გეგუჩაძე ახალგაზრდულ ნაკრებს აღარ გაწვრთნის!

 საქართველოს ფეხბურთის ფედერაციამ და ახალგაზრდული ნაკრების მთავარმა მწვრთნელმა გია გეგუჩაძემ ურთიერთშეთანხმების საფუძველზე კონტრაქტი გაწყვიტეს, - ამ ინფორმაციას სფფ-ის ოფიციალური ვებგვერდი ავრცელებს:

"ფეხბურთის ფედერაციის სახელით მინდა მადლობა გადავუხადო გია გეგუჩაძეს თითქმის ორწლიანი თანამშრომლობისთვის. სამწუხაროდ, ჩვენი გზები გაიყო. მას წარმატებებს ვუსურვებ. ხელშეკრულება ურთიერთშეთანხმებით გავწყვიტეთ და ერთმანეთს კეთილი სურვილებით დავშორდით", - განაცხადა საქართველოს ფეხბურთის ფედერაციის ვიცე-პრეზიდენტმა ალექსანდრე იაშვილმა.

          მოკლედ, ახალგაზრდული ნაკრების მთავარი მწვრთნელის პოსტზე გია გეგუჩაძის საქმიანობა დასრულებულია. ამ დროისთვის ჩვენს 21-წლამდელებს ევროპის ჩემპიონატის შესარჩევი ციკლის ჯგუფში 4 ქულით მე-4 ადგილი უკავია. ვუსწრებთ ლიტვას და ფინეთს. ჩამოვრჩებით დანიას, პოლონეთსა და... ფარერებს. ფაქტია, თითქმის აღარ არის იმის შანსი, რომ ევროპის ჩემპიონატის ფინალურ ეტაპზე გავიდეთ.

არადა, ჯგუფის შემადგენლობამ თავიდანვე გააჩინა წარმატების იმედი, მაგრამ... ამ საქმიდან, როგორც ჩანს, არაფერი გამოვა. და მაინც, მართალია, პასუხისმგებელი ყოველთვის მწვრთნელია, მაგრამ დამნაშავედ მხოლოდ გეგუჩაძის გამოყვანა სამართლიანი არ იქნება. იყო არაერთი ფაქტორის ერთობლიობა, რამაც განაპირობა ეს შედეგი.

რა თქმა უნდა, ველოდით, რომ ამ დროისთვის საქართველოს ახალგაზრდული ნაკრები უფრო აწყობილი და ჩამოყალიბებული გუნდი იქნებოდა. ამასთან, საბედისწერო აღმოჩნდა ფარერებთან გასვლაზე განცდილი მარცხი. მართალია, ჩრდილოელები მიმდინარე ციკლს კარგად ატარებენ და ოდინდელივით მაჩანჩალები აღარ არიან, მაგრამ...

საქართველოს არც ერთი ნაკრები, არც ერთ დონეზე და არც ერთი შემადგენლობით, არ უნდა აგებდეს ფარერებთან!

ამ ეტაპზე უცნობია, ვინ გაწვრთნის ახალგაზრდულ ნაკრებს. როგორც შევიტყვეთ, ახალი მწვრთნელი, დიდი ალბათობით, იანვარში დაინიშნება. ამ თემას ჩვენი წერილის ბოლოს ისევ დავუბრუნდებით, ფაქტი კი ერთია - ახალგაზრდული ნაკრების მომავალ მწვრთნელს ოფიციალური დებიუტი 22 მარტს უნდა ჰქონდეს, როცა ევროპის ჩემპიონატის შესარჩევი ციკლის მატჩში ფარერებს ვუმასპინძლებთ.

ახლა კი თვალი გადავავლოთ გია გეგუჩაძის განვლილ გზას საქართველოს ახალგაზრდული ნაკრების მთავარი მწვრთნელის პოსტზე.

მთავარი  პრობლემა

რა თქმა უნდა, დღევანდელ ფეხბურთში თამაშს ერთი კონკრეტული ფეხბურთელი და ერთი კონკრეტული სათამაშო რგოლი არც იგებს და არც აგებს. და მაინც, საქართველოს ახალგაზრდულ ნაკრებს უკეთესი შედეგი ექნებოდა, რომ არა ძალიან სუსტი თამაში დაცვის ხაზში.

არავინ იცის, რატომ მოხდა ასე, მაგრამ გაჭირდება ისეთი მატჩის გახსენება, როცა ჩვენმა გუნდმა დაცვაში ერთი კი არა, რამდენიმე უხეში შეცდომა არ დაუშვა. ის კი არა, მთელ რიგ შემთხვევებში საკმარისი იყო, მოწინააღმდეგე ჩვენს ნახევარზე გადმოსულიყო, რომ ჩვენს კართან ხიფათი იქმნებოდა.

