გეგა დიასამიძე: ფეხბურთელი მხოლოდ ხელფასზე არ უნდა ფიქრობდეს...

"საბურთალოს" პირველი ახალწვეული ჰყავს - გიორგი ჭიაბრიშვილის გუნდში 2018 წლიდან გეგა დიასამიძე ითამაშებს. ეს სატრანსფერო სიახლე კლუბმაც დაგვიდასტურა და თავად თბილისის "ლოკომოტივისა" და ეროვნული ლიგის ერთ-ერთმა გამორჩეულმა მოთამაშემაც.

დიასამიძემ გასული სეზონი ჩინებულად ჩაატარა. 25 წლის შემტევმა ნახევარმცველმა "ლოკომოტივის" მაისურით 4 გოლი გაიტანა და ყველაზე მეტი, 8 საგოლე გადაცემა შეასრულა.

"საბურთალოს" პირველ ახალწვეულთან "ლელომ" ინტერვიუ ჩაწერა:

- როგორც შევიტყვეთ, "საბურთალოს" ფეხურთელი გახდით...

- დიახ, ასეთი გადაწყვეტილება მივიღე და კლუბთან კონტრაქტიც გავაფორმე.

- ხელშეკრულება რა ვადით გააფორმეთ?

- "საბურთალოში" 2 წლით ვითამაშებ, 2019 წლის ბოლომდე.

- "ლოკომოტივიდან" რატომ წამოხვედით?

- კლუბთან კონტრაქტი რომ დამისრულდა, ამ დროს ყველაზე რეალური და მისაღები წინადადება "საბურთალოსგან" მივიღე. სამწუხაროდ, მოხდა ისე, რომ "ლოკომოტივის" დატოვება მომიხდა. არადა, ამ კლუბის, მისი ხელმძღვანელობისა და მწვრთნელის მადლიერი ვარ და ამას ყოველთვის ვიტყვი. გუნდში ბოლო სამი წელი ვთამაშობდი და რეალურად, ჩემი შესაძლებლობების გამოვლენის საშუალება მომცეს.

- სხვა მიწვევები არ გქონიათ?

- შემოთავაზებები მქონდა, მაგრამ "საბურთალოში" თამაში ვამჯობინე, რადგან ძალიან ამბიციური და საინტერესო გუნდი ყალიბდება.

- რომელი გუნდები გიწვევდნენ?

- მაგალითად, გორის "დილა" და ერთ-ერთი პორტუგალიური გუნდი.

- ...და პორტუგალიას საქართველოში დარჩენა ამჯობინეთ...

- ეს 2-3 კვირაში უნდა გარკვეულიყო და საერთოდაც, ბევრი რამ მქონდა გასარკვევი. მაგრამ საბოლოოდ, დალოდებას "საბურთალოს" წინადადებაზე დათანხმება ვამჯობინე. ჯერ იმიტომ, რომ რეალური ვარიანტი იყო. მეორე - ძალიან ამბიციური და საინტერესო გუნდი ყალიბდება და მესამე - მჯერა, ამ გუნდში ჩემნაირი სტილის ფეხბურთელს აფასებენ და თავის გამოჩენის შანსი მომეცემა.

- გულისხმობთ, რომ "საბურთალოს", ასე ვთქვათ, ბურთის გაგორება უყვარს?

- სწორედ ამას ვგულისხმობდი. ბურთის გაგორება ბევრს უყვარს, მაგრამ არ გამოსდის. "საბურთალოს" კი ამ კუთხით საქართველოში საუკეთესო პროცენტული მაჩვენებლები ჰქონდა, რაც ეროვნული ლიგის ვებგვერდზე გამოქვეყნებული სტატისტიკიდან გავიგეთ.

სხვათა შორის, არჩევანის გაკეთებისას, სწორედ ამან ითამაშა გადამწყვეტი როლი. ფეხბურთელი მხოლოდ ხელფასზე არ უნდა ფიქრობდეს - უნდა იფიქროს, დაინტერესებული კლუბებიდან რომელია მისთვის უფრო ახლობელი და მისაღები ვარიანტი.

ყოველდღიური სპორტული გაზეთი "ლელო"
1148
მკითხველის კომენტარები / 0 /
მსგავსი ამბები
რუბრიკის სხვა სიახლეები
;