გელა ზაალიშვილიც მსოფლიოს ჩემპიონია! სულ რაღაც წუთნახევარში... [VIDEO]

ბაჰამის კუნძულებზე დღეს დასრულდა ახალგაზრდა ძიუდოისტთა მსოფლიოს ჩემპიონატი, რომელიც ჩვენმა ბიჭებმაც წარმატებით დაასრულეს და კიდევ ორი მედალი მოიპოვეს: ოქრო-ბრინჯაო. ჩემპიონი თბილისელი მძიმეწონოსანი გელა ზაალიშვილი გახდა, ხოლო ასევე თბილისელი ონისე სანებლიძე (100) ბრინჯაოს დასჯერდა. შეგახსენებთ, რომ ორივე ევროპის წლევანდელი ჩემპიონია ახალგაზრდებში.

ამდენად, ლაშა გუჯეჯიანის გუნდმა მსოფლიოს ჩემპიონატი 5 მედლით ჩაამთავრა: 2 ოქრო და 3 ბრინჯაო. გუშინ მსოფლიო ჩემპიონი ლაშა ბექაური (90) გახდა, ხოლო სანებლიძის მსგავსად, ბრინჯაოს მედლები ჯაბა პაპინაშვილმა (60) და ლუკა მაისურაძემ (81) მოიპოვეს. სამწუხაროდ, ამჯერად უმედლოდ დარჩნენ ჩვენი გოგოები. საქართველო საერთო გუნდურ ჩათვლაში მეხუთეზე გავიდა, ბიჭებში - მეოთხეზე. 

ზაალიშვილმა პირველივე შეხვედრა ფინალის ტოლფასი ჩაატარა, როცა იაპონელი გოლიათი ტაცურო საიტო უკნიდან გამოცელა და იპონზე დააგდო. ჩილელ ფრანსისკო სოლისსაც დაახლოებით ამგვარად მოუგო, მაგრამ ის კიდევ უფრო მოწყვეტით დააგდო ტატამზე, ნახევარფინალში კი რუს ჯამალ გამზათხანოვთან მესამე იპონი მიითვალა. ჯამში ჩვენებურს ფინალში გასასვლელად დაახლოებით ერთი წუთი ეყო.

ფინალში ჩვენებურის მეტოქე ძლიერი ავსტრიელი სტეფანჰეგი იყო - სპორტსმენი, ვინც შარშან ბუდაპეშტში, უფროსთა მსოფლიოს ჩემპიონატზე თვით იაპონელთა ოლიმპიადის ვიცე-ჩემპიონი ჰისაიოში ჰარასავა დაამარცხა, ხოლო წლევანდელ ევროპირველობაზე ასევე უფროსებში მესამე იყო. ის ახალგაზრდებში ევროპისა და მსოფლიოს შარშანდელი ფინალისტია და ორივეჯერ რუს ინალ ტასოევთან წააგო, ახლა კი მის არყოფნაში ოქროზე იყო დაგეშილი. თანაც, სტატისტიკაც მის მხარეს იყო - სამი შეხვედრიდან ბოლო ორი მოუგო ზაალიშვილს: 2015 წელს თბილისში ბავშვთა ოლიმპიურ ფესტივალზე და შარშან ევროპის ახალგაზრდულ პირველობაზე დაამარცხა. საბედნიეროდ, ამჯერად ზაალიშვილმა შეძლო ამ სტატისტიკის შეცვლა: თავიდანვე აქტიურად, დაზვერვის გარეშე შეუტია ჰეგის და წუთნახევარში ზედა ჩავლებიდან გამოცერა. ის პირველად გახდა მსოფლიოს ჩემპიონი.

შეიძლება ითქვას, ოქორს მედალი თავად დაკარგა სანებლიძემ, ნახევარფინალში ისეთი შეხვედრა წააგო ჰოლანდიელ სიმეონ კატარინასთან: დამატებით დროში წელში შესული მეტოქე მის ჩატრიალებას ცდილობდა, მაგრამ სანებლიძემ შუაკაური ამოუსვა და ორივე გადავარდა. ისე ჩანდა, რომ გდება ქართველმა გააკეთა და ტაბლოზეც მას დაუწერეს ვაზარი, მაგრამ ვიდეოგამეორების შემდეგ გდება კატარინას ჩაუთვალეს. არადა, ამ ჰოლანდიელს წლეულს ევროპის ჩემპიონატზე მოუგო.

სანებლიძემ ქვეჯგუფში ძალიან იოლად, თამაშ-თამაშით მიყარ-მოყარა ორი მეტოქე: გერმანელი ივო ვიტასეკი პირდაპირ ბეჭებზე დააგდო, დანიელ მათიას მადსენს კი იპონამდეც გაუკეთა გდება. ნაკლები დღე არც დამამშვიდებლის ფინალში აყარა კანადელ შადი ელნაჰასს: ორი წუთის შემდეგ ბრუნით ტომარასავით დააწყვიტა ტატამს სავაზარედ და მერეც უტევდა. მან ორი გაფრთხილებაც მიიღო, ოღონდ ამით დრო მოიგო, თორემ დარჩენილ დროშიც საგრძნობ უპირატესობას ფლობდა.  20 წამით ადრე მან კიდევ გააკეთა გდება, მაგრამ არ შეუფასეს.

ზაურ კენჭაძე (100) პირველივე წრეში დამარცხდა გერმანელ ევროპის მედალოსან დანიელ ზორნთან, სოფიო სომხიშვილმა (+78) კი ავსტრიელ მარია ჰოლვარტთან იმარჯვა, მაგრამ წააგო იაპონელთა მსოფლიოს შარშანდელ ფინალისტ ჰიკარუ კოდამასთან

2581
მკითხველის კომენტარები / 0 /
მსგავსი ამბები
რუბრიკის სხვა სიახლეები
;