გენოს მეორე აღზევება: გორელი ფალავანი ისევ მსოფლიოს მპყრობელია [ვრცელი ანალიზი]

ბუდაპეშტში მიმდინარე თავისუფალი სტილით მოჭიდავეთა მსოფლიოს ჩემპიონატზე გუშინ პირველი ფინალური დღე იყო, რომელმაც საქართველოს დიდი წარმატება - ოქრო-ვერცხლი მოუტანა.

მსოფლიოს ჩემპიონი ზედიზედ მეორედ გახდა გორელი მძიმეწონოსანი გენო პეტრიაშვილი, ვიცე-ჩემპიონის ტიტულს კი პირველივე ჯერზე ამბროლაურელი ავთანდილ კენჭაძე დასჯერდა 74 კილოგრამ წონაში. გუშინ ფინალურ ბლოკში ქუთაისელი ბექა ლომთაძეც (61) ჭიდაობდა, თუმცა ორი დასკვნითი შეხვედრა წააგო და მეხუთეზე დარჩა.

ორგზის პეტრიაშვილი

პეტრიაშვილი იმ დონის ფალავანია, მისგან ასეთ წარმატებას უკვე ყოველთვის ველოდებით და მანაც გაგვიმართლა იმედები. ჩვენებურს ირანელთა მომავალმა ბრინჯაოს პრიზიორმა ფარვიზ ხოდავირდი ჰადისბასმანიმაც ჩინებული სამსახური გაუწია, როცა მთავარი მეტოქე, თურქი ოლიმპიური, მსოფლიოსა და ევროპის ჩემპიონი ტაჰა აკგული ჩამოაცილა (3:2 მოუგო), მერე კი თავადაც გამოჭედა საკუთარი დიდება, როცა სხვა მეტოქეებთან ერთად ამ ირანელსაც აჯობა და ზედიზედ მეორედ გახდა მსოფლიოს ჩემპიონი.

პირველ დღეს გორელი ფალავანი ჩვეულად დატრიალდა და დაერია მეტოქეებს. სულ პირველად მასპინძელი დანიელ ლიგეტი "დააშამათა" წმინდა გამარჯვებით: 11:1. რუსთა ჩეჩენი ანზორ ხიზრიევი სწორედ იმაზე გამეცადინებული, რომ ფეხში არ შეეშვა და ვიდრე ძალა ეყო, ეს გამოსდიოდა კიდეც. მეტიც - დაბლაც ჩაიყვანა გენო და 2 ქულითაც დაწინაურდა, მაგრამ ბოლოსკენ ქართველმა უმოწყალოდ მოღალა და ჩაყვანა-დატრიალებების კომბინაციით 8:5 მოუგო.

პეტრიაშვილს ირანელთან უფრო გაუჭირდა, ვინც ფიზიკურადაც კარგად იყო მომზადებული და ილეთებსაც აკეთებდა. გენომ კი 13:6 მოუგო. "რა გამისწორდა იცით? ყველა რომ დაგაჯერეთ" - ასე მიმართა ნახევარფინალის შემდეგ გასახდელში დაბრუნებულმა პეტრიაშვილმა მწვრთნელებსა და გუნდის წევრებს.
მსოფლიოს ფინალში ჩვენებურის ტიტულის მოცილე ჩინელი გოლიათი ჭივეი დენი იყო. მომავალმა ჩემპიონმა ფინალში შედარებით ფრთხილად იჭიდავა.

ჩინელი ნამდვილად ეცადა, მაგრამ პეტრიაშვილმა დაწყებისთანავე მოახვია თავს საკუთარი ჭიდაობა და 6:0 უპრობლემოდ მოუგო. მან ორჯერ ფეხში შესვლის მცდელობა დაუხურა ჩინელს და თავად მოუარა ზურგიდან, ერთხელ კი თვითონ აიყვანა ფეხიდან და ლამის ტაბლომდე გადააგდო. მერე კი იყო უბედნიერესი წუთები არა მხოლოდ მისთვის, არამედ მთელი საქართველოსთვის: ზეაწეული ორი თითი და ხუთჯვრიანი თეთრ-წითელი დროშის ფრიალი ბუდაპეშტის "ლასლო პაპის" დარბაზში.

