გენო პეტრიაშვილი ირანული "კაშანის" რიგებში იჭიდავებს

 დღეს თეირანის  "აზადის"  სპორტის სასახლეში მსოფლიოს საკლუბო ჩემპიონატი იწყება თავისუფალ ჭიდაობაში, რომელშიც 8 კლუბი მიიღებს მონაწილეობას. მათ შორის - ჩვენიც, რომელიც ეროვნული ნაკრების სათადარიგო ფალავნებითაა დაკომპლექტებული.

ამჯერად მასში ლიდერები რამდენიმე მიზეზის გამო ვერ მოხვდნენ: როცა ამ ტურნირში ჩვენი გამოსვლა გადაწყდა, რამდენიმე მათგანი უკვე მიწვეული ჰყავდათ სხვა ქვეყნების კლუბებს, ნაწილი კი 23-26 დეკემბერს გასამართავი საქართველოს ჩემპიონატისთვის ემზადება.

ჩვენ გარდა, საკლუბო ჩემპიონატში კიდევ 11 გუნდი გამოვა: სამი ირანული კლუბი, ამ ტურნირის მოქმედი ჩემპიონი, ამერიკული "ტიტან მერკური", აგრეთვე კლუბები ინდოეთიდან, კანადიდან, უნგრეთიდან, მონღოლეთიდან, ბულგარეთიდან, ყაზახეთიდან და ყირგიზეთიდან.

ირანს მისი ყველაზე საჭიდაო პროვინციის - მაზანდარანის კლუბები წარმოადგენენ. მათ შორისაა ქვეყნის ჩემპიონი "ბიმეჰ რაზი" ჯაიბურიდან და ვიცე-ჩემპიონი  "იზი პაიპ კაშანი" ამავე სახელწოდების ქალაქიდან. აღსანიშნავია, რომ კაშანელთა შემადგენლობაში შარშან ევროპისა და მსოფლიოს ჩემპიონი, ოლიმპიური მედალოსანი გენო პეტრიაშვილიც ჭიდაობდა მძიმე წონაში.

ოლიმპიური და მსოფლიოს ჩემპიონი, ევროპის სამგზის გამარჯვებული ვლადიმერ ხინჩეგაშვილი (61) შარშან ამერიკელებს დაეხმარა გაჩემპიონებაში, წლეულს კი იმანაც ირანში გადაინაცვლა პეტრიაშვილის კლუბში. თეირანში ყაზახური კლუბის შემადგენლობაში გამოვა ევროპისა და მსოფლიოს მესამე პრიზიორი სანდრო ამინაშვილი (86). ზოგადად, ტურნირი ფრიად წარმომადგენლობითი იქნება: მასში ევროპისა და მსოფლიოს 16 მედალოსანი იჭიდავებს.

საინტერესოა, რომ ცოტა ხნის წინ ერთ-ერთი ირანული კლუბი თავის შემადგენლობაში ამერიკელთა ოლიმპიურ და მსოფლიოს ორგზის ჩემპიონ კაილ სნაიდერსაც (97) იწვევდა, თუმცა მან "ტიტანში" დარჩენა ამჯობინა. საკლუბო ტურნირი გუნდური შეჯიბრებაა და "კედელი კედელზე" პრინციპით ტარდება, თუმცა ამჯერად ახალ წონით ანუ 10 კატეგორიაში გაიმართება.

12 კლუბი 4 ქვეჯგუფად დაიყოფა, პირველ ადგილზე გასულები კი ნახევარფინალში გავლენ. გამარჯვებული გუნდი ჯილდოდ 25 ათას ამერიკულ დოლარს მიიღებს, მომდევნო ადგილებზე გასულები, შესაბამისად, 15 და 10 ათასს.

თეირანის "აზადის" სასახლე 14-15 დეკემბერსაც უმასპინძლებს ანალოგიურ შეჯიბრებას, ოღონდ უკვე - ბერძენ-რომაელებში. ჩვენი გუნდი იქაც ეროვნული ნაკრების სათადარიგო ფალავნებით გამოვა. თუმცა გამონაკლისია მძიმეწონოსანი ევროპის მესამე პრიზიორი ლევან არაბული.

საქართველოს ნაკრები. თავისუფალი ჭიდაობა

57 კგ. რობერტ დინგაშვილი
61 კგ. ოთარ გოგავა, თეიმურაზ ვანიშვილი
65 კგ. ედემი ბოლქვაძე, ნიკა ბუშელაშვილი
70 კგ. ლევან ქელეხსაშვილი
74 კგ. გიორგი ლობჟანიძე
79 კგ. ტლევან გოგრიჭიანი
86 კგ. ზაურ ბერაძე
92 კგ. საბა ჩიხრაძე
97 კგ. ზურაბ ახობაძე
125 კგ. ლევან გოგრიჭიანი

ბერძნულ-რომაული ნაკრები

55 კგ. ლევან გოგრიჭიანი
60 კგ. ბექა ბალანჩივაძე
63 კგ. დავით ჩხარტიშვილი
67 კგ. თორნიკე ჯანგავაძე, მურად მიქელაძე
72 კგ. რამაზ ზოიძე, საჩინო დავითაია
77 კგ. ბაკურ გოგოლი
82 კგ. თორნიკე ძამაშვილი
87 კგ. გურამ ხეცურიანი
97 კგ. კუკური კირცხალია
130 კგ. ლევან არაბული

ყოველდღიური სპორტული გაზეთი "ლელო"
1065
მკითხველის კომენტარები / 0 /
მსგავსი ამბები
რუბრიკის სხვა სიახლეები