გია გეგუჩაძე: ბათუმის დინამოს სიტყვიერად უკვე შევუთანხმდი

ბათუმის „დინამოს“ ახალი მთავარი მწვრთნელი ჰყავს - „ლელოს“ მოპოვებული ინფორმაცია, რომ კლუბში გია გეგუჩაძეს იწვევდნენ, დადასტურდა - 52 წლის სპეციალისტმა ეს თავად დაგვიდასტურა.

„დასამალი არაფერია, ბათუმელთა ხელმძღვანელობას ველაპარაკე, კონტრაქტზე სიტყვიერად შევუთანხმდი და ახლა მხოლოდ დეტალებია დასაზუსტებელი. მართალია, ჯერ კონტრაქტი არ გამიფორმებია, თუმცა საკითხი, ფაქტობრივად, გადაწყვეტილია. ამ სიტყვიერი შეთანხმების მიხედვით, ხანგრძლივი კონტრაქტი გაფორმდება, რადგან დიდი გეგმები გაგვაჩნია“ – ამბობს გეგუჩაძე.

საქართველოს ახალგაზრდული ნაკრებსი ყოფილი მთავარი მწვრთნელის თქმით, ბათუმის „დინამოში“ განვითარების სერიოზულ პერპექტივას ხედავს: “გუნდი რომ განვითარდეს და გამართული სტრუქტურა აეწყოს, საჭიროა საფეხბურთო აკადემიის ჩამოყალიბება, ძლიერი ასაკობრივი გუნდები და თანამედროვე ინფრასტრუქტურა. პროექტების განხორციელება უკვე დაწყებულია.

გუნდის საწვრთნელი ბაზა აშენდა და მოედნები კიდევ გაკეთდება. დამტკიცებულია ბათუმის სტადიონის მშენებლობის პროექტი და მალე ინფრასტრუქტურის კუთხით აჭარაში მდგომარეობა რადიკალურად შეიცვლება. ცხადია, ეს ბათუმის „დინამოს“ მდგომარეობაზეც სასიკეთოდ აისახება”, -აღნიშნავს გეგუჩაძე.

შეგახსენებთ, რომ გეგუჩაძემ სამწვრთნელო კარიერა თბილისის „დინამოში“ დაიწყო, სადაც დავით ყიფიანს ეხმარებოდა. 2003 წელს „რუსთავს“ წვრთნიდა, 2004–2005 წლებში - „დინამოს“, რომელიც მერე კიდევ ერთხელ ჩაიბარა (2015–2016). ასევე ორჯერ ჩაიბარა „ზესტაფონი“ (2009–2011 და 2013–2014), ხოლო 2011–2013 წლებში ქუთაისის „ტორპედოს“ ავარჯიშებდა. ბოლოს, 2016 წლიდან გეგუჩაძე საქართველოს 21 წლამდელთა ნაკრებსი დამრიგებელი გახლდათ.

1352
მკითხველის კომენტარები / 0 /
მსგავსი ამბები
რუბრიკის სხვა სიახლეები
;