დღევანდელ ფეხბურთში კი, თუ შედეგის მიღწევა გინდა, ყველაფერი საიმედო დაცვით იწყება. ეს აშკარა პრობლემა იყო საქართველოს ნაკრებისთვის თუნდაც იმ პირობებში, როცა დღეს ყველა უტევს და ყველა თავს იცავს.

რა შეუძლია  ამ თაობას?

ზემოთაც ვთქვით - როცა ევროპის ჩემპიონატის წილისყრა ჩატარდა, ყველა ერთხმად მივიჩნევდით, რომ საქართველოს ნაკრებს ეს შესარჩევი ციკლი წარმატებით უნდა ჩაეტარებინა და ევროპის ჩემპიონატზე გასულიყო.

სამწუხაროდ, ასე ძალიან ხშირად მომხდარა და ამჯერადაც ასე მოხდა: ჩვენი ამბიცია და რეალობა ერთმანეთისგან აცდენილი აღმოჩნდა. გვინდა თუ არა, უნდა ვაღიაროთ, რომ ამჯერადაც გადაჭარბებული მოლოდინი გვქონდა.

რა თქმა უნდა, იმ არასახარბიელო შედეგში, რომელიც დღეს გვაქვს, საკმაოდ მაღალი დოზით არის სამწვრთნელო შტაბის პასუხისმგებლობა, მაგრამ არა მარტო ეს. მაშ, რა ხდება?

საქართველოს ახალგაზრდულ ნაკრებში მრავლად არიან ფეხბურთელები ჩვენი ეროვნული ჩემპიონატიდან. სამწუხაროდ, როცა ორი კარგი გუნდი ერთმანეთს ეთამაშება და ამ თამაშს ტრიბუნიდან უყურებ, იქმნება შთაბეჭდილება, რომ შედარებით ვუახლოვდებით საშუალოევროპულ დონეს, მაგრამ... ასე ნამდვილად არ არის.

სხვა საქმეა, რომ თუნდაც პროგრესირებად და კარგ ფორმაში მყოფ ფარერებს უნდა ვუგებდეთ, მაგრამ რატომ უნდა მოვუგოთ დანიისა და პოლონეთის ჩემპიონატებში ძირითად შემადგენლობებში მოთამაშე ფეხბურთელებით დაკომპლექტებულ ნაკრებებს?

ბევრი ლაპარაკობდა იმაზე, რომ საქართველოს ახალგაზრდულ ნაკრებში ზედმეტად იყვნენ წარმოდგენილნი ერთ-ერთი კლუბის ფეხბურთელები. რა თქმა უნდა, ყველა მოსაზრებას აქვს არსებობის უფლება, მაგრამ რეალურად ვინ გვყავს ისეთი, ვინც დაიჩაგრა?

შემიძლია, პირადი გემოვნებით დავწერო 4-5 ფეხბურთელის გვარი, ვინც შეიძლებოდა, 21-წლამდელთა გუნდის წევრი ყოფილიყო. რა თქმა უნდა, ახლა მათ გვარებს არ დავწერ, მაგრამ ეს ფეხბურთია და გემოვნებაზე არ დაობენ.

ძალიან დიდი ეჭვი მეპარება, ჩემ მიერ (როგორც რიგითი ქომაგის და თუნდაც, სხვა ქომაგების) დასახელებულ ამ ფეხბურთელებს ძირფესვიანად შეეცვალათ ნაკრების თამაში.

მწარე რეალობას თვალებში უნდა შევხედოთ: ჩვენი გუნდის ერთ-ერთი ლიდერი, რომელზეც უდიდეს იმედებს ვამყარებთ, `გენტის" სათადარიგოთა სკამზეც კი იშვიათად ჩანს, დანიისა და პოლონეთის ნაკრების ფეხბურთელები კი სისტემატურად თამაშობენ ამ ქვეყნის პირველობებზე და თანაც - წამყვან კლუბებში. მგონი, ეს ისეთი განსხვავებაა, ყველამ რომ უნდა იგრძნოს და დაინახოს.

რა უნდა გვექნა?

იქიდან გამომდინარე, რაც ზემოთ დავწერეთ, საქართველოს ნაკრებს კედელთან ვერავინ მიაყენებს და ვერავინ მოსთხოვს აპრიორი დანიისა და პოლონეთის ნაკრებების დამარცხებას. მაშ, რა უნდა მომხდარიყო, რომ კრიტიკა შედარებით ნაკლები ყოფილიყო?

