გვარდიოლა, ტენ ჰაგი, ტუხელი... ბაიერნის სამი არჩევანი

„ბილდის“ ინფორმაციით, „ბაიერნი“ ეძებს მწვრთნელს, რომელიც „რეკორდმაისტერში“ წლების განმავლობაში დარჩება და ააშენებს თავის სისტემას. ავტორიტეტული გერმანული გამოცემის ცნობა რომ არა, ისედაც ცხადი იყო, რომ ეს სწორედ ასე უნდა ყოფილიყო.

გერმანული ტაბლოიდის ინფორმაციით, მომავალ ზაფხულს „ბაიერნი ყველაფერს გააკეთებს საიმისოდ, რომ სამი სასურველი კანდიდატიდან ერთ-ერთი დაითანხმოს და გუნდი ჩააბაროს. კანდიტატურებს არაფერი დაეწუნებათ - ერიკ ტენ ჰაგი, პეპ გვარდიოლა, ვინც ერთხელ უკვე იყო „ბაიერნის“ დამრიგებელი, თომას ტუხელი.

ამას გარდა, ცალკე წაიკითხავთ ინფორმაციას, რომელიც ასევე „ბაიერნის“ მწვრთნელის თემას ეხება და იქ უკვე სხვა კანდიდატზეა ლაპარაკი, თან ამ კანდიდატს მთლად კლუბის ერთ-ერთი ბოსი კარლ-ჰაინც რუმენიგე უჭერს მხარს...

ერიკ ტენ ჰაგი,

49 წლის

 „აიაქსთან“ კონტრაქტი 2022 წლის ივლისამდე აკავშირებს. ერიკ ტენ ჰაგი „ბაიერნში“ ერთხელ უკვე მუშაობდა, ოღონდ, პეპ გვარდიოლას ასისტენტად და, პარალელურად, მეორე გუნდის მწვრთნელად (2013-15). ამდენად, ის „ალიანც არენაზე“ შინაური კაცია და ეს მისი კიდევ ერთი უპირატესობაა. გასაგებია ისიც, რომ მისი საფეხბურთო მსოფლმხედველობა ძალიან ახლოსაა გვარდიოლასეულ ხედვებთან.

ტენ ჰაგმა „აიაქსთან“ კონტრაქტი ცოტა ხნის წინ გააგრძელა, მაგრამ მან არ გამორიცხა უცხოეთში მუშაობის ალბათობა. ამსტერდამული გრანდის მენეჯერმა მარკ ოვერმარსმა აღიარა, რომ ტენ ჰაგის შენარჩუნება ძალიან რთული იქნება, თუ მის სამსახურს რომელიმე ტოპკლუბი მოისურვებს.

...ჯერჯერობით კი ის დიდი წარმატებით მუშაობს „აიაქსში“. არის საკმაოდ მკაცრი, მომთხოვნი და ავტორიტეტული. ეს კი ძალიან საჭიროა ისეთ კლუბში, რომელმაც თავის დროზე კარლო ანჩელოტიც მოინელა.

პეპ გვარდიოლა,

48 წლის

 „მანჩესტერ სიტისთან“ კონტრაქტი აქვს 2021 წლის ივლისამდე. ავტორიტეტული გერმანული მედიასაშუალების ცნობით, „ბაიერნში“ კარგად იციან, რომ პეპ გვარდიოლა „სიტიში“ ვეღარ არის ისეთი ბედნიერი, როგორიც იყო ინგლისში მუშაობის პირველ წრეში.

ამის მიუხედავად, „ბაიერნს“ ყოფილი მწვრთნელის დაყოლიება ძალიან გაუჭირდება. ასეა თუ ისე, გვარდიოლას მოქმედი კონტრაქტი აქვს „ქალაქელებთან“ და მისი ანულირება ურთულესი საქმე იქნება...

