გეგა დიასამიძე: ხალხი მხოლოდ მაშინ მოვა სტადიონზე, თუ ევროსარბიელზე კარგად ვითამაშებთ

გეგა დიასამიძე ეროვნული ლიგის მიმდინარე სეზონში “საბურთალოსა” და ეროვნული ლიგის ერთ-ერთი გამორჩეული მოთამაშეა.

ნახევარმცველის კვალობაზე, 26 წლის მოთამაშე მშვენიერი შედეგიანობით გამოირჩევა - სეზონში გატანილი 7 გოლითა და 4 საგოლე პასით ჩემპიონატის საუკეთესო მოთამაშეებშია.

გეგა დიასამიძეს პირად შედეგზე, “საბურთალოზე”, მოახლოებულ ევროსეზონსა და სხვა თემებზე ველაპარაკეთ:

- სეზონი ცუდად ნამდვილად არ დაწყებულა. აქამდე ყველაზე მეტი გოლი შარშან გავიტანე, როცა “საბურთალო” ჩემპიონი გახდა - მაშინ 7 გოლი მქონდა. ანუ ზუსტად იმდენი, რამდენიც ახლა 17 ტურში მოვახერხე. რა თქმა უნდა, ეს ძალიან მახარებს. იმედია, სეზონის დარჩენილ ნაწილს უკეთესად ჩავატარებ.

- წელს “საბურთალო” ლიდერებშია, მაგრამ შარშანდელივით დამაჯერებელი ვერ არის. საჩემპიონო შიმშილი ხომ არ გაქრა?

- ნამდვილად არ გამქრალა, ჩემპიონობა შარშანაც გვინდოდა და წელსაც გვინდა. ეგაა, შარშან წაგებული თამაშების შემოტრიალებას ვახერხებდით, წელს კი რამდენიმე მოსაგები თამაში წავაგეთ. მაგალითად, ბათუმის “დინამოსთან”. მაგრამ 19 ტური წინაა და მჯერა, წელსაც ჩვენ გავხდებით ჩემპიონები.

- თუმცა, შარშანდელისგან განსხვავებით, წელს ჩემპიონობისთვის უფრო დიდი კონკურენციაა. ეროვნულ ლიგაში რომელი გუნდი მოგეწონათ?

- რა თქმა უნდა, ბათუმის “დინამო”, რომელიც შემადგენლობითაც ძალიან ძლიერია და გულშემატკივარიც მაგრად ეხმარება. ძალიან მომწონს ქუთაისის “ტორპედოც” და თუ შემადგენლობა შეინარჩუნა, ჩემპიონობისთვის აუცილებლად იბრძოლებს. თბილისის “დინამოსგანაც” უფრო მეტს მოველი და მგონია, რომ საჩემპიონო ბრძოლაში აუცილებლად ჩაერთვება. 

- ბათუმის “დინამოს” გულშემატკივარი ახსენეთ. წელს ეს გუნდი გულშემატკივრების თანადგომამაც გაალიდერა - რამდენიმე თამაში სწორედ მათი თანადგომით მოიგო. ამ კუთხით “საბურთალო” იჩაგრება, თბილისში სტადიონი თითქმის ცარიელია... 

- ამის შესახებ ბიჭები ხშირად ვლაპარაკობთ და ყველას გული გვწყდება, ტრიბუნაზე მაქსიმუმ 300-400 კაცი რომ მოდის. ასეთ დროს ძნელია მოედანზე ისეთი განწყობით გახვიდე, როგორც ბათუმის “დინამოს” ან ქუთაისის “ტორპედოს” მოთამაშე, რომელთაც ყოველთვის ბევრი მაყურებელი ჰყავთ. 

- თქვენი აზრით, თბილისში ვითარების შეცვლა რეალურია?

- რეალურია მხოლოდ იმ შემთხვევაში, თუ ევროსარბიელზე კარგად ვითამაშებთ. რეგიონებისგან განსხვავებით, თბილისში ეროვნულ ლიგას ხალხი არ სწყალობს. 

- როგორ გგონიათ, მოახლოებულ ევროტურნირზე მოვა ხალხი თქვენს საქომაგოდ?

- მაინც მაქვს იმედი, რომ მოვა. მთავარია, პირველი ეტაპი გადავლახოთ. 

- ეს საქმეს რადიკალურად შეცვლის?

- გორის “დილას” მაგალითით მახსოვს - გუნდი “მიხეილ მესხზე” თამაშობდა და ყოველ მომდევნო წრეში გასვლაზე ხალხი მატულობდა, ბოლოს კი ავსტრიელებთან სტადიონი გაივსო. ასეთია თბილისელი გულშემატკივარი - მკაცრი, მაგრამ თუ გაახარებ, ეგრევე რეაგირებს და სტადიონზე მოდის. იმედია, მათ შემოტრიალებას “საბურთალოც” მოახერხებს.

- ევროსეზონი და ჩემპიონთა ლიგაში “საბურთალოს” დებიუტი კარს მოგვადგა. რისი მოლოდინი გაქვთ?

- დაძაბულიც ვარ, სასიამოვნო მოლოდინიც მაქვს და იმედიც, რომ “საბურთალო” ევროპაში ღირსეულად გამოვა.

- ჩემპიონთა ლიგის საკვალიფიკაციო ეტაპზე თამაშს რომელ გუნდებთან არ ისურვებდით?

- მოყვარულებთან.

- რატომ, უფრო იოლად არ მოიგებთ?

- მერე ამაში რა სიამოვნებააა? მე ძლიერ გუნდთან თამაში უფრო გამახარებს, რადგან ასეთი თამაში უფრო მეტს შემძენს მეც და კლუბსაც, მეტი სტიმულიცაა. ვისაც წილისყრა შეგვახვედრებს, ამას მალე ვნახავთ.

ყოველდღიური სპორტული გაზეთი "ლელო"
525
მკითხველის კომენტარები / 0 /
მსგავსი ამბები
რუბრიკის სხვა სიახლეები
;