ცხადია, უნდა მოგვეგო ფარერებთან. ეს აქსიომაა. ასევე საშინაო შეხვედრაში უნდა დაგვემარცხებინა ფინეთის ნაკრები. პირადად ჩემთვის კი ყველაზე საკვირველი ის არის, რომ გეგუჩაძის გაწვრთნილმა ახალგაზრდულმა ნაკრებმა ვერ შეიძინა ერთიანი სახე და ხელწერა, ვერ ჩამოყალიბდა იმ გუნდად, როგორ გუნდებსაც გეგუჩაძე აქამდე ქმნიდა.

მისი სამწვრთნელო სტილი და მიდგომა ზოგს შეიძლება მოსწონდეს და ან არა, მაგრამ ფაქტი ერთია: ათი გუნდი პარალელურად რომ თამაშობდეს, გეგუჩაძის გაწვრთნილს ერთი შეხედვით იცნობს კაცი. ამ ნაკრებში ასე არ იყო.

ეს დასასრული  არ არის...

გეგუჩაძე 52 წლისაა. ეს იდეალური ასაკია მწვრთნელისთვის. მის კარიერაში ყოფილა წარმატებაც და წარუმატებლობაც. ვფიქრობთ, დროებითი ჩავარდნა, რომელიც დაკავშირებული იყო საქართველოს ახალგაზრდულ ნაკრებთან, მას ვერ გატეხს.

გეგუჩაძეს სჩვევია დასვენება, შესაბამისი დასკვნების გამოტანა მომხდარიდან და ახალ გამოწვევასთან შეჭიდება. იმედია, ამჯერადაც ასე იქნება, მით უმეტეს, ქართულ ფეხბურთს ჰაერივით სჭირდება კვალიფიციური სამწვრთნელო კადრები.

საქართველოს ახალგაზრდული ნაკრების აწ უკვე ყოფილმა მწვრთნელმა `ლელოსთან" კომენტარი გააკეთა. მისი თქმით, ის აგრძელებს სამწვრთნელო საქმიანობას და მზადაა, ახალი, საინტერესო შეთავაზებები განიხილოს.

- მხოლოდ ის შემიძლია გითხრათ, რომ ვისაუბრე საქართველოს ფეხბურთის ფედერაციის ხელმძღვანელობასთან და ორმხრივი შეთანხმების საფუძველზე გავწყვიტეთ კონტრაქტი. ამ ეტაპზე ვისვენებ. ერთად ვნახავთ, რა და როგორ იქნება მომავალში.

- ესე იგი, აგრძელებთ სამწვრთნელო კარიერას?..

- პროფესია ნამდვილად არ შემიცვლია, ვაგრძელებ სამწვრთნელო საქმიანობას და განვიხილავ ყველა საინტერესო შეთავაზებას.

- როგორ იხსენებთ ახალგაზრდულ ნაკრებში გატარებულ პერიოდს? რა გამოგივიდათ, რა არ გამოგივიდათ?..

- აბსოლუტურად მესმის თქვენი ინტერესი. უბრალოდ, ამ ეტაპზე მხოლოდ იმის თქმა შემიძლია, რაც უკვე გითხარით. მოდით, ამას ჩემთვის დავიტოვებ...

ვინ მოვა ?

როგორც აღვნიშნეთ, დიდი ალბათობით იანვრისთვის, საქართველოს ახალგაზრდულ ნაკრებს ახალი მთავარი მწვრთნელი ეყოლება. გულშემატკივრისთვის საინტერესო უნდა იყოს, ვინ ჩაიბარებს ქვეყნის რანგით მეორე გუნდს.

ფეხბურთის ფედერაციას ყველანაირი საშუალება აქვს იმისთვის, რომ იფიქროს და ისე მიიღოს გადაწყვეტილება. ჟურნალისტიკა კი ძალიან ხშირად ვარაუდებს ეყრდნობა. ქართულ საფეხბურთო კულუარებში ამ დროისთვის ორ მთავარ კანდიდატს ასახელებენ - ვასილ მაისურაძესა და გია ცეცაძეს.

ორივე მათგანს აქვს ახალგაზრდა ფეხბურთელებთან მუშაობის დიდი და წარმატებული გამოცდილება. ასე რომ, მათი კანდიდატურები "ჰაერიდან მოტანილი" ნამდვილად არ არის. თუმცა არც იმას გამოვრიცხავთ, რომ თანდათან სხვა კანდიდატურებიც გამოიკვეთოს.

ყოველდღიური სპორტული გაზეთი "ლელო"
948
მკითხველის კომენტარები / 0 /
მსგავსი ამბები
რუბრიკის სხვა სიახლეები
;