გეგუჩაძემ 'გაგრას' ორი ლიდერი გადაიბირა

„გაგრას“ ორი ფეხბურთელი ეროვნულ ლიგაში გადასულ ბათუმის „დინამოში“ ითამაშებს. გია გეგუჩაძის ხელმძღვანელობით გუნდი სეზონის დასრულებისთანავე გაძლიერდა - ამიერიდან აჭარული გუნდის ფორმას რატი ცაცკრიალაშვილი და თორნიკე გაფრინდაშვილი მოირგებენ.

ბათუმელთა ცნობით, ეროვნულ ლიგაში დაბრუნებულმა „დინამომ“ ორივე მათგანთან წინასწარ შეთანხმებას უკვე მიაღწია. ცაცკრიალაშვილთან კონტრაქტის დეტალები ზუსტდება, გაფრინდაშვილმა კი ხელშეკრულება უკვე გააფორმა.

გაფრინდაშვილი და ცაცკრიალაშვილი „გაგრას“ ლიდერები იყვნენ და დიდწილად მათი დამსახურებაა, გუნდი საქართველოს თასის ფინალსა და ეროვნული ლიგის პლეი ოფში რომ გავიდა.  

გაფრინდაშვილი ფლანგის შემტევი ნახევარმცველია. 21 წლის ფეხბურთელმა შესანიშნავი სეზონი ჩაატარა და სპეციალისტებისგან აღიარება მოიპოვა. მართალია, სულ 7 გოლი და 3 საგოლე პასი ჩაიწერა აქტივში, მაგრამ ეს სტატისტიკა მის სათამაშო თვისებებს აშკარად ვერ გამოხატავს.

შემტევი ნახევარმცველი ცაცკრიალაშვილი კი „გაგრას“ ნამდვილი ლიდერი გახლდათ. 25 წლის ფეხბურთელმა ეროვნულ ლიგა 2-ში ჩატარებულ 32 მატჩში 16 გოლი გაიტანა და 8 საგოლე გადაცემა მიითვალა. ლომის წილი დაიდო იმაშიც, რომ „გაგრა“ საქართველოს თასის ფინალში გავიდა - 4 სათასო მატჩში 5 გოლი გაიტანა.

შეგახსენებთ, რომ სეზონის დასრულების შემდეგ ბათუმელებმა ლატვიური „ვენტსპილსიდან“ ჯერ საყრდენი ნახევარმცველი გია მანჯგალაძე დაიმატეს, ხოლო შემდეგ მარტვილის „მერანიდან“ - მარჯვენა მცველი და კაპიტანი კიჭი მელიავა.

საინტერესოა, რომ ასე ადრეულად გუნდის განახლება ეროვნული ლიგის ჯერ არც ერთ კლუბს არ დაუწყია. შემადგენლობის დროული დაკომპლექტება სეზონისთვის კარგად მოსამზადებლად აუცილებელია. ეს ფაქტი გეგუჩაძისა და ბათუმის „დინამოს“ სერიოზულ გეგმებზე მეტყველებს.

ყოველდღიური სპორტული გაზეთი "ლელო"
946
მკითხველის კომენტარები / 1 /
GURAMI
0
GEGUSHAZE ERTADERTIA SAQARTVELOSHI. VAMAKOBT BATUMIS DINAMOS PANEBI. SHVENI MCRVTNELIT. CARMATEBEBI. GEGUSH
მსგავსი ამბები
რუბრიკის სხვა სიახლეები
;