გერმანიის ბუნდესლიგა: ყველა ქართველმა მოიგო

28 ოქტომბერს გამართული გერმანული საჭიდაო ბუნდესლიგის მორიგი ტური მაქსიმალურად წარმატებული აღმოჩნდა ქართველი მოჭიდავეებისთვის, რადგან თავისი წილი შეხვედრა ყველა ჩვენებურმა მოიგო.

სტუმრად იმარჯვეს თავისუფალ ჭიდაობაში ევროპის ორგზის ფინალისტმა ბექა ლომთაძემ (61) და მისმა "ბურგჰაუზენმა". ჩვენებურმა პირად შეხვედრაში საკმაოდ იოლად, 12:6 მოუგო მეჰმეთ ფერაიმს, კლუბმა კი გასვლაზე ასევე იოლად 20:11 იმარჯვა ვესტენდორფში ადგილობრივ კლუბთან. ბუნდესლიგაში მორიგი ტური დღესაა დანიშნული, "ბურგჰაუზენი" კი შინ მიიღებს "პაუზა-პლაუენს" და ლიდერობის კიდევ უფრო განმტკიცებას შეეცდება.

აღმოსავლეთ ბუნდესლიგაში შინ "ჰუტიგვაილერთან" 11:17 დამარცხდა "მერკენი", მაგრამ პირადი პაექრობა მოიგო ზურაბ მაჭარაშვილმა (57). ჩვენებურმა 16:0 გაანადგურა სტევენ ეკერი.

ამავე მხარის ბუნდესლიგაში ჩვენთვის ფრიად საინტერესო შეხვედრა გაიმართა ჰაუსვაილერში, სადაც ადგილობრივმა კლუბმა "აახენ-ვალჰაიმი" მიიღო და 14:19 დამარცხდა. ამ ორთაბრძოლის ფარგლებში ქართული პაექრობაც შედგა მძიმე წონაში: ზვიად მეტრეველის პირისპირ საბერძნეთში გადასული მიხეილ ჩიქოვანი დადგა. შეხვედრა ძალიან დაძაბული გამოდგა, თუმცა, საბედნიეროდ, ჩვენი ფალავანი მოწოდების სიმაღლეზე დადგა და მეტოქეს 2:1 სძლია.

ზემოთ ჩვენთვის საინტერესო ვახსენეთ და ამ მხრივ დღევანდელი ტური მაინც გამორჩეული იქნება, რადგან ქართველთა კლუბები ხვდებიან ერთმანეთს: "აახენ-ვალჰაიმი" შინ მიიღებს "მერკენს". სამაგიეროდ, ქართულ პაექრობას ვერ ვნახავთ. აქ სატურნირო ლიდერი ჯერ ისევ "კოლერბახია". "აახენ-ვალჰაიმი" მეორეა, თუმცა მას ერთი შეხვედრით მეტიც აქვს ჩატარებული, "მერკენი" კი ჯერჯერობით მეხუთეა.

სამხრეთ-აღმოსავლეთის ბუნდესლიგაში ქართველებისთვის საფეხბურთო ბუნდესლიგიდან აგრერიგად მშობლიური "ფრაიბურგი" გასვლაზე 11:21 დამარცხდა "ნაკენჰაიმთან". სამაგიეროდ, მოიგო ფრაიბურგელთა ქართველმა ამირან შავაძემ (66), ვინც 11:0 გააცამტვერა იბრაჰიმ ფალაკარა. დღეს "ფრაიბურგი" "ურლოფენის" ძლევას და სატურნირო მდგომარეობის გამოსწორებას შეეცდება.

ბადენ-ვიუტენბერგის რეგიონალლიგაში სტუმრად "ვაიტენაუ-ვისლეტთან" დაძაბულ პაექრობაში მინიმალური სხვაობით, 15:16 წააგო "გერმანიან სულგენმა". სამაგიეროდ, მისმა ქართველებმა წყვილად იმარჯვეს: შოთა ღლონტმა (57) იანის ჰუგს ქულაც კი არ დაუთმო, 17:0 მოუგო, ხოლო ნოდარ ეგაძემ ამჯერადაც მძიმე წონაში იასპარეზა და ამჯერადაც გაიმარჯვა, 15:0 ნიკოლაი დიმიტროვთან.

ყოველდღიური სპორტული გაზეთი "ლელო"
1084
მკითხველის კომენტარები / 0 /
მსგავსი ამბები
რუბრიკის სხვა სიახლეები