გენო პეტრიაშვილი #1 გორელი სპორტსმენია

მსოფლიოს ჩემპიონი თავისუფალ ჭიდაობაში გენო პეტრიაშვილი გორში 2017 წლის საუკეთესო სპორტსმენად დაასახელეს. საუკეთესო მწვრთნელად მისი მწვრთნელი ნუგზარ სხირელი, გუნდად კი რაგბის გუნდი "ჯიქი" დასახელდა.

გორის თეატრის შენობაში გამართულ დაჯილდოების ცერემონიაზე "სპორტული გორი 2017" სულ ათ ნომინაციაში გაირკვა საუკეთესონი. წლის საუკეთესო ახალგაზრდა სპორტსმენი ვაჟი გახდა გიორგი გეგელაშვილი (თავისუფალი ჭიდაობა), წლის საუკეთესო ახალგაზრდა სპორტსმენი გოგონა მარიამ კარელიძე (თავისუფალი ჭიდაობა), წლის საუკეთესო მსაჯი ნიკოლოზ ზაუტაშვილი (ძიუდო), წლის საუკეთესო დარბაზი – გურამ პაპიტაშვილის სახელობის ჭიდაობის კომპლექსური სპორტული სკოლის დარბაზი, წლის საუკეთესო არაოლიმპიელი სპორტსმენი – პაატა ღვინიაშვილი (ქართული ჭიდაობა), წლის საუკეთესო მოთამაშე-მწვრთნელი – ციალა ქასოშვილი (ჭადრაკი), წლის საუკეთესო შეჯიბრების ორგანიზატორი – თენგიზ ბურჯანაძის სახელობის სტადიონი.

სპორტული სეზონის შემაჯამებელი დაჯილდოების ცერემონია გორში პირველად ჩატარდა. მისი ორგანიზატორი იყო გორის მუნიციპალიტეტის სპორტული სკოლების გაერთიანება, ღონისძიების პარტნიორები გორის მერია და შიდა ქართლის გუბერნატორის ადმინისტრაცია.

ორგანიზატორებმა გორში სპორტის განვითარებაში შეტანილი განსაკუთრებული წვლილისათვის სპეციალური ჯილდოები და საჩუქრები გადასცეს გურამ პაპიტაშვილს, გივი ზაუტაშვილს, თენგიზ ხუბულურს, ნუგზარ სხირელს, გია თენაძეს, ავთანდილ შოშიაშვილს და გიორგი კანდელაკს.

სპეციალური ჯილდოები მიიღეს ამჟამად მოქმედ გორელ სპორტსმენთა ხუთეულმა – ლადო ხინჩეგაშვილმა, ლაშა შავდათუაშვილმა, ვაჟა მარგველაშვილმა, ბექა ღვინიაშვილმა და ნუგზარ ტატალაშვილმა.

გორის მუნიციპალიტეტის მერიამ წლის საუკეთესო სპორტსმენად აღიარებულ გენო პეტრიაშვილს საჩუქრად გადასცა ორკაციანი საგზური ეგვიპტეში.
"სასიხარულოა, რომ ტიტულოვანი სპორტსმენების სიმრავლით ცნობილ ჩვენს ქალაქში საუკეთესოდ დამასახელეს.

წლეულს მართლაც წარმატებული წელი მქონდა. მინდა მადლობა გადავუხადო ყველას, ვინც მთელი წლის განმავლობაში გვერდში მედგა და ჩემს წარმატებებში წვლილი შექონდა. მადლობა დაჯილდოების ცერემონიის ორგანიზატორებს, მადლობა მთელს გორს და საქართველოს" _ თქვა გენო პეტრიაშვილმა.

გორის მუნიციპალიტეტის სპორტული სკოლების გაერთიანებამ ღონისძიებაზე განვლილი წელიც შეაჯამა და სამომავლოდ ახალი საინტერესო პროექტების განხორციელებაც დააანონსა.

წლის შემაჯამებელი დაჯილდოების ცერემონია გორის თეატრში ჩატარდა. დაჯილდოებას ესწრებოდნენ საქართველოს კულუტურის და სპორტის მინისტრი, მისი მოადგილეები, საქართველოს ეროვნული ოლიმპიური კომიტეტის პრეზიდენტი, სხვადასხვა ფედერაციათა ხელმძღვანელები, ტიტულოვანი სპორტსმენები და სპორტის მოღვაწენი.

ღონისძიების ორგანიზატორები ამბობენ, რომ დაჯილდოების ცერემონია ტრადიციული გახდება და ნომინაციებში შაუკეთესონი ყოველ წელს გამოვლინდებიან.

1861
მკითხველის კომენტარები / 0 /
მსგავსი ამბები
რუბრიკის სხვა სიახლეები
;