გერმანია VS საქართველო - ისტორია იწყება ქემნიცით!

24 ნოემბერს, თბილისის დროით 22:30 საათზე გერმანიის ქალაქ ქემნიცში ქართული კალათბურთის ისტორიის ახალი ფურცელი გადაიშლება. საქართველოს ნაკრები მსოფლიოს თასის საკვალიფიკაციო ეტაპზე გერმანელებს დაუპირისპირდება. შეხვედრის პირდაპირ ტელერეპორტაჟს "პირველი არხი" წარმოადგენს.

ახალი ფურცელი იმიტომაა, რომ მსოფლიოს თასის საკვალიფიკაციოზე აქამდე არ გვითამაშია. მუნდიალზე გუნდები ევროპის ჩემპიონატზე ნაჩვენები შედეგების მიხედვით გადიოდნენ. ფიბა-მ კი, 2017 წლიდან ფორმატის შეცვლა გადაწყვიტა, ევროპის ჩემპიონატების ორის ნაცვლად ოთხ წელიწადში ერთხელ გამართვა დაადგინა, შესარჩევი ეტაპი წლის განმავლობაში სამ თვეზე გაიწერა. შუალედში მსოფლიოს საკვალიფიკაციო ჩაჯდა.

აი, სწორედ აქ დაუშვა შეცდომა. ევროლიგამ "რქები გამოუშვა" - კალენდრის შეცვლას არ ვაპირებ, შუა სეზონში კი ევროლიგის კალათბურთელებს გუნდები არ გამოუშვებენო. ამიტომაც ვერ გვეხმარება ორი ევროპული დონის ვარსკვლავი გიორგი შერმადინი და თორნიკე შენგელია. თავის მხრივ, გერმანიასაც დიდი დანაკლისი აქვს.

ყველაზე რთული იმის განსაზღვრაა, რომელი გუნდი რა ძალისა იქნება და რას უნდა ველოდოთ მისგან. ისღა დაგვრჩენია, დაველოდოთ 24 ნოემბრის 23:30 საათს და ყველაფერს საკუთარი თვალით ვნახავთ. მანამდე საქართველოს ნაკრების მთავარი მწვრთნელის, ილიას ზუროსის კომენტარს შემოგთავაზებთ.

- დიდებულ გუნდებს ვეთამაშებით. გერმანელებს საკმარისი გამოცდილება აქვთ, შემადგენლობაშიც არ განხორციელებულა სერიოზული ცვლილებები. მათი უპირატესობა ისაა, რომ მასპინძელია.

რაც შეეხება სერბეთს, ამ გუნდს ევროლიგის რამდენი კალათბურთელიც უნდა აკლდეს, მაინც ამოუწურავი რესურსი აქვს. ევროპისა თუ მსოფლიოს ტოპშეჯიბრებებში სერბები რეგულარულად სამეულში ტრიალებენ. მათთან სტუმრად თამაში რთული იქნება, თუმცა მეტოქეებზე მეტად საქართველოს ნაკრების თამაშის ხარისხი მაღელვებს. დიდი მნიშვნელობა ექნება, როგორ თამაშს შევთავაზებთ მოწინააღმდეგეებს.

გერმანიის ნაკრების მთავარ მწვრთნელ ჰენრიკ რიოდლსაც გაუნახევრდა გუნდი, ვერ ითამაშებენ ევროლიგელები და ნაციონალური საკალათბურთო ასოციაციის წარმომადგენლები. შემადგენლობა გაახალგაზრდავდა, თუმცა მწვრთნელი მაინც პოზიტიურადაა განწყობილი:

- გუნდი მშვენიერ ფორმაშია. კალათბურთელები ნაკრებში სათანადო კონდიციებში ჩამოვიდნენ. განწყობაც კარგია. ყველა ერთმანეთს გვერდში უდგას. თუ ასე გაგრძელდა, ეს გუნდი ბევრს მიაღწევს. რადგან ბევრი გამოცდილი კალათბურთელი გვაკლია, ახალგაზრდებს მშვენიერი შანსი აქვთ დაამტკიცონ, რომ ნაკრებში თამაშს იმსახურებენ.

კაპიტანი რობინ ბენზინგი ყურადღებას მოსამზადებელ პერიოდზე ამახვილებს:

- ძალიან პატარა ფანჯარაა, ორ-სამ დღეში ვერც გუნდის შეთამაშებას მოასწრებ და ვერც ფორმაში შესვლას. ერთ-ერთი ყველაზე გამოცდილი მე ვარ და ვცდილობ, ახალგაზრდებს გვერდში დავუდგე. საქართველოსთან პირველ მატჩს ჩვენთვის გადამწყვეტი მნიშვნელობა აქვს.

საქართველოს ნაკრები
მანუჩარ მარკოიშვილი უკანახაზელი 197 რეჯო ემილია (იტალია)
მაიკლ დიქსონი უკანახაზელი 186 სტრასბური (საფრანგეთი)
მიხეილ ბერიშვილი ფორვარდი 203 დინამო
გოგა ბითაძე ცენტრი 211 მეგა ბიმაქსი (სერბეთი)
ანატოლი ბოისა უკანახაზელი 194 კაკტუსი
ბექა ბექაური ფორვარდი 207 ქუთაისი
ნიკა ცქიტიშვილი ფორვარდი 213 უკლუბოდ
ლევან ფაცაცია უკანახაზელი 198 დინამო
აკაკი დვალიშვილი ცენტრი 207 ქუთაისი
რევაზ როგავა უკანახაზელი 193 ოლიმპი
ნიკა დარბაიძე ფორვარდი 203 ოლიმპი
მერაბ ბოქოლიშვილი უკანახაზელი 194 ოლიმპი

მწვრთნელი: ილიას ზუროსი

გერმანიის ნაკრები
ისმეტ აკპინარი (ულმი), რობინ ამაიზე (ბაიერუთი), დანილო ბართელი (ბაიერნი), რობინ ბენზინგი (ვიურცბურგი), ბასტიან დორეთი (ბაიერუთი), აიზია ჰარტენშტეინი (ჰიუსტონი, G ლიგა), დომინიკ ლოკჰარტი (გოტინგენი), ანდრეას ობსტი (ოტინგერი), ჟოშიკო საიბოი (ალბა), კარსტენ ტადა (ოლდენბურგი), იოჰან თეიმანი (ლუდვიგსბურგი), მაიკ ზიბრესი (ბაიერნი).

მწვრთნელი: ჰენრიკ რიოდლი.

ყოველდღიური სპორტული გაზეთი "ლელო"
2197
მკითხველის კომენტარები / 0 /
მსგავსი ამბები
რუბრიკის სხვა სიახლეები
;