გენო პეტრიაშვილისა და რევაზ ნადარეიშვილის ირანული ვერცხლი

ირანში დამთავრდა საკლუბო ჩემპიონატი, რომელშიც გამარჯვება ორივე სტილში "ბიმექს რაზიმ" მოიპოვა. ესაა ქალაქ ჯუიბარის კლუბი ირანში ყველაზე უფრო საჭიდაო რეგიონად აღიარებული მაზანდარანის პროვინციიდან.

ვერცხლის მედლები "კაშანიმ" მოიპოვა, რომლის შემადგენლობაში ორი ქართველი გამოდიოდა: თავისუფალ ჭიდაობაში ევროპისა და მსოფლიოს ჩემპიონი, ოლიმპიური პრიზიორი გენო პეტრიაშვილი (125) და ბერძნულ-რომაულ ჭიდაობაში მსოფლიოს მესამე პრიზიორი რევაზ ნადარეიშვილი (98).

ფინალურ ეტაპზე ოთხი გუნდი იყო გასული - ქვეჯგუფების პირველ-მეორეადგილოსნები. ფინალურ ტურნირს მაზანდარანის ქალაქმა კაშანიმ ანუ ჩვენებურთა კლუბის არენამ უმასპინძლა, ხოლო მონაწილეთა კვარტეტიდან სამი კლუბი მაზანდარანის პროვინციიდან იყო.

მწვრთნელებმა პეტრიაშვილი მხოლოდ ნახევარფინალურ შეხვედრაში დააყენეს შემადგენლობაში და ჩვენებურმაც არ გაუცრუათ იმედები: ვადამდე წმინდად, 10:0 დაამარცხა ირანელი ჯაფარ შამ ნატერი. სამწუხაროდ, ფინალში ის უკვე არ აჭიდავეს და წააგეს კიდეც 3:5 ჯუიბარელებთან.

ნადარეიშვილი ორივე შეხვედრაში დაიხმარეს, შანსი კი ჩვენებურმა სანახევროდ გამოიყენა, თუმცა ამაში დამნაშავე ხელის ტრავმაცაა. ნახევარფინალში ჩვენებურმა მასპინძელ ალი აკბარ ჰეიდარის 2:0 სძლია, ფინალში კი ხელი სტკიოდა და ამიტომ წააგო ასევე ირანელ მოსტაფა სალეჰზადესთან, თუმცა კი მინიმალური ანგარიშით: 0:1.

ორივე საჭიდაო სტილის ფინალში "ბიმექს რაზიმ" ერთნაირი ანგარიშით, 5:3 დაამარცხა "კაშანი". ბრინჯაოს მედალს მაზანდარანის დედაქალაქ სარის ამავე სახელწოდების კლუბი დაეუფლა, შედეგად კი ირანიდან სწორედ ეს სამეული იასპარეზებს 7-8 დეკემბერს მსოფლიოს საკლუბო ჩემპიონატში, რომელსაც ისევ ირანი და ისევ ქალაქი კაშანი უმასპინძლებენ.

 

ყოველდღიური სპორტული გაზეთი "ლელო"
1255
მკითხველის კომენტარები / 0 /
მსგავსი ამბები
რუბრიკის სხვა სიახლეები