონ პარკის" ბინადარები გაშვებული გოლისაგან რამდენჯერმე იხსნა. მან თანამემამულეების, ჯეიმს მილნერისა და დომინიკ სოლანკის მიერ დარტყმული ბურთები მოიგერია.

"ლივერპულის" მეკარემ, ლორის კარიუსმა კი 1 სეივით დაამახსოვრა გულშემატკივარს თავი. გერმანელი იანიკ ბოლასის დარტყმულს ბრწყინვალე ნახტომით გაუმკლავდა, რომლის მეშვეობითაც ბურთი თითებით მოიგერია.

მეორე ნახევარში მერსისაიდული დერბისათვის დამახასიათებელი გაწევ-გამოწევა ატყდა. ერთმანეთს შიმუს კოულმანი და დენი ინგსი დაუპირისპირდნენ, კონფლიქტში გუნდების თითოეული წევრი ჩაერთო, თუმცა ინგსმა გაცლა არჩია და ყველაფერი მშვიდობიანად, ბარათების გარეშე დასრულდა.

აღსანიშნავია, რომ არბიტრს ბარათის ამოღება არ დასჭირდა, ეს კი ლივერპულური დერბისათვის უცხო ხილია.

"წითლები" უპირატესობას მთელი მატჩის განმავლობაში ფლობდნენ, თუმცა მე-80 წუთის შემდეგ ყველაფერი შეიცვალა. თითქოს "ევერტონი" ბოლო 10 წუთისთვის ინახავდა ძალებს. "კანფეტები" გააქტიურდნენ და შეტევების ქარიშხალი დაატეხეს თავს იურგენ კლოპის გუნდს, არაერთი საგოლე ეპიზოდიც შექმნეს, თუმცა გოლის გატანა ვერაფრით ვერ შეძლეს.

მატჩის ბოლოს ასეთი რადიკალური ცვლილების გამო, შეიძლება ითქვას, რომ ქულა ორივე გუნდმა დაიმსახურა, თუმცა ისიც უნდა აღინიშნოს, რომ ჩემპიონთა ლიგაზე "მანჩესტერ სიტისთან" მატჩის შემდეგ და განმეორებითი შეხვედრის სამზადისში მყოფი "ლივერპული" მინდორზე გადახალისებული შემადგენლობით გამოვიდა. ძირითადში დაიწყეს სოლანკიმ და დენი ინგსმა, ასევე უთამაშებელმა ნათანიელ კლაინმა და ტრავმის შემდეგ დაბრუნებულმა რაგნარ კლავანმა.

456
მკითხველის კომენტარები / 0 /
მსგავსი ამბები
რუბრიკის სხვა სიახლეები