კენჭაძისდასანანი მარცხი

ავთანდილ კენჭაძემ ბუდაპეშტში დასაწყისშივე შემოგვთავაზა სენსაცია, როცა უზბეკ აზიის ჩემპიონ ბეკზოდ აბდურახმანოვს, ვინც თურმე მმა-ს მებრძოლიცაა, 0:8 ამოუქაჩა და საბოლოოდ 12:12-ზე, დამატებითი მაჩვენებლებით მოუგო - ბოლო ქულები მან მიითვალა.

უზბეკთან ასეთი მოგების შემდეგ პოლონელი ანდრეი სოკალსკი ჩვენებურთან განწირულიც კი ჩანდა და მართლაც, ამბროლაურელმა ფალავანმა წმინდად მოუგო - 12:2. კენჭაძემ აზერბაიჯანელი აბუბაკრ აბაკაროვიც იოლად დაამარცხა მეოთხედფინალში - 5:2, ვისთანაც თავიდანვე დაწინაურდა და გეგმაზომიერად მიიყვანა შეხვედრა მოგებამდე, ხოლო ნახევარფინალში თურქთა ევროპის მოქმედი ჩემპიონი, მსოფლიოსა და ოლიმპიური პრიზიორი სონერ დემირტაში დაჯაბნა ულაპარაკოდ: 8:1.

ამბროლაურელმა ათლეტმა ფინალშიც ვაჟკაცურად იბრძოლა რუსთა ოს ზაურბეკ სიდაკოვთან და ფრედ დაასრულა პაექრობა - 2:2, თუმცა ბოლო ქულები მეტოქემ მოიპოვა და გამარჯვებაც მას დარჩა.

ლომთაძე საკუთარ თავთან დამარცხდა

ლომთაძემ ტურნირი, ტრადიციულად, ძლიერად და კარგად დაიწყო, თუმცა ბოლოს ვერაფერს გახდა. ბევრისთვის მოულოდნელად, მისი პირველი მეტოქე არა მასპინძელი იოჟეფ მოლნარი, არამედ სენეგალელი ადამა დიატა აღმოჩნდა, ვისაც 6:0 მოუგო, აი, ახალგაზრდა იაპონელი კაზუია კოიანაგი კი წმინდად, 11:1 გაანადგურა.

სამწუხაროდ, ამის შემდეგ ზედიზედ ორი პაექრობა წააგო: ჯერ ნახევარფინალში თვითონ დამარცხდა წმინდად, 0:10 რუსთა დაღესტანელ ევროპის ორგზის ჩემპიონსა და მსოფლიოს შარშანდელ ფინალისტ ჰაჯიმურად რაშიდოვთან, ვინც ახლაც დათმო ფინალური პაექრობა, დამამშვიდებლის ფინალში კი 3:6 წააგო მონღოლ ტუვშინტულგა ტუმენბილეგთან. ვფიქრობთ, ჩვენებურმა უფრო საკუთარი თავისა ვერ ირწმუნა, თორემ პირველი პერიოდი 2:2 დასრულდა.

მეორე დღის სიურპირზები

ჩემპიონატის გუშინდელი დღე ჩვენი ნაკრებისთვის მთლად ასე ტრიუმფალური ვერ გამოდგა - ოთხი ფალავანიდან მხოლოდ ორი აგრძელებს ბრინჯაოსთვის ბრძოლას და რაც ყველაზე გულდასაწყვეტია, ჩემპიონატს გამოეთიშა გუნდის ყველაზე ტიტულოვანი წევრი, ოლიმპიური და მსოფლიოს ჩემპიონი, ევროპის სამგზის გამარჯვებული ვლადიმერ ხინჩეგაშვილი (65). დღეს საღამოს დამაშვიდებელ წრეში ბრინჯაოსთვის გააგრძელებენ ბრძოლას ევროპისა და მსოფლიოს პრიზიორი დავით ხუციშვილი (79) და ევროპის ორგზის ჩემპიონი, მსოფლიოსა და ოლიმპიური ბრინჯაოს მედალოსანი დავით მარსაგიშვილი (92).

ხინჩეგაშვილი თავის პრინციპულ მეტოქესთან, რუსთა ჩეჩენ ევროპის ვიცე-ჩემპიონ ახმედ ჩაკაევთან დამარცხდა: 0:10. მას ჯანმრთელობის მხრივ გარკვეული პრობლემები მოსამზადებელ ეტაპზეც ჰქონდა და ვერც საკონტროლო შეხვედრებში გამოიყურებოდა დამაჯერებლად, თუმცა მარცხის მთავარი მიზეზი უფრო ის გვგონია, რომ ჯერ კიდევ ეგუება ახალ წონას.

