გელაშვილი გურიაში დარჩენას არ გამორიცხავს

ზურაბ გელაშვილი ლანჩხუთის "გურიაში" დარჩენას არ გამორიცხავს. 22 წლის მარჯვენა მცველი, რომელსაც გიორგი დევდარიანი 19-წლამდელთა ნაკრებში იწვევდა და სისტემატურად ათამაშებდა, ბოლო ოთხი წლია, ლანჩხუთელთა ფორმით გამოდის. მანამდე კი ქუთაისის "ტოირპედოში" ირიცხებოდა და საქართველოს ერთ-ერთ ყველაზე საინტერესო მარჯვენა მცველად ითვლებოდა.

"ბოლოს ლანჩხუთის "გურიაში" ვიყავი. შეკრების დღიდან ჩვენი მიზანი გადასვლისთვის ბრძოლა იყო და საამისოდ, დავით ყენიას დამსახურებით, კარგი ბირთვიც შევიკრიბეთ. შემდეგ უფროსობა შეიცვალა და კახა ებრალიძემაც ძალიან ბევრი რამე გააკეთა, "გურია" ზედა ლიგაში რომ გადასულიყო. პლეიოფში "სამგურალთან" დავატკიცეთ, რომ ჩვენი გავარდნა ლოგიკური არ იყო და რომ ჩვცენი ფეხბურთელები უფრო მაღალ დონეზე თამაშს იმსახურებენ. ახლა კონტრაქტი დამიმთავრდა, მაგრამ ჩემი სურვილია, თანამშრომლობა ისევ "გურიასთან" გავაგრძელო და ეს ყველაფერი უახლოეს დღეებში გაირკვევა" – ამბობს გელაშვილი.

22 წლის მოთამაშე ამბობს, მესამე ლიგაში თამაშს რის გამო დათანხმდა:

"ამას ერთად-ერთი ახსნა აქვს – იმიტომ დავთანხმდი, რომ კლუბის ტრადიციული და ამბიციურია. თავისი ისტორიიდან და ტრადიციებიდან გამომდინარე, ამ გუნდისთვის ასეთ დონეზე თამაში სირცხვილი იყო. საქართველოში ერთ-ერთი ყველაზე დიდი ისტორიის მქონე კლუბია და მისი ფორმით თამაში სასიამოვნო იყო. გუნდში 2015 წელს გადავედი, როდესაც უმაღლეს ლიგაში იყო და 2 წელი მთავარ ქართულ ლიგაში გამოვდიოდი.

ლანჩხუთში ფეხბურთი განსაკუთრებით უყვართ, "გურიათი" ცხოვრობენ და სასიამოვნოა, რომ კიდევ ერთხელ შევძელით მათი გახარება და ჩავარდნის მერე "გურია" ერთი საფეხურით ზემოთ ითამაშებს. თუმცა, რა თქმა უნდა, უფრო მაღალ დონეზე თამაში მინდა და დარწმუნებული ვარ, ვარიანტებიც გამოჩნდება. ლანჩხუთში სტაბილური სათამაშო პრაქტიკით ბევრი შევიძინე და დარწმუნებული ვარ, ეროვნულ ლიგაში თამაშს შევძლებ".

1474
მკითხველის კომენტარები / 0 /
მსგავსი ამბები
რუბრიკის სხვა სიახლეები
;