გია გეგუჩაძე: ასეთი რამ  ბევრ ევროპულ  ქვეყანაშიც  არ ხდება!..

ბათუმის “დინამოს” მთავარ მწვრთნელ გია გეგუჩაძეს “საბურთალოსთან” მოგებული (4:2) მატჩის შემდეგ ველაპარაკეთ - გუნდის მიზნებზე, ამბიციებზე... ცხადია, ბათუმელ გულშემატკივრებზე, რომლებმაც ეროვნული ლიგა უზომოდ გაალამაზეს და სხვა ხიბლი შემატეს...

- ბათუმში ხალხი თამაშებზე მუდამ დადის, მაგრამ ამის ფონზეც კი “საბურთალოსთან” მატჩი გამორჩეული იყო... ასეთი საფეხბურთო გარემო ჩვენს ჩემპიონატში ადრეულ წლებში თუ იყო? 

- უპირველესად, ჩვენს გულშემატკივარს გადავუხდი მადლობას, რომელმაც “საბურთალოსთან” მატჩი მართლაც ზეიმად აქცია. სასწაული გარემო იყო!.. დიდი ხანია, ქართულ ფეხბურთში ვარ და მსგავსი გულშემატკივრობა ჩვენს ჩემპიონატში, ასეთი ატმოსფერო არ მახსენდება. 

- თქვენი გუნდის თამაშს როგორ შეაფასებდით?

- ერთმანეთს ორი ღირსეული გუნდი შეხვდა, გულშემატკივარმა კი ლამაზი ფეხბურთი იხილა და ორივე გუნდის თამაშით ისიამოვნა. მიხარია, ასეთ მატჩში გამარჯვება და ისიც, რომ ახლა ლიდერები ჩვენ ვართ. მაღალი ტემპი გულშემატკივრებმა განაპირობეს. სტადიონზე ისეთი სიტუაცია იყო, ფეხბურთელებს ამოსუნთქვის საშუალება არ ჰქონდათ. მათ სწორედ ქომაგი აიძულებდა, ტემპი არ დაეგდოთ და ბოლომდე ებრძოლათ. საბოლოოდ, ამან შედეგი გამოიღო და მიმდინარე სეზონის ამ მომენტისთვის ყველაზე დასამახსოვრებელი შეხვედრა ჩავატარეთ.

- ამ თამაშიდან გამომდინარე, ჩემპიონობისთვის ბრძოლა და ევროთასებზე გასვლა რეალური ჩანს...

- იმას კი არ ვამბობ, რომ მიზანი არ გვაქვს, უბრალოდ, ჯერ ამაზე ლაპარაკი ნაადრევია. ყველაფერი უცებ არ ხდება, ეტაპების გავლაა საჭირო, რომ წარმატება შემთხვევითი არ იყოს, ამისთვის საფუძველი უნდა ჩავყაროთ. ჩემი ამოცანა სწორედ ესაა - წარმატება ლოგიკური და სტაბილური უნდა გახდეს. ვხედავ, რომ გუნდს დიდი პოტენციალი აქვს, მზარდია და კონკურენტუნარიანი. თუმცა, ჩვენ გაცილებით მეტს ვითხოვთ. ბათუმის “დინამო” უნდა განვითარდეს და წინ წავიდეს.

- აქვს ბათუმის “დინამოს” რესურსი 36 ტურისთვის? 

- როცა საფუძვლის ჩაყრაზე ვილაპარაკე, ესეც ვიგულისხმე. გაძლიერება ყველა გუნდს სჭირდება.

- ანუ, შესაძლებელია, რომ გუნდი ზაფხულში კიდევ გაძლიერდეს?

- ბოლო წელიწადნახევარში შემადგენლობა სამჯერ შეიცვალა და, შესაძლოა, ტრანსფერები კიდევ განხორციელდეს, მაგრამ ამასაც თავისი ლოგიკა და საჭიროება უნდა ჰქონდეს. 

- საამისოდ, ფინანსური მხარდაჭერა აუცილებელი წინაპირობაა. მართალია, თითქოს ამ კუთხით ბათუმის “დინამო” ახლა საქართველოში გამორჩეულია?

- გამორჩეულის რა გითხრათ, მაგრამ მნიშვნელოვანია, რომ არიან ადამიანები, მეცენატები, რომლებიც კლუბს ეხმარებიან. თანადგომისთვის მათ ჩვენგან მადლობა ეკუთვნით. თუკი კლუბს ჩაიბარებენ, დარწმუნებული ვარ, ეს უდიდესი საქმე იქნება და ბათუმის “დინამო” სულ სხვა საფეხურზე გადავა. 

