გენო პეტრიაშვილის ოქრო! 10:1 ფინალში, სადეზადეხთან

საქართველოს თავისუფალი სტილით მოჭიდავეთა ნაკრებმა 3 მედლით - 1 ოქროთი და 2 ვერცხლით დაამტავრა გამოსვლა ვლადიკავკაზში ჩატარებულ საერთაშორისო ტურნირში "ალანები".

ტურნირის ჩემპიონი გახდა მსოფლიოს ორგზის ჩემპიონი გენო პეტრიაშვილი (125), ხოლო ბექა ლომთაძე (61) და ავთანდილ კენჭაძე (74) ვერცხლის მედლებს დასჯერდნენ.

პეტრიაშვილმა ფინალში დიდი უპირატესობით - 10:1 დაამარცხა ირანელი ჯაბელ სადეზადეხი და ოსური ტურნირი ქართული ჰიმნით დაასრულა. თუმცა უნდა ითქვას, რომ მას ოსებმაც ჩინებული დახვედრა მოუწყვეს - "მრავალჟამიერის" ფონზე გამოიყვანეს საჭიდაოდ, ხოლო ახლო წარსულის ოსთა სახელოვანმა ვეტერანმა, ოლიმპიურმა, მსოფლიოსა და ევროპის მრავალგზის ჩემპიონმა ჰაჯიმურატ გაცალოვმა რეპორტაჟისას თბილად და რაც მთავარია, ობიექტურად ისაუბრა მასზე, როგორც ძლიერ ფალავანზე. სამაგიეროდ, მისმა თანაწამყვანმა ჩვეულებას არ უღალატა და ჩვენი რამდენიმე ცნობილი მოჭიდავე ოს ფალავნებად მოიხსენია!

ლომთაძე ფინალში მინიმალური სხვაობით, 3:4 დამარცხდა რუსთა დაღესტანელ რამაზან ფერზალიევთან. კენჭაძეც რუსეთის წარმომადგენელთან დამარცხდა, ოღონდ ეროვნებით ოს ტიმურ ბიჟოევთან, ვისაც 23-წლამდელთა მსოფლიოს ჩემპიონატის ნახევარფინალში მოუგო. ეს შეხვედრაც მინიმალური სხვაობით, 1:2 დავთმეთ, თუმცა ამაში ლომის წილი მსაჯებმაც შეიტანეს.

1940
მკითხველის კომენტარები / 1 /
სოსო
0
გენომ ულაპარაკოდ გაიმარჯვა,სრულიად ფლობდა სიტუაციას და ვადამდელი გამარჯვებისატვის თავი არ მოუკლავს თორემ პრობლემა არ იყო.კენჭაძემ სრულიად თანაბარ ბრძოლაში გაფრთხილებების ხარჯზე წააგო.მანდ უბრალოდ მსაჯებმა გადაწყვიტეს ასე,თორემ ბიჯოევი რომ გაეფრთხილებინათ მეორედ,არაფერი შეიცვლებოდა.ლომთაძემ კი ჩემი აზრით თვითონ წააგო .ბექა 3-1 დაწინაურდა და აქტიური ჭიდაობა გააგრძელა,ერთ მომენტში მოწინააღმდეგე მუხლებზე დააგდო და როცა შემორბენა გააკეთა ჩოქბჯენის დასაფიქსირებლად,ფეხი ხალიჩის გარეთ გადგა.ჩვენი ორი ქულის ნაცვლად მეტოქემ ერთი მიიღო და შეხვედრაც დგომში გაგრძელდა.ეტყობა ემოციის ქვეშ,ბექამ ფეხში შესვლა სცადა,დამთავრებამდე 27 წამი იყო და არსად ეჩქარებოდა,მაგრამ ვერ შევიდა და ორი ქულაც დაკარგა.დარჩენილ წამებში ბექა გადამწყვეტ შეტევაზე გადავიდადა სულ ცოტა დააკლდა ქულის აღებამდე,უბრალოდ რამდენიმე წამი აღარ ეყო ილეთის დასასრულებლად.
მსგავსი ამბები
რუბრიკის სხვა სიახლეები
;