ხინჩეგაშვილმა ჩაკაევთან შეხვედრამდე ორი პაექრობა მოიგო, მაგრამ იქაც არ ჰგავდა ადრინდელ ლადოს - ირანელი ამირჰოსეინ აზიმ მაგსუდი უფრო იოლად დაამარცხა, 7:3, თურქ სალაჰეტინ კილიჯსალაიანს კი ბოლო წამებზე გამოჰგლიჯა გამარჯვება ხელიდან: 6:5. იმედია, ოლიმპიადამდე დარჩენილ დროში ის მოასწრებს ფიზიკური კონდიციების შევსებას.

ხუციშვილმა ანგოლელი ფრანსისკო კადიმა 12:1 გაანადგურა, მერვედფინალში კი თურქი აიჰან სუჯუც "მშრალად", 5:0 დაამარცხა. სამწუხაროდ, მერე ამერიკელ კაილ დაკესთან ვერაფერს გახდა და წმინდად წააგო - 0:11, დღეს კი დამამშვიდებელში პირველ შეხვედრას მარტინ ობსტთან ჩაატარებს, ხოლო მოგების შემთხვევაში ბრინჯაოსთვის საბრძოლველად რუსი ახმედ გაზიმაგომედოვი ელოდება.

მარსაგიშვილი პირველივე შეხვედრაში დამარცხდა ამერიკელთა მსოფლიოსა და ოლიმპიურ პრიზიორ მიშაელ კოქსთან - 2:6. დამამშვიდებელში მისი პირველი მეტოქე მოლდოველი ევროპის პრიზიორი ნიკოლაი ჩებანია, ამ წყვილის ფავორიტს კი ბრინჯაოს მედალთან ირანელი მსოფლიოს პრიზიორი ალირეზა მოჰამად კარიმამაჩიანი ელოდება.

ჩვენი გუნდიდან უმედლოდ ხონელი ოთარ გოგავა (57) და თბილისელი სანდრო ამინაშვილიც (86) დარჩნენ. გოგავა პირველივე წრეში დაძაბულ ბრძოლაში 1:2 დამარცხდა კუბელ რაინერ ანდრეუ ორტეგასთან და მერე არც სანუგეშოში გადასვლის საშუალება მისცემია. ევროპისა და მსოფლიოს პრიზიორმა ამინაშვილმა საკვალიფიკაციოში კოლუმბიელი კარლოს არტურო მენდესი 6:2 კი დაამარცხა, მაგრამ მერე 0:9 წააგო პოლონელ ზბიგნევ ბარანოვსკისთან და სანუგეშოში ვერც ეს გადავიდა.

დარჩენილი დუეტი: წილისყრა და შანსები

ბუდაპეშტში თავისუფალი სტილით მოჭიდავეთა ორი ონის - 70 და 97 კილოგრამების ფალავნები იასპარეზებენ.

70 კილოგრამში მსოფლიოს მოქმედი ჩემპიონი, ყვარლელი ზურაბ იაკობიშვილი იჭიდავებს, ვინც შარშან მოპოვებული ტიტულის დაცვას შეეცდება. მას წილისწყრამ შედარებით გაუმართლა. როგორც განთესილი, მერვედფინალში სლოვაკ თეიმურაზ სალკაზანოვსა და ირანელ იუნეს ემამიჩუგუეის შორის მოგებულს შეხვდება.

97 კილოგრამში ევროპის ფინალისტი, თბილისელი ელიზბარ ოდიკაძე იჭიდავებს. ისიც განთესილია, თუმცა ეს ვერაფერი ნუგეშია - განუთესავთაგან მის ჯგუფში მოხვდა რუსთა დაღესტანელი ოლიმპიური, მსოფლიოს ორგზის და ევროპის სამგზის ჩემპიონი აბდულრაშიდ სადულაევი! ჩვენებური მას ნახევარფინალამდე არ ხვდება, თუმცა იქამდეც ძლიერები ეღობებიან გზაზე: აზერბაიჯანელი ასლანბეკ ალბოროვი, ირანელი მოჯტაბა გოლეი, პირველ პაექრობას კი ვენესუელელ ხოსე დანიელ დიას რობერტისა და კორეელ ჯაეან კიმს შორის მოგებულთან ჩაატარებს.

ყოველდღიური სპორტული გაზეთი "ლელო"
1398
მკითხველის კომენტარები / 0 /
მსგავსი ამბები
რუბრიკის სხვა სიახლეები
;