- დღევანდელ ბათუმის “დინამოში” გიორგი ნავალოვსკის იგივე როლი აკისრია, რაც 2004 წელს თბილისის “დინამოში” გიორგი ნემსაძეს ჰქონდა?

- ყველა დრო განსხვავებულ ლიდერებს აჩენს. მაგრამ გიორგი ნავალოვსკი რომ გუნდისთვის ძალიან მნიშვნელოვანი და საჭირო ფიგურაა, ეს ცალსახაა. მიხარია, ასეთი ფეხბურთელი და პიროვნება ჩვენთან რომ არის. მისი დამოკიდებულებით ძალიან კმაყოფილი ვარ და დიდ იმედებსაც ვუკავშირებთ. საერთოდ, მე ჩემი ფეხბურთელების მჯერა და მეიმედება. 

- აშკარად ჩანს, რომ ბათუმის “დინამოს” წარმატებით აჭარაში დიდი დაინტერესება გაჩნდა...

- აქ ძალიან დიდი ამბავი ხდება და დიდი მოლოდინია. არ მიყვარს ხმამაღალი ლაპარაკი, მაგრამ მომავალი წარმატებებისთვის მართლაც ბევრი რამ კეთდება. 

- დამაიმედებელი ამბავია, რომ შესაძლოა, ბათუმის “დინამო” ახალ სტადიონზე წელსვე შევიდეს... 

- მშენებლობის დასრულებას ყველანი მოუთმენლად ველით. დიდი სურვილი მაქვს, ახალი სტადიონიც ისევე შეივსოს, როგორც - ანგისას ბაზის ტრიბუნები. ყველაზე მეტად ის მახარებს, რომ ბათუმის “დინამოს” წარმატებულმა გამოსვლამ ხალხი ფეხბურთისკენ შემოატრიალა და ნამდვილი ბუმი დაიწყო. ჩვენს საფეხბურთო სკოლაში ვარჯიში ძალიან ბევრმა ბავშვმა მოინდომა. მე თუ მკითხავთ, ესაა ყველაზე დიდი ამბავი, რაც იმაზე მეტყველებს, რომ სწორ გზას დავადექით. სწორედ ეს ბუმი განაპირობებს ბათუმის “დინამოს” ხვალინდელ დღესა და წარმატებებს. 

- სამტრედიაშიც გვინახავს სავსე ტრიბუნები და 9-10 ათასი მაყურებელი ქუთაისშიც მისულა, მაგრამ ის, რაც ბათუმში ხდება, მაინც მოვლენაა. თქვენი აზრით, შესაძლებელია, რომ მსგავსი აჟიოტაჟი სხვა ქალაქებსაც გადაედოს?

- ბევრგან მიმუშავია და აშკარაა, რომ ქართველ კაცს ფეხბურთი უყვარს. ეს მისი ცხოვრების შემადგენელი ნაწილია. ბათუმის მსგავსი აჟიოტაჟის რა გითხრათ, თუმცა დღევანდელზე უკეთესი დასწრება შესაძლებელი მგონია. მაგრამ ის, რაც ბათუმში ხდება და რაც “საბურთალოსთან” მოხდა, ეს მაინც წარმოუდგენელი მოვლენაა. 

- ისეთი შთაბეჭდილება დაგვრჩა, რომ ეს სადღაც ევროპაში ხდებოდა...

- ასეთი რამ ბევრ ევროპულ ჩემპიონატშიც არ ხდება. მიხარია, ეს ინტერესი და საფეხბურთო ბუმი ბათუმის “დინამომ” რომ გამოიწვია. დიდი სასწაულია.

ყოველდღიური სპორტული გაზეთი "ლელო"
3443
მკითხველის კომენტარები / 2 /
თამაზი
0
დამთხვევა მოხდა რამდენიმე ფაქტორის: ახალი სტადიონი მალე,ნორმალური გუნდი, ქალაქის მშენებლობა ზოგადად, იმედი რომ სერიოზული სპონსორი გამოჩნდება , ევროპაზე გავლენ და კარგად ითამაშებენ. ვფიქრობ ,ასეთი ბუმი ყველა პატარა ქალაქში გაჩნდება ,როგორც კი საკუთარი სტადიონები აშენდება, ნუ, სპონსორიც უნდა გამოჩნდეს. თბილისის სიტუაცია ცოტა სხვანაირია, გუნდი უნდა იყოს "შენი",რომ სტადიონზე იარო
Bek
0
მადლობა გეგჩაძეს, მისი დიდი იმედი გვაქვს და იმედია დიდ ხანს იქნება კლუბში.
მსგავსი ამბები
რუბრიკის სხვა სიახლეები
;