გია გეგუჩაძე: აღარ მეგონა, თუ კიდევ რამე გამაოცებდა!..

გულშემატკივარი, ვინც 1 მაისს ბათუმის "დინამოსა" და მარტვილის "მერანის" შეხვედრა (1:0 ბათუმელთა სასარგებლოდ) იხილა, ამ საღამოს არასოდეს დაივიწყებს.

რანგით მეორე ლიგის გუნდების თამაშზე ბათუმელთა ანგისას ბაზის ტრიბუნები გადაჭედილი იყო და ვინც იქ ვერ მოხვდა, მატჩს მოედნის გარედან უყურებდა.

მართალია, ანგისას ბაზა სულ 1650 მაყურებელს იტევს, მაგრამ რაოდენობაზე მნიშვნელოვანი ის გარემო იყო, სადაც ფეხბურთელებს თამაში უწევდათ. მსგავსი საფეხბურთო ატმოსფერო საქართველოში ბოლოს ისევ ბათუმში იყო, როდესაც გუნდი შარშან "რაგბი არენაზე" შეუშვეს და შეხვედრას მინიმუმ 4 ათასი მაყურებელი დაესწრო.

მსგავსი მაჩვენებელი უფრო განვითარებულ და გაპიარებულ ლიგაში არავის გააოცებს. მაგრამ ეს ხდება საქართველოში, სადაც არაერთი გუნდი დროებით საკუთარ სტადიონზე ვერ თამაშობს და მაყურებელს, ფაქტობრივად, მოკლებულია.

მსგავსი არაფერი მინახავს...

ბათუმელთა მთავარი მწვრთნელი გია გეგუჩაძე არა მხოლოდ შედეგით, არამედ, გუნდის საკუთარ სტადიონზე დაბრუნებითაა გახარებული:

- რამდენი ხანია, ფეხბურთში ვარ და არ მეგონა, რამე თუ გამაოცებდა. მაგრამ რაც ამ შეხვედრაზე ვნახე, ყოველგვარ მოლოდინს გადააჭარბა.

- ქუთაისში თამაშის შემდეგ საკუთარ არენაზე სავსე ტრიბუნების წინაშე თამაში ემოციური გამოდგა.

- რა თქმა უნდა. 1 მაისი ჩემს კარიერაში ერთ-ერთი გამორჩეული საღამო იყო და მიხარია, რომ ეს ბათუმში მოხდა. აჭარაში ფეხბურთი რომ უყვართ, ეს ყველამ იცის, მაგრამ ასეთი დამოკიდებულება და სიყვარული მაინც წარმოუდგენელი იყო.

სტადიონზე ყველა ასაკის ხალხი იყო, ქალიც, კაციც და ისეთი ატმოსფერო შექმნეს, რომელზეც საქართველოში სულ ვოცნებობდი. სხვათა შორის, ტელევიზორში არ ჩანდა, რომ ხალხი მთელი მოედნის გარშემოც იდგა და ბევრად მეტი ხალხი მოვიდა, ვიდრე ტრიბუნები იტევს. სასწაული შეგრძნება იყო.

- ბაზის გახსნა მოედნის საფარის გამო ყოვნდებოდა და ახლა როგორ მდგომარეობაშია?

- ძალიან კარგი მინდორია. საერთოდ, ბაზაც კარგია და მისი ინფრასტრუქტურაც და ჩემი აზრით, ანგისას სტადიონზე ჩვენი ჩემპიონატის თამაშები საუკეთესო პირობებში გაიმართება.

- მალე სტადიონიც აშენდება და ყოველივე ეს ბათუმის "დინამოს" განვითარებისთვის მშვენიერ საფუძველს შექმნის.

- კარგი იქნება, რომ ყველა ქართულ გუნდს საკუთარი ბაზა და სტადიონი ჰქონდეს. ცხადია, ეს მათზე და ზოგადად, ქართული ფეხბურთის განვითარებაზე დადებით გავლენას მოახდენს.

მაგრამ უფრო მნიშვნელოვანი და გადამწყვეტი ფაქტორი გუნდის გარშემო არსებული გარემოა. ბათუმი და ზოგადად, აჭარა საფეხბურთო რეგიონია და ამ ატმოსფეროს გვიქმნიან.

