'გვეყოფა ბოლო ვაგონში ყოფნა' - ინტერვიუ რევაზ ძოძუაშვილთან

საქართველოს ორი წარმომადგენელი უკვე ჩაერთო ევროთასებზე. ჩემპიონთა

ლიგაში ქუთაისის "ტორპედომ" პირველ, საშინაო შეხვედრაში 2:1 მოუგო ტირასპოლის "შერიფს", "სამტრედია" კი უკანასკნელ წამზე გაშვებული გოლით თბილისში 0:1 დამარცხდა ყაზახურ "ტობოლთან".

გუშინ ამ შეხვედრების თაობაზე აზრის გაზიარება ვთხოვეთ რევაზ ძოძუაშვილს - წარსულში სახელგანთქმულ ფეხბურთელს, ვისთვისაც "ტორპედო" მშობლიური კლუბია. ძოძუაშვილი არაერთხელ წვრთნიდა "ტორპედოს" და მისი აზრი ამადაცაა საინტერესო...

- ვულოცავ "ტორპედოს" ამ გამარჯვებას, - თქვა ძოძუაშვილმა საუბრის დასაწყისში, - ეს მოგება აუცილებელი იყო ქართული ფეხბურთისთვის, საქართველოს ნაკრებისთვის...

სიმბოლურია, რომ ეს გამარჯვება მოპოვებულია "ტორპედოს" მიერ. ქუთაისიდან არაერთი კარგი პროცესია დაწყებული. ქუთაისს აქვს ძალიან კარგი ტრადიცია. ჩვენთვის დღეს ყველა მოგებას ოქროს ფასი აქვს. გვეყოფა მაჩანჩალობა, გვეყოფა ბოლო ვაგონში ყოფნა. ეს ნამდვილად არ არის ჩვენი საქმე.

- კონკრეტულად თამაშზე რას იტყოდით?

- მე ვფიქრობ, ძალიან კარგი თამაში აჩვენა საქართველოს ჩემპიონმა. მოგეხსენებათ, ზოგადად ქართულ კლუბებს უჭირთ გაშვებული გოლის შემდეგ თამაშის შემოტრიალება, მაგრამ "ტორპედომ" ეს შეძლო. ძალიან გამახარა იმანაც, რომ ფეხბურთელები ბოლომდე იბრძოდნენ შეტევასა თუ დაცვაში და არაფერს თმობდნენ.

- რას იტყვით ქუთაისელთა სამწვრთნელო შტაბზე, კახა ჩხეტიანზე?

- ბრავო ამ ახალგაზრდა ბიჭს! მე თავად მითამაშია და მიმუშავია ქუთაისში არაერთი წლის განმავლობაში. ამ ქალაქს იმდენი აქვს ნანახი, ისეთი წარსული აქვს "ტორპედოს", რაც უნდა გააკეთო, რასაც უნდა მიაღწიო, არავის არაფერი გაუკვირდება.

ჩხეტიანი სტაბილურად მუშაობს "ტორპედოში" და თავისი ხელწერით ათამაშებს გუნდს. გარდა ამისა, "ტორპედოში" ოჯახური გარემოა შექმნილი და ესეც ძალიან მნიშვნელოვანი მომენტია. ზოგადად, ძალიან კარგად წარმართა სამწვრთნელო შტაბმა თამაში.

მაგალითად, ამ შეხვედრაში მოხდა გიორგი ქიმაძის შედარებით არასტანდარტულად გამოყენება, რამაც მნიშვნელოვანი როლი ითამაშა "ტორპედოს" წარმატებაში.

ის პროფესიონალები, რომლებიც დღეს არიან "ტორპედოს" სამწვრთნელო შტაბში, შეიძლება ისეც ითქვას, რომ ჩვენი გაზრდილები არიან. ისინი, ალბათ, ითვალისწინებენ იმას, რაც ჩვენ მათ თავის დროზე ვასწავლეთ. ძალიან კარგად მუშაობს კახა ჩხეტიანის შტაბი - ამას ყოველგვარი გადაჭარბების გარეშე ვამბობ.

- "ტორპედოში" ლეგიონერები მივიდნენ. რა აზრის ხართ მათ თამაშზე?

- რა თქმა უნდა, მათ გუნდი გააძლიერეს. ისე, მოდი ნუ დავყოფთ - ვინ ლეგიონერია და ვინ - ადგილობრივი. ყველამ კარგად ითამაშა და "ტორპედომ", უპირველეს ყოვლისა, თავისი გუნდურობით გაიმარჯვა.

