გერმანიის ბუნდესლიგის საკლუბო გათამაშება: აბენსბერგი ისევ ქართველებით იგებს 

შემოდგომაზე, ტრადიციულად, განახლდა გერმანიის ბუნდესლიგის საკლუბო გათამაშება ძიუდოში და ასევე ტრადიციულად, მასში წარმატებით გამოდიან ჩვენი ძიუდოისტები. 

ცხადია, მათი აბსოლუტური უმეტესობა მთავარ ლიგაში - პირველ ბუნდესლიგაში ჭიდაობს, თუმცა რატომღაც ამჯერად ყველა მათგანი სამხრეთის ჯგუფში ჭიდაობს, რომელსაც საქვეყნოდ ცნობილი და ერთ-ერთი ყველაზე ტიტულოვანი კლუბი მსოფლიოში „აბენსბერგი“ ლიდერობს. თანაც - დაუმარცხებლად.

ის ლამის ყოველთვის ქართველების ფორპოსტი იყო და ამჯერადაც ჩვენებურთა დახმარებით მუსრავს მეტოქეებს. ოღონდ ახლა იქ ქართველთა რიცხვი საგრძნობლადაა შემცირებული, რადგან ჩვენებურებმა სხვა კლუბებს მიაშურეს, „აბენსბერგში“ კი წლეულს ევროპის ბრინჯაოს მედალოსნები, ზებედა რეხვიაშვილი (81) და ბექა ღვინიაშვილი (90) ჭიდაობენ. 

ბოლო ტურის შეხვედრა ამ კლუბმა 28 სექტემბერს ჩაატარა, როცა ოფენბახში ადგილობრივ „სამურაის“ ესტუმრა და 10:4 მოუგო. კლუბს გამარჯვებაში ღვინიაშვილი ორი მოგებით შეეწია (შეგახსენებთ, რომ შეხვედრები ორ-ორ წრედ ტარდება), ხოლო რეხვიაშვილი პირველ შეხვედრაში დამარცხდა და მეორეში აღარ დააყენეს. 

ღვინიაშვილმა ორივეჯერ იპონით მოიგო, თუმცა პირველად ის თავის ჩვეულ წონაში - 90 კილოგრამში დააყენეს, მეორედ კი 100-ში აჭიდავეს. საინტერესოა, რომ მან ორივეჯერ ერთსა და იმავე ფალავანს - გერმანელ მარკუს საიფერტს აჯობა, ვინც მწვრთნელებმა ასევე ახტუნავეს ზევით-ქვევით წონებში. რეხვიაშვილი ბერძენ დავით ცოკოურისთან დამარცხდა ვაზარ-იპონით, მეორე შეხვედრაში კი მწვრთნელებმა მის ნაცვლად გერმანელი ტიმო კაველიუსი დააყენეს, თუმცა ცოკოურისთან ვერც ის გახდა ვერაფერს და ასევე წმინდად წააგო. 

სამურაელთა შემადგენლობაში მძიმეწონოსანი გელა ზაალიშვილი გამოდის, თუმცა ამ შეხვედრაში მას მონაწილეობა არ მიუღია, რადგან ის საქართველოშია და ახალგაზრდულ ნაკრებთან ერთად ემზადება თანატოლთა მსოფლიოს ჩემპიონატისთვის. 

სატურნირო ცხრილში „აბენსბერგს“ ქართველებით გაძეძგილი „ესლინგენი“ უდგას კვალში, რომელსაც საქართველოს ლამის მთელი ეროვნული ნაკრები ჰყავს გადაბირებული:

ამირან პაპინაშვილი (60), ვაჟა მარგველაშვილი (66), ლაშა შავდათუაშვილი, ფრიდონ გიგანი (ორივე - 73), ავთანდილ ჭრიკიშვილი, ვინც ისევ 81 კილოგრამში ჰყავთ განაცხადში, უშანგი მარგიანი (90), ვალერი ლიპარტელიანი (100), გურამ თუშიშვილი და ლევან მატიაშვილი (ორივე - +100). ამავე კლუბში გამოდიან თურქთა ნატურალიზებული ქართველი ვედატ ალბაირაქი (81) და ესპანელთა ქართველი ნიკოლოზ შერაზადიშვილი. სხვათა შორის, აქვეა ირანელთა მსოფლიოს ჩემპიონი საიდ მოლაიც (81), ვინც, მოგეხსენებათ, სამშობლოდან გამოიქცა და გერმანიაში პოლიტიკური თავშესაფარი ითხოვა. 

წინა ტურში სწორედ ეს კლუბები შეხვდნენ ერთმანეთს აბენსბერგში და მასპინძლებმა მაშინაც იმარჯვეს, ოღონდ - 9:5, თუმცა სტუმრებმა ქართველებიდან რატომღაც მხოლოდ ლიპარტელიანი აჭიდავეს. მან ჯერ გერმანელი მარკ ოდენტალი დააიპონა, შემდეგ კი ასევე მასპინძელ მარკუს ტუშერს აართვა ორი ვაზარი, ვინც მასპინძლებმა 81 კილოგრამიდან აანაცვლეს 100-ში საჭიდაოდ. 

იმ შეხვედრაში აბენსბერგელთა რიგებში ორივე ქართველმა იმარჯვა. თანაც მათ ორივე პირადი პაექრობები მოიგეს. რეხვიაშვილმა პირველად გაფრთხილებებით მოახსნევინა გერმანელი სოშინ კაცუმი, მერე კი ასევე ადგილობრივ ფელიქს კურცს აჯობა ვაზარით. ღვინიაშვილმა ჯერ ასევე გერმანელი მაქსიმილიან შუბერტი დააგდო ვაზარიზე, შემდეგ კი ჰოლანდიელთა წლევანდელ მსოფლიოს ჩემპიონ ნოელ ვან ტ ენდსაც „გამოუყვანა წირვა“ ასევე ვაზარით. 

შემადგენლობაში ხუთი ქართველი ჰყავს მესამეადგილოსან „ჯუდოსპორტვერაინ სპაიერს“: ნიკოლოზ და თეიმურაზ ციმაკურიძეები (ორივე - 100), ონისე ბუღაძე (+100), ირაკლი კუპატაძე (60) და გიგა გიგაური (81), მეოთზე ადგილზე მყოფ „რიუსელშაიმში“ კი თორნიკე ნაგლიაშვილი (66) ირიცხება. რვაგუნდიან ჯგუფში ქართველები არ გამოდიან „ლაიფციგში“, „ერლანგენში“ და „სინდელფინგენში“. 

ყოველდღიური სპორტული გაზეთი "ლელო"
1033
მკითხველის კომენტარები / 0 /
მსგავსი ამბები
რუბრიკის სხვა სიახლეები
;