გამოცდილი ადამიანი ვარ, ბევრი მინახავს და გამიგია, მაგრამ ისეთი ატმოსფერო, რაც ანგისაში იყო, ბოლო წლების საქართველოში პირველად ვნახე. ეს მაიმედებს, რომ ბათუმის "დინამო" განვითარდება და ამ გუნდით წარმატებებს მივაღწევთ.

ერთი შეხედვით, თითქოს, ბევრი არაფერიც არ მოხდა - გუნდის ბაზა აშენდა და ამ დროს, ბათუმში ნამდვილი ზეიმი მოაწყვეს. თურმე, ფეხბურთს რამხელა ძალა ჰქონია და ხალხს როგორ ყვარებია.

იმედი მაქვს, რომ ბათუმის "დინამო" წარმატებებს მიაღწევს და მსგავსი ლამაზი საღამოები ბევრი იქნება. თამაშის თითოეულ მონაწილეს, გულშემატკივრებს და იმ ხალხს, ვინც ეს საღამო მოაწყო და შესაძლებელი გახადა, მადლობა მსურს გადავუხადო.

თავი ფეხბურთელებად ვიგრძენით...

ახალი ბაზით და სტადიონით "დინამოს" ვიცე-კაპიტანი გიორგი ჯანელიძეც კმაყოფილია:

- სტადიონზე იმდენი ხალხი მოვიდა, რომ თამაშზე და თითოეულ ფეხბურთელზე სასიკეთო გავლენა მოახდინა. ფეხბურთისგან მიღებული მსგავსი ემოციები თითქმის არ მახსენდება.

სავსე ტრიბუნა ორმაგი სტიმული იყო და მოედნიდან გასვლა არ გვინდოდა. თავი ფეხბურთელებად ვიგრძენით, თურმე ხალხს ფეხბურთი როგორ აინტერესებს.

- მაყურებლის გარეშე ფეხბურთი ვარჯიშივით უინტერესოა.

- რა თქმა უნდა, დუნეა და დიდ ემოციას ვერ მიიღებ. ხალხი კი ისეთ საფეხბურთო გარემოს ქმნის, თამაში სასიამოვნო იყო და რაც მთავარია, პასუხისმგებლობა გაგვეზარდა. რომ დაფიქრდეთ, ფეხბურთში მთავარი ესაა. სხვაგვარად, საკუთარ შესაძლებლობებს ვერ გამოავლენ.

- როგორც გვითხრეს, ანგისას ბაზაზე კარგი საფარია.

- მართლაც კარგი მინდორია, სწორია და ბურთის გაგორება შეიძლება. ხომ იცით, მანამდე რა ფონიც იყო - ცარიელი ტრიბუნების წინ ვთამაშობდით და უცებ, სავსე ტრიბუნები და ხალხის მხარდაჭერა ყველას გვესიამოვნა. სხვათა შორის, მეორე ტაიმში ულტრასებმა ფოიერვერკი მოაწყვეს და თავი სერია A-ს მატჩის მონაწილე მეგონა.

- წლევანდელ ბათუმის "დინამოზე" რას იტყვი?

- ყველა ისეთი ფეხბურთელია, რომელსაც ბურთის გორება შეუძლია. ბიჭები ერთმანეთს დავუახლოვდით, შევთამაშდით და ვხედავ, რომ კარგი გუნდი ყალიბდება.

ყოველდღიური სპორტული გაზეთი "ლელო"
2160
მკითხველის კომენტარები / 1 /
სოსო
0
კახელი ვარ და თელაველების მარცხი მეწყინა,მაგრამ თამაშიც კარგი იყო და მაყურებელიც.როგორც იქნა აღირსეს ბათუმს რაღაცა და ვულოცავ,იმედია ის დიდი სტადიონი კვლავ ბლეფი არ აღმოჩნდება.ბათუმელების ადგილი კი მხოლოდ ნორმალურ სტადიონზე და უმაღლეს ლიგაშია.საერთოდაც,აჭარის ყველა კურორტზე უნდა არსებობდეს კომპაქტური სტადიონები,თავის სპორტული ბაზებით,ეს ქართულ სპორტსაც წაადგება და უცხოელებითაც დაიტვირთება.
მსგავსი ამბები
რუბრიკის სხვა სიახლეები
;