ფეხბურთელებმა დიდი ბრძოლისუნარიანობა გამოავლინეს და მჯერა, ასე იქნება მეორე შეხვედრაშიც. ჩვენს ჩემპიონს ნამდვილად შეუძლია, ტირასპოლშიც წარმატებით ითამაშოს. ეს მის ძალებს არ აღემატება და ამის ძალიან მეიმედება კიდეც.

- და მაინც, როგორ თამაშს ელით ტირასპოლში?

- ამ თამაშის წინ "ტორპედოს" მწვრთნელებსა და ფეხბურთელებს ერთი რამ მინდა ვურჩიო. ალბათ, არც სჭირდებათ ჩემი რჩევა, მაგრამ მაინც ვიტყვი - ნახონ კიდევ ერთხელ დიდი დაკვირვებით, როგორ თამაშობს მუნდიალზე, მაგალითად, საფრანგეთის ნაკრები.

თუნდაც ბელგიასთან ბოლო თამაში რომ ავიღოთ, როგორ უტევდა და როგორ იცავდა მთელი გუნდით თავს დიდიე დეშამის გუნდი. ასევე გუნდურად უნდა ვითამაშოთ მოლდოვას ჩემპიონთან გასვლაზეც და ღრმად ვარ დარწმუნებული, ასეთ შემთხვევაში სავსებით შესაძლებელია ამ ბარიერის გადალახვა.

კი, კარგი გუნდია "შერიფი", ძლიერი ლეგიონერები ჰყავს, მაგრამ ნამდვილად არ არის დაუმარცხებელი და ეს ქუთაისშიც ძალიან კარგად გამოჩნდა.

- ბოლოს "სამტრედიას" თამაშის შეფასებაც უნდა გთხოვოთ...

- ერთმნიშვნელოვნად საფეხბურთო ქალაქია სამტრედია. მან ისეთი დიდი ფეხბურთელები აჩუქა საქართველოს, როგორებიც არიან ჯუმბერ ხაჟალია, კახა კალაძე...

პირველ ტაიმში გუნდმა ძალიან კარგად ითამაშა. ახალმა სამწვრთნელო შტაბმა მოკლე დროში მაქსიმუმი გააკეთა. მერე გამოჩნდა ფიზიკური მომზადებისა და შეთამაშების პრობლემა.

შეხვედრის ბოლო წამზე მაინც "ჩაგვეძინა" და მოწინააღმდეგეს საშუალება მივეცით, გამარჯვების გოლი გაეტანა. ბუნებრივია, მეორე ნახევარში გუნდი დადგა ასეთი პრობლემების წინაშე. რად უნდა თქმა იმას, რომ ერთ კვირაში არ კეთდება გუნდი და რაც უნდა მაღალი კლასის მოთამაშეები მიიყვანო, ისე ვერ შეათამაშებ, რომ ევროთასებზე არ დადგეს იმ პრობლემების წინაშე, რომელსაც ახლა შევეჯახეთ. არადა, პირველ ტაიმში იყო მომენტები და ვფიქრობ, ერთ-ერთ ეპიზოდში არბიტრს თავისუფლად შეეძლო, პენალტი დაენიშნა "ტობოლის" კარში...

საერთოდ, არ მიყვარს მსაჯებზე რაიმეს დაბრალება, მაგრამ ფაქტია, რომ იყო ასეთი ეპიზოდი... სანამ ფეხბურთელები არ დაიღალნენ, მოწინააღმდეგეს ტოლი არაფერში დავუდეთ. ბურთსაც უკეთესად ვაკონტროლებდით და მომენტებიც შევქმენით. ვერავინ იტყვის, რომ "ტობოლმა" რამეში გვაჯობა.

ჩემი აზრით, ამ შემადგენლობით "სამტრედია" საქართველოს მასშტაბით ერთ-ერთი ანგარიშგასაწევი ძალა იქნება. წინ არის საპასუხო თამაში ყაზახეთში და იმედი მაქვს, იქ ჩვენთვის სასურველ შედეგს მივაღწევთ.

ყოველდღიური სპორტული გაზეთი "ლელო"
1638
მკითხველის კომენტარები / 0 /
მსგავსი ამბები
რუბრიკის სხვა სიახლეები