გვარდიოლას ასისტენტს აღმოსავლეთევროპელებზე უთქვამს...

ორი წელია, უკრაინის ნაკრების თავდამსხმელი ოლექსანდრ ზინჩენკო "მანჩესტერ სიტიში" ირიცხება. მაგრამ პეპ გვარდიოლამ ინგლისის პრემიერლიგაში მხოლოდ გასულ კვირას, "სუონსისთან" საგარეო მატჩში (4:0) ათამაშა.

ზინჩენკომ ინტერვიუ მისცა "მატჩ TV-ის". საინტერესოა, რა სტერეოტიპები ჩამოუყალიბდათ დასავლეთში აღმოსავლეთევროპელ ფეხბურთელებზე. ყურადღებას იქცევს ახალგაზრდა უკრაინელის მიერ გვარდიოლას ნალაპარაკებიდან მოყვანილი ერთი ფრაზა, რომელიც ქართველი ფეხბურთელების პრობლემებს გაგახსენებთ.

"აღმოსავლეთევროპელების პრობლემა რობერტო კარლოსმა ასე დაახასიათა - ეს ან შიშია ან ჩვენ რაღაცას ვერ ვითმენთ და როცა სირთულეებს ვაწყდებით, გზას ავცდებით და იქ მივდივართ, სადაც თავს კომფორტულად ვგრძნობთ. ეს კი კარგი არ არის.

"მანჩესტერ სიტიში" ჩარიცხვის პერიოდში პეპ გვარდიოლას თანაშემწე მელაპარაკებოდა - "აღმოსავლეთ ევროპიდან წარმატებას მხოლოდ ერთეულებმა მიაღწიეს. არაერთმა კი გზიდან გადაუხვია - რატომ? იმიტომ, რომ როგორც კი ფინანსურად უკეთესი ვარიანტი გამოუჩდებათ, მაშინვე თავგზა ერევათ, ან, შესაძლოა, მოთმინება არ ჰყოფნით", - იხსენებს ზინჩენკო.

15 დეკემბერს ზინჩენკო 21 წლის გახდა. შეუძლებელია, არ დაეთანხმო ბლოგერ ზაზა ახალაიას, რომ ასაკის მიუხედავად, უკრაინელი თავდამსხმელი ახალგაზრდა ფეხბურთელებისთვის სამაგალითოდ აზროვნებს და გამოცდილი ბრძენივით აკეთებს აქცენტს, თუ რა პრობლემა აქვთ აღმოსავლეთევროპელებს, მათ შორის, ქართველ ფეხბურთელებსაც, რომელთა არც ისე მცირე ნაწილი მოთმინებასა და შრომას კომფორტს და ფულს ამჯობინებს. ამ ნათქვამში ხომ ბევრი ქართველი საკუთარ თავს ამოიცნობს...

ყოველდღიური სპორტული გაზეთი "ლელო"
1823
მკითხველის კომენტარები / 0 /
მსგავსი ამბები
რუბრიკის სხვა სიახლეები
;