პეპის უპირატესობა ისაა, რომ მან „რეკორდმაისტერში“ მიმდინარე პროცესების თაობაზე ძალიან კარგად იცის. სხვათა შორის, გვარდიოლას მიმართ დიდი სიმპათია აქვს არაერთ ბაიერნელს, მაგალითად, ჯოშუა კიმიხს, რომელიც არ მალავს, რომ პეპის ხელში ყველანაირი თვალსაზრისით გაიზარდა, როგორც ფეხბურთელი. გვარდიოლას შემთხვევაში მინუსი ძალიან ძნელი საპოვნელია.

ჩაბი ალონსოც კანდიდატია

ჩაბი ალონსი

მიუნხენის „ბაიერნის“ მთავარი მწვრთნელის ვაკანტურ პოსტზე ახალი კანდიდატი გაჩნდა. როგორც გამოცემა „ფრანს ფუტბოლი“ იტყობინება, გერმანიის ჩემპიონის გაწვრთნის შანსი გაუჩნდა ესპანელ ჩაბი ალონსოს, რომელსაც უთამაშია ბავარიელთა რიგებში, დღეს კი ესპანეთში მუშაობს, სადაც „სოსიედადის“ მეორე გუნდს წვრთნის. მოვლენათა ამგვარ განვითარებაზე კომენტარი გააკეთა „ბაიერნის“ დირექტორთა საბჭოს თავმჯდომარემ კარლ-ჰაინც რუმენიგემ:

„მე მას ვხედავ „ბაიერნში“. ჯერ კიდევ მოთამაშის ამპლუაში, ის მოიაზრებდა საკუთარ თავს მწვრთნელის რანგში. ის ძალიან კარგი სტრატეგია და გამართულად ლაპარაკობს რამდენიმე ენაზე. მომავალი მას ეკუთვნის“, - განაცხადა რუმენიგემ.

ასევე წერენ, რომ თუ მიუნხენური გრანდი ვერ მოახერხებს „აიაქსის“ ამჟამინდელ მწვრთნელთან ერიკ ტენ ჰაგთან შეთანხმებას, მაშინ ჩაბი ალონსო უახლოეს მომავალში გამოცხადდება „ბაიერნის“ მთავარ მწვრთნელად.

თომას ტუხელი,

46 წლის

 „პარი სენ-ჟერმენთან“ კონტრაქტი აქვს 2021 წლის ზაფხულამდე. ტუხელის კანდიდატურა ერთხელ უკვე განიხილებოდა „ბაიერნში“, მაგრამ კლუბის ხელმძღვანელობამ არჩევანი ნიკო კოვაჩზე გააკეთა და მწარედაც ინანა.

როგორც ამბობენ, კარლ-ჰაინც რუმენიგეს არ მოსწონს ტუხელის ხასიათი. თუმცა ვეჭვობთ, მწვრთნელს ხასიათი შეეცვალა. ისიცაა, რომ „ბაიერნს“ გერმანიის შიგნით დიდი არჩევანი არ აქვს - იულიან ნაგელსმანი, კიდევ ერთი კანდიდატი „ბაიერნის“ მწვრთნელობისა, „ლაიპციგში“ გადაბარგდა და მიზეზი რომ ჰკითხეს, საინტერესო რამ თქვა - „ბაიერნისთვის“ ჯერ მზად არ ვარო. შესაშური თავმდაბლობაა.

ტუხელის ვარიანტი ალბათ ყველაზე რეალურია. „პარი სენ-ჟერმენის“ ხელმძღვანელობა დიდი მოთმინებით არ გამოირჩევა, როცა საქმე შედეგს ეხება. მათ ახლავე უნდათ ჩემპიონთა ლიგის მოგება...

ასეა თუ ისე, „დორტმუნდის“ ყოფილი მწვრთნელი კარგად მუშაობს „პარი სენ-ჟერმენში“, მაგრამ ჩემპიონთა ლიგის მოგება ასე შეკვეთით... ძალიან რთულია. ამ დროს, პსჟ შემტევ და სანახაობრივ ფეხბურთს თამაშობს და ეს არის ის, რაც „ბაიერნის“ ფანებს უთუოდ მოეწონებათ მომავალი მწვრთნელის „სივში“.

491
მკითხველის კომენტარები / 0 /
მსგავსი ამბები
რუბრიკის სხვა სიახლეები
;